សហភាពអឺរ៉ុប បានស្នើសុំការបញ្ជូនក្រុមចូលរួមសង្កេតការណ៍ឃ្លាំមើលការបោះឆ្នោតឃុំ សង្កាត់នាពេលខាងមុខនេះ ប៉ុន្តែមិនមែនជាភ្នាក់ងារសង្កេតការណ៍បោះឆ្នោតជាផ្លូវការនោះ ទេ។

មន្ត្រីគជបបានថ្លែងថាសំណើនេះ បានលើកឡើងដោយឯកអគ្គរដ្ឋទូតសហភាពអឺរុប ប្រចាំនៅកម្ពុជាលោកស្រី ខាមិន ម៉ូរេណូ ក្នុងពេលជួបពិភាក្សាជាមួយនឹងប្រធានគជប លោក ប្រាជ្ញ ច័ន្ទ នៅថ្ងៃទី១៧ឧសភានេះ។

យោងតាមសំណើនោះ គឺមន្ត្រីជាអ្នកសង្កេតការណ៍នោះ គ្រាន់តែជាអ្នកចូលរួមសង្កេតពិនិត្យមើលការបោះឆ្នោតជាទូទៅ ដោយនឹងមិនធ្វើរបាយការណ៍វាយតម្លៃអំពីបរិយាកាស នៃដំណើរការរៀបចំការបោះឆ្នោតឡើយ។

អគ្គលេខាធិការ គ.ជ.ប លោក ទេព នីថា បានលើកឡើងក្នុងពេលនោះថា កិច្ចការនេះ គ.ជ.ប ធ្លាប់បានអនុវត្តរួចមកហើយ គឺ គ.ជ.ប ចេញលិខិតជូនជាភ្ញៀវពិសេស ដែលមិនមែនជាអ្នក សង្កេតការណ៍នោះទេ។

ក្នុងកិច្ចពិភាក្សានោះ, ប្រធានគជប បានរៀបរាប់ជុំវិញស្ថានការណ៍នានាទាក់ទងនឹងដំណើរ ការបោះឆ្នោតដែលនឹងមកដល់នៅថ្ងៃទី៥មិថុនាខាងមុខនេះហើយ។