អ្នកជំនាញ ប្រមូលភស្តុតាងស៊ើបអង្កេតលើករណីចោទប្រកាន់ថា រុស្ស៊ីប្រព្រឹត្តិឧក្រិដ្ឋកម្មសង្គ្រាមនៅទីក្រុងអ៊ុយក្រែន
រូបភាពសាកសពជនស៊ីវិល ដែលបានស្លាប់ដេកនៅលើដងផ្លូវនៃទីក្រុង Bucha នៃប្រទេសអ៊ុយក្រែន ដោយខ្លះត្រូវចងដៃ ខ្លះមានរបួស ដោយគ្រាប់កាំភ្លើងចំក្បាល ត្រូវបានបង្ហោះចេញលេចចេញតាម Telegram នៅចុងសប្តាហ៍។
នៅក្នុងដំណើរទស្សនកិច្ចទៅកាន់ទីក្រុង Bucha ប្រធានាធិបតីអ៊ុយក្រែន លោក Volodymyr Zelenskiy បាននិយាយថា៖ «ទាំងនេះ គឺជាឧក្រិដ្ឋកម្មសង្រ្គាម ហើយនឹងត្រូវបានទទួលស្គាល់ ដោយពិភពលោកថាជាអំពើប្រល័យពូជសាសន៍»។
សហរដ្ឋអាមេរិក និងបណ្តាប្រទេសនៅអឺរ៉ុប បានសន្យាកាលពីថ្ងៃ ចន្ទ ថា នឹងដាក់ទណ្ឌកម្មទីក្រុងមូស្គូជុំវិញការសម្លាប់ជនស៊ីវិលនៅភាគខាងជើងប្រទេសអ៊ុយក្រែន ជាកន្លែង ដែលគេជីកផ្នូរដ៏ធំ និងចងសាកសពមនុស្ស ដែលត្រូវបានបាញ់នៅចម្ងាយជិតនៅទីក្រុង Bucha ដែលជាតំបន់កងកម្លាំងរុស្ស៊ីវាយលុក។
ការរកឃើញនេះ ក៏បានពង្រីកការអំពាវនាវរបស់លោកខាងលិចឱ្យមានការហ៊ុមព័ទ្ធលើថាមពល និងធ្យូងថ្មរបស់រុស្ស៊ី ក៏ដូចជាការផ្គត់ផ្គង់អាវុធវាយលុកបន្ថែមទៀតដល់អ៊ុយក្រែនផងដែរ។
រុស្ស៊ី បានបដិសេធរាល់ការចោទប្រកាន់ពាក់ព័ន្ធ នឹងការសម្លាប់ជនស៊ីវិល រួមទាំងរឿងក្រុង Bucha ផងដែរ។ លោក Dmitry Peskov អ្នកនាំពាក្យរបស់លោក ពូទីន កាលពីថ្ងៃច័ន្ទ បានបញ្ចេញការសង្ស័យយ៉ាងធ្ងន់ធ្ងរលើរបាយការណ៍នៃជនស៊ីវិលរាប់រយនាក់ ដែលត្រូវបានសម្លាប់នៅក្នុងទីក្រុង Bucha ។ លោកបាននិយាយថា៖ «តាមអ្វី ដែលយើងបានឃើញ វីដេអូភាគច្រើនមិនអាចជឿទុកចិត្តបានទេ ពីព្រោះអ្នកឯកទេសមកពីក្រសួងការពារជាតិ បានរកឃើញសញ្ញានៃការរៀបចំវីដេអូ និងការក្លែងបន្លំ»។
បេសកជនរបស់ខ្លួនប្រចាំអង្គការសហប្រជាជាតិ លោក Vasily Nebenzya បាននិយាយថា ប្រទេសរុស្ស៊ី នឹងបង្ហាញភស្តុតាងជាក់ស្តែង ទៅកាន់ក្រុមប្រឹក្សាសន្តិសុខនៅថ្ងៃ អង្គារ ដែលបង្ហាញថា កងកម្លាំងរបស់ខ្លួនមិនពាក់ព័ន្ធនឹងអំពើឃោរឃៅនោះទេ។
កាលពីល្ងាចថ្ងៃ អាទិត្យ លោក Vladimir Soloviev ដែលជាពិធីករទូរទស្សន៍កំពូលរបស់រុស្ស៊ី បានប្រាប់អ្នកស្តាប់រាប់លាននាក់ថា៖ «សង្រ្គាមប្រឆាំង នឹងពួកយើងបានឈានចូលដំណាក់កាលថ្មីមួយហើយ។ ពួកគេ កំពុងដឹកនាំយើងតាមសេណារីយ៉ូយូហ្គោស្លាវី។ ឆាប់ៗនេះ គេនឹងចោទប្រកាន់យើងពីបទប្រល័យពូជសាសន៍»។ លោក ក៏បានចោទប្រកាន់ជនជាតិអង់គ្លេសថា ជាអ្នកនៅពីក្រោយការបង្កហេតុនេះផងដែរ។
