សេអ៊ូល៖ កូរ៉េខាងជើង នៅថ្ងៃពុធនេះ បានធ្វើតេស្តបាញ់មីស៊ីលផ្លោងចំនួនបីគ្រាប់ ចេញពីតំបន់ឆ្នេរ ភាគខាងកើតរបស់ខ្លួន។ នេះបើតាមនាយសេនាធិការកងទ័ពចម្រុះកូរ៉េខាងត្បូង។

នាយសេនាធិការកងទ័ពចម្រុះកូរ៉េខាងត្បូងបន្ថែមថា មីស៊ីលផ្លោងទាំងបីគ្រាប់ខាងលើនេះ ត្រូវបាន កូរ៉េខាងជើងបានចេញពីតំបន់ Sunan នៃភាគជើងរដ្ឋធានីព្យុងយ៉ាង នៅចន្លោះម៉ោង ៦:០០នាទី ទៅ ៦:៣៧នាទីព្រឹកថ្ងៃពុធនេះ (ម៉ោងក្នុងតំបន់) ដែលជាការធ្វើតេស្តលើកទី១៧ នៅក្នុងឆ្នាំនេះ។

បើតាមការិយាល័យប្រធានាធិបតីកូរ៉េខាងត្បូង លោក យូន សុកយ៉ុល បានធ្វើជាអធិបតីក្នុងកិច្ចប្រជុំ ក្រុមប្រឹក្សាសន្តិសុខជាតិ (NSC) ជុំវិញការបាញ់សាកល្បងមីស៊ីលផ្លោងរបស់កូរ៉េខាងជើង ជាថ្មី នេះ។

អ្វីដែលគួរឱ្យកត់សម្គាល់នោះ ការបាញ់សាកល្បងមីស៊ីលផ្លោងចំនួន ៣គ្រាប់របស់កូរ៉េខាងជើង ខាងលើនេះ បានកើតមានឡើងតែប៉ុន្មានម៉ោងប៉ុណ្ណោះ បន្ទាប់ពីប្រធានាធិបតីអាមេរិកលោក ចូ បៃដិន ធ្វើដំណើរចាកចេញពីតំបន់អាស៊ី ក្រោយបញ្ចប់ទស្សនកិច្ចនៅកូរ៉េខាងត្បូង និងជប៉ុន៕ ប្រភព៖ ស៊ីនហួរ ប្រែសម្រួល៖ ទីណា និងបុត្រា