លោក ម៉ាក្រុង វាយប្រហារគូប្រជែងអ្នកស្រី ឡឺប៉ែន ចំពោះទំនាក់ទំនងនឹងរុស្ស៊ី និងការប្ដេជ្ញាបិទហ៊ីចាបរបស់មូស្លីម
ប្រធានាធិបតីបារាំងលោក អេម៉ាណូអែល ម៉ាក្រុង (Emmanuel Macron) បានវាយប្រហារគូប្រជែងរបស់ខ្លួន អ្នកស្រី ម៉ារីន ឡឺប៉ែន ដែលជាបេក្ខជនស្ដាំនិយម ក្នុងការជជែកដេញដោលតាមទូរទស្សន៍កាលពីថ្ងៃពុធ លើទំនាក់ទំនងរបស់អ្នកស្រីជាមួយរុស្ស៊ី និងការប្ដេជ្ញាហាមឃាត់ការពាក់ហ៊ីចាបរបស់ស្រ្តីមូស្លីមនៅទីសាធារណៈ។
ការវាយប្រហារខ្លាំងៗបែបនេះ ធ្វើឡើងទល់មុខគ្នា ដើម្បីទាក់ទាញសម្លេងគាំទ្រ ខណៈការបោះឆ្នោតប្រធានាធិបតីជុំចុងក្រោយ នឹងប្រព្រឹត្តទៅនាថ្ងៃអាទិត្យខាងមុខនេះ។
លោក ម៉ាក្រុង និយាយថា ផែនការហាមឃាត់ស្រ្តីមូស្លីមមិនឱ្យពាក់ហ៊ីចាបនៅទីសាធារណៈរបស់អ្នកស្រី ឡឺប៉ែន ដែលជាអ្នកប្រឆាំងអន្តោប្រវេសន៍ នឹងបង្កឱ្យមាន «សង្គ្រាមស៊ីវិល» នៅបារាំង ដែលជាប្រទេសមានម៉ូស្លីមច្រើនជាងគេនៅអឺរ៉ុបខាងលិច។ ប៉ុន្តែអ្នកស្រី ឡឺប៉ែន និយាយថា លោក ម៉ាក្រុង ធ្វើឱ្យសង្គមបារាំងមានការបែងចែកជាខ្លាំង ដោយលើកឡើងពីបាតុកម្មប្រឆាំងនឹងនយោបាយសេដ្ឋកិច្ចរបស់លោកមុនកូវីដ-១៩ ជាដើម។
លើសពីនេះ លោក ម៉ាក្រុង លើកឡើងពីប្រាក់កម្ចី ដែលគណបក្សអ្នកស្រី ឡឺប៉ែន ខ្ចីចំនួន ៩,៨ លានដុល្លារពីធនាគារឆេក-រុស្ស៊ី First Czech-Russian Bank ក្នុងឆ្នាំ ២០១៤ ដែលនឹងធ្វើឱ្យអ្នកស្រីពិបាកក្នុងការដោះស្រាយជាមួយរុស្ស៊ី។ លោក ម៉ាក្រុង ប្រកែកថា បំណុលនឹងក្លាយជាចំណងរបស់អ្នកស្រីជាមួយមេដឹកនាំរុស្ស៊ីលោក វ៉្លាឌីមៀ ពូទីន ប្រសិនបើអ្នកស្រីឈ្នះការបោះឆ្នោត។
លោក ម៉ាក្រុង និយាយថា៖ «អ្នកមិនអាចការពារផលប្រយោជន៍បារាំងត្រឹមត្រូវលើប្រធានបទនេះទេ ព្រោះផលប្រយោជន៍របស់អ្នកមានទំនាក់ទំនងជាមួយមនុស្សជិតស្និទ្ធនឹងមហាអំណាចរុស្ស៊ី»។ លោកបន្តថា៖ «អ្នកពឹងផ្អែកលើអំណាចរបស់រុស្ស៊ី ហើយពឹងផ្អែកលើលោកពូទីន»។
ឆ្លើយតបនឹងការវាយប្រហារបែបនេះ អ្នកស្រី ឡឺបែន និយាយថា អ្នកស្រីមានសេរីភាពទាំងស្រុង ហើយនិយាយថា លោក ម៉ាក្រុង «ដឹងយ៉ាងច្បាស់ថាអ្វីដែលលោកនិយាយគឺមិនពិត»។ អ្នកស្រីបន្តថា គណបក្សរបស់អ្នកស្រីកំពុងសងប្រាក់កម្ចីនោះ ហើយហៅលោក ម៉ាក្រុង ថា «មិនស្មោះត្រង់» ចំពោះការលើកឡើងពីបញ្ហានេះ ខណៈអ្នកស្រីផ្ដោតលើបញ្ហាតម្លៃនៃការរស់នៅ ដែលប្រជាជនបារាំងកំពុងប្រឈមមុខខ្លាំង។
យ៉ាងណាមិញ ប៉ុន្មានម៉ោងមុនការជជែកដេញដោលកាលពីថ្ងៃពុធ មេដឹកនាំបក្សប្រឆាំងរុស្ស៊ី ដែលកំពុងជាប់ពន្ធនាគារលោក Alexei Navalny បានលើកឡើងពីបញ្ហាប្រាក់កម្ចី ដោយថា ធនាគារ First Czech-Russian Bank ជាប់ទាក់ទងនឹងលោក ពូទីន ហើយជា «ភ្នាក់ងារលាងលុយដ៏ល្បីមួយ» ប៉ុន្តែមិនបានបង្ហាញភស្តុតាងនោះទេ។ លោក Navalny និយាយថា ប្រាក់កម្ចីនឹងធ្វើឱ្យបារាំងគ្រោះថ្នាក់ ប្រសិនបើអ្នកស្រី ឡឺប៉ែន ឈ្នះឆ្នោត។
ការស្ទង់មតិនានាបង្ហាញថា សម្លេងគាំទ្រ លោក ម៉ាក្រុង ដែលជាអ្នកកណ្ដាលនិយម និយមអឺរ៉ុប កំពុងកើនឡើង។ យ៉ាងណាមិញ លទ្ធផលបោះឆ្នោតនៅថ្ងៃអាទិត្យ ត្រូវបានគេរំពឹងថា នឹងមានការប្រកៀកប្រកើយគ្នា ជាងអាណត្តិមុន។ បេក្ខជនទាំង២ត្រូវតែពង្រីកសម្លេងរបស់ខ្លួន ខណៈពលរដ្ឋបារាំងជាច្រើន ជាពិសេសពួកឆ្វេងនិយម នៅតែមិនប្រកដថាទៅបោះឆ្នោតឬអត់។
ប្រភព៖ AP News
