មេបញ្ជាការកងទ័ពជើងគោកកម្ពុជាជួបមន្ត្រីគោលនយោបាយការពារជាតិអាមេរិក (Video Inside)
មេបញ្ជាការកងទ័ពជើងគោកកម្ពុជា លោកឧត្តមសេនីយ៍ឯក ហ៊ុន ម៉ាណែត បានជួបពិភាក្សា ជាមួយមន្ត្រីអាមេរិកគ្រប់គ្រងការិយាល័យគោលនយោបាយអាស៊ីអាគ្នេយ៍ នៃក្រសួងការពារ ជាតិអាមេរិក។
ជំនួបរវាងមេបញ្ជាការកងទ័ពជើងគោកកម្ពុជាជាមួយនឹងលោកស្រីឡូរី អាបែល Lori Abele នាយកគោលនយោបាយអាស៊ីអាគ្នេយ៍នៃក្រសួងការពារជាតិអាមេរិក បានធ្វើឡើង នារសៀល ថ្ងៃទី ១៨ ខែឧសភា ឆ្នាំ២០២២។
មន្ត្រីបញ្ជាការដ្ឋានកងទ័ពជើងគោក បានថ្លែងថា ភាគីទាំងពីរ បានពិភាក្សាគ្នាជុំវិញកិច្ចសហប្រតិបត្តិការមួយចំនួន និងជាពិសេស កិច្ចសហប្រតិបត្តិការយោធារវាងកងទ័ពនៃប្រទេសទាំងពីរ។
ភាគីទាំងពីរបានវាយតម្លៃខ្ពស់ លើកិច្ចសហប្រតិបត្តិការដែលមានកន្លងមក និងបានបង្ហាញឆន្ទ:ក្នុងការរក្សាពង្រឹង និងពង្រីក កិច្ចសហប្រតិបត្តិការយោធាបន្ថែមទៀត នៅពេលខាងមុខ និងការបន្តបង្កើនភាពជឿទុកចិត្ត រវាងកងទ័ព នៃប្រទេសទាំងពីរកម្ពុជា និងសហរដ្ឋអាមេរិក។
លោកឧត្តមសេនីយ៍ឯក ហ៊ុន ម៉ាណែត បានថ្លែងអំណរគុណ រដ្ឋាភិបាល ក្រសួងការពារជាតិ សហរដ្ឋអាមេរិក ដែលបានជួយឧបត្ថម្ភ និងបណ្តុះបណ្តាល ដល់កងទ័ពកម្ពុជាកន្លង មក។ លោកស្រី ឡូរី អាបែល Lori Abele បានថ្លែងអំណរគុណដល់ប្រទេសកម្ពុជា ដែលបានចូលរួម ជាមួយសហរដ្ឋអាមេរិក ក្នុងកិច្ចការសន្តិសុខកន្លងមកផងដែរ។