រុស្ស៊ីត្រូវបានគេរាយការណ៍ថាបានបញ្ជូនមីស៊ីលមានសមត្ថភាពនុយក្លេអ៊ែរ ទៅជិតព្រំដែនហ្វាំងឡង់
មានការរាយការណ៍ថារុស្ស៊ីបានចាប់ផ្ដើមបញ្ជូនមីស៊ីល ដែលអាចបញ្ជូនក្បាលគ្រាប់នុយក្លេអ៊ែរ ទៅជិតព្រំដែនជាមួយប្រទេសហ្វាំងឡង់ ខណៈពេលដែលភាពតានតឹងកើនឡើងដល់កម្រិតខ្ពស់ បន្ទាប់ពីប្រទេសនេះប្រកាសចង់ចូលជាសមាជិកអង្គការណាតូ។
ក្នុងវីដេអូមួយ បង្ហោះលើបណ្ដាញសង្គម និងវិភាគដោយសារព័ត៌មាន Reuters បានបង្ហាញរថយន្តយោធារុស្ស៊ីជាច្រើនគ្រឿងកំពុងធ្វើដំណើរនៅផ្លូវមួយនៃក្រុងវាយបឺកជិតព្រំដែនជាមួយហ្វាំងឡង់ ដោយក្នុងនោះមានរថយន្តចំនួន ៧ ដែលមានលក្ខណៈដូចរថយន្តដឹកជញ្ជូនមីស៊ីលប្រភេទ Iskander។
មីស៊ីលប្រភេទរយៈចម្ងាយខ្លីនេះត្រូវបានគេដឹងថាមានសមត្ថភាពបាញ់ក្បាលគ្រាប់នុយក្លេអ៊ែរ ហើយត្រូវបានអាមេរិកចាត់ទុកថាជាការគំរាមកំហែងដ៏ធំមួយនៅអឺរ៉ុប។
យ៉ាងណាមិញវីដេអូនេះបានផុសឡើង បន្ទាប់ពីអនុប្រធានក្រុមប្រឹក្សាសន្តិសុខរុស្ស៊ី និងអតីតប្រធានាធិបតីរុស្ស៊ីលោកឌីមីទ្រី មេដវេដេវបានព្រមានថាប្រសិនបើហ្វាំងឡង់ចូលជាសមាជិកអង្គការណាតូ រុស្ស៊ីនឹងឆ្លើយតបដោយការដាក់ពង្រាយអាវុធនុយក្លេអ៊ែរ និងមីស៊ីលលឿនជាងសំឡេង។
លោកមេដវេដេវនិយាយថាការចូលជាសមាជិកនេះនឹងបញ្ចប់ «ស្ថានភាពគ្មាននុយក្លេអ៊ែររបស់តំបន់បាល់តិក»៕
ប្រភព៖ New York Post
