អាមេរិកនឹងបញ្ជូនកាំភ្លើងធំបន្ថែមទៀតទៅជួយអ៊ុយក្រែនទប់ទល់ការវាយប្រហាររបស់រុស្ស៊ី
សហរដ្ឋអាមេរិកនិយាយថា ខ្លួននឹងបញ្ជូនកាំភ្លើងធំបន្ថែមទៀតទៅអ៊ុយក្រែន ដើម្បីជួយទប់ទល់នឹងការបង្កើនការវាយលុកយោធាជាថ្មីរបស់រុស្ស៊ី ដែលបញ្ជូនទ័ពរាប់ពាន់នាក់ទៅភាគខាងត្បូង និងជាពិសេសតំបន់ភាគខាងកើតដុនបាស និងក្រុងខាកៀវ។
បញ្ចាក់ពីលើចម្លើយទៅអ្នកកាសែតរបស់លោកប្រធានាធិបតី ចូ បៃដិន កាលពីអង្គារ អ្នកនាំពាក្យមន្ទីរបញ្ចកោណ លោក ចន ឃឺរប៊ី (John Kirby) និយាយថា៖ «ប្រសិនបើប្រជាជនអ៊ុយក្រែន ចង់បានការគាំទ្រកាំភ្លើងធំបន្ថែមទៀត នោះយើងនឹងធ្វើអ្វីដែលយើងអាចធ្វើបាន ដើម្បីផ្តល់ការគាំទ្រ»។
មន្ត្រីការពារជាតិជាន់ខ្ពស់អាមេរិកម្នាក់និយាយជាអនាមិកកាលពីថ្ងៃអង្គារថា ជំនួយសព្វាវុធ ដែលជាផ្នែកមួយនៃកញ្ចប់អាវុធតម្លៃ ៨០០ លានដុល្លារ ដែលរដ្ឋបាលបៃដិនអនុម័តកាលពីសប្តាហ៍មុន រួមមានប្រព័ន្ធកាំភ្លើងធំ កាំភ្លើងធំ នាវាផ្ទុកពាសដែក និងឧទ្ធម្ភាគចក្រ នឹងបញ្ជូនទៅអ៊ុយក្រែន។
អ្នកស្រី ជេន សាគី (Jen Psaki) អ្នកនាំពាក្យសេតវិមាននិយាយថា លោក បៃដិន និងមេដឹកនាំបស្ចិមលោកដទៃទៀត រួមមានទាំងជប៉ុន មេដឹកនាំនៃក្រុមប្រឹក្សាអឺរ៉ុប ណាតូ និងគណៈកម្មការអឺរ៉ុប បានពិភាក្សាគ្នាកាលពីថ្ងៃអង្គារអំពីការបង្កើនការគាំទ្រផ្នែកយោធាដល់អ៊ុយក្រែន។
ការសន្យាផ្តល់អាវុធបន្ថែមទៀតធ្វើឡើងនៅពេលដែលប្រធានាធិបតីអ៊ុយក្រែនលោក វ៉ូឡូឌីមៀ ហ្សេឡេនស្គី (Volodymyr Zelensky) និយាយថា ជំនួយយោធាលោកខាងលិចខ្វះមិនអាចបំពេញតម្រូវការរបស់ប្រទេស។ សហរដ្ឋអាមេរិក សន្យាផ្តល់ជំនួយចំនួន ២,៥ ប៊ីលានដុល្លារដល់អ៊ុយក្រែនចាប់តាំងសង្រ្គាមផ្ទុះឡើងនៅចុងខែកុម្ភៈមក។
រុស្ស៊ី ដែលហៅជំនួយសព្វាវុធលោកខាងលិចថាអូសបន្លាយសង្គ្រាមឈ្លានពានរបស់ខ្លួន បញ្ជាក់កាលពីថ្ងៃអង្គារថា ខ្លួនចាប់ផ្តើមការវាយលុកនៅតំបន់ដុនបាស ដើម្បីរំដោះទាំងស្រុងនូវសាធារណរដ្ឋប៉ះបោរដុនណែតស៍ និងលូហានស្ក៍ ដែលខ្លួនគាំទ្រ។ លោក ហ្សេឡេនស្គី និយាយថា សមរភូមិដុនបាសបានចាប់ផ្តើមកាលពីថ្ងៃចន្ទ។
មន្រ្តីសន្តិសុខអ៊ុយក្រែននិយាយថា នាពេលនេះកងទ័ពរុស្ស៊ីកំពុងព្យាយាមទម្លុះទីតាំងរបស់អ៊ុយក្រែន «តាមខ្សែបន្ទាត់ជួរមុខស្ទើរតែទាំងមូលនៃតំបន់ដុនណែតស៍ និងលូហានស្ក៍ និងទីក្រុងខាកៀវ»។ មន្រ្តីសហរដ្ឋអាមេរិកនិយាយថា រុស្ស៊ីប្រមូលផ្ដុំទ័ពរាប់ពាន់នាក់នៅទាំងតំបន់ភាគខាងត្បូង និងភាគខាងកើត ហើយប្រសិនបើរុស្ស៊ីអាចយកឈ្នះនៅតំបន់ Mariupol នោះវានឹងអាចដោះលែងទាហានដែលអ៊ុយក្រែនចាប់បានរាប់ពាន់នាក់ទៀត ដើម្បីប្រយុទ្ធនៅតំបន់ដុនបាសទាំងមូល។
ទោះបីមេដឹកនាំរុស្ស៊ី លោក វ្ល៉ាឌីមៀ ពូទីន អះអាងថា គោលបំណងនៃការលុកលុយ គឺដណ្តើមយកតំបន់ដុនបាសក្ដី មន្ត្រីអ៊ុយក្រែនបារម្ភថា ការវាយលុកនេះអាចឈានទៅដល់ការប៉ុនប៉ងដណ្តើមយកទឹកដីក្នុងប្រទេសផ្សេងទៀត។ គិតត្រឹមថ្ងៃអង្គារ រុស្ស៊ីបានចូលកាន់កាប់ក្រុង Kreminna ក្នុងតំបន់ភាគខាងកើត ដែលមានប្រជាជនរស់នៅជាង ១៨ ០០០ នាក់ បន្ទាប់ពីកងទ័ពអ៊ុយក្រែនបានដកខ្លួនចេញ។
ប្រភព៖ FT