តុលាការកំពូលប៉ាគីស្ថាននឹងចេញសាលក្រមសម្រេចជោគវាសនារបស់នាយករដ្ឋមន្ត្រីអ៊ីមរ៉ាន ខាន
តុលាការកំពូលប៉ាគីស្ថាននឹងចេញសាលក្រម ដែលនឹងសម្រេចជោគវាសនារបស់លោកនាយករដ្ឋមន្ត្រីអ៊ីមរ៉ា ខាន បន្ទាប់ភាពចលាចលនយោបាយយ៉ាងខ្លាំងក្នុងរយៈពេលប៉ុន្មានសប្ដាហ៍ចុងក្រោយនេះ។
ក្នុងរយៈពេលប៉ុន្មានថ្ងៃចុងក្រោយនេះ លោកខាន បានប្រឈមនឹងកិច្ចខិតខំប្រឹងប្រែងដោយក្រុមបក្សប្រឆាំងដើម្បីទម្លាក់លោកពីតំណែង បន្ទាប់ពីលោកហាក់ដូចជាបានបាត់បង់ការគាំទ្រពីកងយោធាដ៏មានឥទ្ធិពលរបស់ប្រទេសនេះ។
លោកខានបានអះអាងដោយមិនបានផ្ដល់ភស្តុតាងថាកិច្ចប្រឹងប្រែងដើម្បីទម្លាក់លោកពីតំណែងគឺជាឧបាយកលរវាងក្រុមគណបក្សប្រឆាំង និងសហរដ្ឋអាមេរិក។ លោកខាន និងគណបក្សរបស់លោក បានព្យាយាមរារាំងការបោះឆ្នោតទម្លាក់លោក ដោយធ្វើការរំលាយរដ្ឋសភា និងប្រកាសធ្វើការបោះឆ្នោតមុនពេលកំណត់។
សមាជិកគណបក្សប្រឆាំងបានដាក់ញត្តិទៅកាន់តុលាការកំពូលប៉ាគីស្ថានដើម្បីតវ៉ាការរារាំងរបស់លោកខាន។ ដើមឡើយតុលាការត្រូវបានគេរំពឹងថានឹងចេញសាលក្រមនៅថ្ងៃចន្ទ ប៉ុន្តែឥឡូវនេះសវនាការនឹងបន្តចូលដល់ថ្ងៃអង្គារ។
អ្នកវិភាគជាច្រើនបាននិយាយថាលោកខានបានជាប់ឆ្នោតដោយសារមានការគាំទ្រនយោបាយពីកងយោធា ប៉ុន្តែឥឡូវលោកហាក់ដូចជាបានបាត់បង់ការគាំទ្រនេះ។ សម្ព័ន្ធភាពបក្សប្រឆាំងបានឆ្លៀតឱកាសនេះដើម្បីរៀបចំការបោះឆ្នោតទម្លាក់លោកខាន ហើយបញ្ចុះបញ្ចូលដៃគូក្នុងសម្ព័ន្ធភាពកាន់អំណាចរបស់លោកខាន ឱ្យផ្លាស់ដកហូតការគាំទ្ររបស់ពួកគេ៕
ប្រភព៖ BBC
