ក្នុងការប្រថុយប្រថានដ៏ធំមួយ ចក្រភពអង់គ្លេសនិយាយថាពួកគេអាចបោះបង់ចោលច្បាប់ពាណិជ្ជកម្មអៀរឡង់ខាងជើង
កាលពីអង្គារ ទី១៧ ឧសភាចក្រភពអង់គ្លេសបានធ្វើការជូនដំណឹងថាខ្លួនអាចនឹងលុបចោលជាឯកតោភាគីនូវបទប្បញ្ញត្តិមួយចំនួននៃច្បាប់គ្រប់គ្រងការធ្វើពាណិជ្ជកម្មនៅអៀរឡង់ខាងជើង ក្នុងសកម្មភាពប្រថុយប្រថានមួយ ដែលនឹងធ្វើឱ្យមានការប្រឈមមុខដាក់គ្នាជាមួយសហភាពអឺរ៉ុប ហើយអាចបង្កសង្គ្រាមពាណិជ្ជកម្ម ១៨ ខែក្រោយពីការចុះកិច្ចព្រមព្រៀងដើម្បីកម្ចាត់ភាពតានតឹង Brexit។
ក្រោមសេចក្ដីព្រាងច្បាប់មួយ ដែលបង្ហាញដោយរដ្ឋមន្ត្រីក្រសួងការបរទេសលោកស្រីលីស ត្រាស់ រដ្ឋាភិបាលអង់គ្លេសអាចបោះបង់ចោលបទប្បញ្ញត្តិមួយចំនួន ដែលត្រូវបានចរចាដោយលំបាកជាមួយសហភាពអឺរ៉ុប ដូចជាការត្រួតពិនិត្យនៅព្រំដែនលើទំនិញដែលដឹកជញ្ជូនពីអង់គ្លេសទៅកាន់អៀរឡង់ខាងជើង។
ការប្រកាសនេះបានទាក់ទាញការរិះគន់យ៉ាងរហ័ស និងយ៉ាងខ្លាំងពីសហភាពអឺរ៉ុប ដែលនិយាយថាពួកគេនឹងឆ្លើយតប «ជាមួយនឹងវិធានការទាំងអស់ដែលខ្លួនមាន»។ ការព្រមានបែបនេះមានភាពមិនច្បាស់លាស់ ប៉ុន្តែគួរព្រួយបារម្ភ ដោយសារពួកគេអាចចាត់វិធានការតឹងរ៉ឹង ដែលនឹងឈានដល់សង្គ្រាមពាណិជ្ជកម្មជាមួយនឹងអង់គ្លេស។
បើទោះជាយ៉ាងនេះក៏ដោយ លោកស្រីត្រាស់ អះអាងថាលោកស្រីចង់ធ្វើការកែប្រែបទប្បញ្ញត្តិទាំងនេះ មិនមែនលុបវាចោលទាំងស្រុងទេ ហើយលោកស្រីនិយាយថាបញ្ហាតានតឹងបំផុតអាចដោះស្រាយដោយការចរចា ជាជាងសកម្មភាពឯកតោភាគីនិយម។
ប៉ុន្តែលោកស្រីបានរិះគន់បទប្បញ្ញត្តិទាំងនេះថាបានបង្អាក់ពាណិជ្ជកម្មរវាងអង់គ្លេស និងអៀរឡង់ខាងជើង និងធ្វើឱ្យមានអស្ថិរភាពក្នុងកិច្ចព្រមព្រៀងចែករំលែកអំណាចដ៏ផុយស្រួយ ដែលបានរក្សាសន្តិភាពនៅទឹកដីនេះក្នុងរយៈពេលជិត ២៥ ឆ្នាំ៕
ប្រភព៖ New York Times