អគ្គរដ្ឋអាជ្ញារុស្ស៊ី ក៏បានបន្ថែមថា៖ «ការភូតកុហកដែលរីករាលដាល ដោយភាគីអ៊ុយក្រែន គឺជាការញុះញង់មួយផ្សេងទៀត ដែលជាការភូតកុហកដ៏ឃោរឃៅ និងមានគោលបំណងធ្វើឱ្យខូចកិត្តិយសដល់កងទ័ពរុស្ស៊ីនៅក្នុងលក្ខខណ្ឌនៃសង្គ្រាមព័ត៌មាន និងការឃោសនា ដែលបញ្ចេញដោយលោកខាងលិច»។
លោកបានបន្ថែមថា៖ «រាល់ការបង្កើត និងការផ្សព្វផ្សាយជាសាធារណៈនូវព័ត៌មានមិនពិត ដោយចេតនា ក្រោមការបង្ហាញពីរបាយការណ៍ ដែលអាចទុកចិត្តបាន នឹងត្រូវបានបង្កើតឡើងដោយក្រុមដដែលនេះ»។
ទោះយ៉ាងណាក្ដី កាលពីថ្ងៃ ច័ន្ទ រដ្ឋាភិបាល បាននិយាយថា ខ្លួននឹងចាប់ផ្តើមការស៊ើបអង្កេតលើព្រឹត្តិការណ៍នៅទីក្រុង Bucha មិនត្រឹមករណីចោទប្រកាន់ឧក្រិដ្ឋកម្មសង្រ្គាមលើមនុស្សជាង ២៨០ នាក់នោះទេ ប៉ុន្តែ ខ្លួនក៏នឹងស៊ើបនឹងករណីការចែកចាយព័ត៌មានក្លែងក្លាយ ដើម្បីបង្ខូចកិត្តិយសកងទ័ពរុស្ស៊ីផងដែរ។
ដំណើរការធ្វើកោសល្យវិច្ច័យនេះ នឹងចាំបាច់ ដើម្បីទប់ទល់នឹងការទទូចរបស់វិមានក្រឹមឡាំង ដែលថា កងកម្លាំងរបស់ខ្លួនមិនទទួលខុសត្រូវ ចំពោះការស្លាប់របស់ជនស៊ីវិល ហើយអំពើឃោរឃៅនេះត្រូវបានរៀបចំឡើង ឬប្រព្រឹត្តឡើងដោយកងកម្លាំងអ៊ុយក្រែន។
នៅក្នុងដំណើរទៅកាន់ទីតាំងដដែលនេះ លោក Zelensky បានបន្ថែមថា ការស៊ើបអង្កេត នឹងត្រូវធ្វើឡើង ដោយការិយាល័យអគ្គរដ្ឋអាជ្ញាអ៊ុយក្រែន។ លោក មានប្រសាសន៍ថា៖ «ខ្ញុំគិតថា យើងមានកម្លាំងគ្រប់គ្រាន់នៅទីនេះ ប៉ុន្តែប្រសិនបើយើងត្រូវការអ្នកជំនាញខ្លះ»។
អ្នកស្រី Iryna Venedyktova អគ្គរដ្ឋអាជ្ញានៃប្រទេសអ៊ុយក្រែន បាននិយាយថា សាកសពជនស៊ីវិលចំនួន ៤១០ នាក់ ត្រូវបានរកឃើញពីតំបន់ជុំវិញទីក្រុងគីវ កាលពីចុងសប្តាហ៍ ហើយ ១៤០ នាក់ ក្នុងចំណោមសាកសពទាំងនោះ ត្រូវបានពិនិត្យរួចហើយ ដោយព្រះរាជអាជ្ញាតាមរយៈការយកគំរូ DNA ពីអ្នកឯកទេស។
អ្នកស្រី បាននិយាយថា៖ «នៅលើទឹកដី ដែលត្រូវបានជម្រះនៃតំបន់គីវ គេឃើញមានភស្តុតាងសំខាន់ៗនៃឧក្រិដ្ឋកម្មសង្រ្គាមដ៏ឃោរឃៅរបស់រុស្ស៊ី»។
អាជ្ញាធរអ៊ុយក្រែន បាននិយាយថា បុគ្គលិក និងព្រះរាជអាជ្ញាជាតិជាង ៥០ នាក់ឥឡូវនេះបានចូលរួមក្នុងការស៊ើបអង្កេតនៅក្នុងតំបន់នៃទីក្រុងគីវ និង Chernihiv ដែលដណ្តើមបានមកវិញពីកងកម្លាំងរុស្ស៊ី។ ការិយាល័យអគ្គព្រះរាជអាជ្ញា បាននិយាយថា ខ្លួននឹងបង្កើនចំនួនប្រតិបត្តិការស៊ើបអង្កេត ដើម្បីធានាបាននូវការប្រមូលភស្តុតាងនៃឧក្រិដ្ឋកម្មសង្គ្រាមបានលឿន និងមានប្រសិទ្ធភាពខ្ពស់បំផុត។
ប្រភព៖ Reuters
