គ្រួសារក្រីក្រ និងពលរដ្ឋងាយរងគ្រោះក្នុង អំឡុងពេលប្រយុទ្ធនឹងកូវីដ-១៩ បានទទួលប្រាក់ឧបត្ថម្ភជុំទី៩ លើកទី១ និងការបើកសាច់ប្រាក់ ជុំទី៩ លើកទី២
ភ្នំពេញ៖ ក្រសួងសង្គមកិច្ច អតីតយុទ្ធជន និងយុវនីតិសម្បទា បានជូនដំណឹងស្តីពី លទ្ធផលនៃ ការអនុវត្តកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុង អំឡុងពេលប្រយុទ្ធ នឹងកូវីដ-១៩ សម្រាប់ជុំទី៩ លើកទី១ និងការបើកសាច់ប្រាក់ ជុំទី៩ លើកទី២។
យោងតាមសេចក្តីជូនដំណឹងនៅថ្ងៃទី ២៤ ខែ ឧសភាឆ្នាំ ២០២២របស់ក្រសួងសង្គមកិច្ចបាន បញ្ជាក់ថា សម្តេចតេជោ ហ៊ុន សែននាយករដ្ឋមន្ត្រីកម្ពុជានាកន្លងមកបានប្រកាសដាក់ ឱ្យអនុវត្ត ជាផ្លូវការនូវកម្មវិធីឧបត្ថម្ភសាច់ ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធ នឹងជំងឺកូវីដ-១៩ ហើយក្រសួងសង្គមកិច្ច អតីតយុទ្ធជន និងយុវនីតិសម្បទា ក៏បានចាប់ផ្តើម ដំណើរការអនុវត្តកម្មវិធីនៅថ្ងៃទី២៥ ខែមិថុនា ឆ្នាំ២០២០ មកដល់បច្ចុប្បន្នបានចំនួន ៩ជុំ មាន ២៣លើក រួចមកហើយ ។
ក្រសួងសង្គមកិច្ច បានបញ្ជាក់បន្ថែមថាបើសរុបការចំណាយលើការអនុវត្តកម្មវិធីចាប់ពីថ្ងៃទី២៥ ខែមិថុនា ឆ្នាំ២០២០ ដល់ថ្ងៃទី២៤ ខែឧសភា ឆ្នាំ២០២២ (២៣លើក) អស់ថវិការដ្ឋចំនួន ២,៧៣៤,៥៦១,០៣៩,០០០ (ពីរពាន់ប្រាំពីររយសាមសិបបួនប៊ីលាន ប្រាំរយហុកសិបមួយលាន សាមសិបប្រាំបួនពាន់រៀលគត់) ស្មើនឹង ៦៨៣.៦៤លានដុល្លារអាមេរិក។ ព្រមជាមួយគ្នា នេះផងដែរ សម្រាប់ការបើកផ្តល់ប្រាក់ឧបត្ថម្ភជុំទី៩ លើកទី២ នឹងចាប់ផ្តើមពីថ្ងៃទី២៥ខែឧសភា ឆ្នាំ២០២២ រហូតដល់ថ្ងៃទី២៤ខែមិថុនា ឆ្នាំ២០២២ មានរយៈពេល ៣០ថ្ងៃ ៕ដោយ៖ម៉ាដេប៉ូ