អ៊ីរ៉ង់ និងវ៉េណេស៊ុយអេឡា ចាប់ដៃគ្នាធ្វើសហប្រតិបត្តិការរយៈពេល ២០ ឆ្នាំ ក្រោយរងទណ្ឌកម្មអាមេរិក
ប្រទេសអ៊ីរ៉ង់ និងវ៉េណេស៊ុយអេឡា បានចុះហត្ថលេខាលើកិច្ចព្រមព្រៀងរយៈពេល ២០ ឆ្នាំលើកិច្ចសហប្រតិបត្តិការរវាងប្រទេសសម្ព័ន្ធមិត្តទាំង ២ ដែលសុទ្ធតែជាប្រទេសទទួលរងទណ្ឌកម្មពីសហរដ្ឋអាមេរិក ក្នុងអំឡុងពេលដំណើរទស្សនកិច្ចប្រធានាធិបតីវេណេស៊ុយអេឡាលោក Nicolas Maduro កាលពីថ្ងៃ សៅរ៍ ទៅកាន់សាធារណរដ្ឋអ៊ីស្លាម។
ប្រធានាធិបតីអ៊ីរ៉ង់ លោក Ebrahim Raisi បាននិយាយថា ការចុះហត្ថលេខាលើកិច្ចព្រមព្រៀងនេះ បង្ហាញពីការប្តេជ្ញាចិត្តរបស់មន្ត្រីជាន់ខ្ពស់នៃប្រទេសទាំង ២ លើការអភិវឌ្ឍទំនាក់ទំនងក្នុងវិស័យផ្សេងៗគ្នា។
លោក Maduro បាននិយាយនៅក្នុងសន្និសីទសារព័ត៌មាន រួមគ្នាក្នុងទីក្រុង Tehran បាននិយាយថា កិច្ចសហប្រតិបត្តិការនេះគ្របដណ្តប់លើវិស័យថាមពល និងហិរញ្ញវត្ថុ ក៏ដូចជា ធ្វើការរួមគ្នាលើគម្រោងការពារជាតិ។
លោក Maduro ក៏បានជួបជាមួយមេដឹកនាំកំពូលរបស់អ៊ីរ៉ង់ Ayatollah Ali Khamenei ដែលបាននិយាយថា ការតស៊ូ គឺជាវិធី ដើម្បីប្រឈមមុខនឹងសម្ពាធរបស់សហរដ្ឋអាមេរិក។
លោក Khamenei បាននិយាយថា ការសន្និដ្ឋាន ដែលអាចទាញបានពីកិច្ចសហប្រត្តិបត្តិការរបស់ប្រទេសទាំង ២ អ៊ីរ៉ង់ និងវេណេហ្ស៊ុយអេឡា គឺថាវិធីតែមួយគត់ប្រឆាំងនឹងទណ្ឌកម្មអាមេរិកគឺ ត្រូវឈរ និងទប់ទល់។
លោក Khamenei បានស្វាគមន៍កិច្ចព្រមព្រៀងនេះ ហើយបានអំពាវនាវឱ្យមានកិច្ចសហប្រតិបត្តិការកាន់តែខ្លាំងរវាងទីក្រុង Tehran និង Caracas។ នេះបើយោងតាមសេចក្តីថ្លែងការណ៍នៅលើគេហទំព័រផ្លូវការរបស់គាត់។
ប្រភព៖ France24