កូរ៉េខាងត្បូងប្រាប់អន្តរជាតិថាខ្លួននឹងបង្កើនសមត្ថភាពឆ្លើយតបនុយក្លេអ៊ែររបស់កូរ៉េខាងជើង និងបង្កើនទំនាក់ទំនងសន្តិសុខអាស៊ាន
ប្រឈមការគំរាមកំហែងផ្នែកសន្តិសុខកាន់តែខ្លាំងឡើងៗពីសំណាក់ប្រទេសកូរ៉េខាងជើង ដែលជាប្រទេសបងប្អូនគូសត្រូវញែកជាពីរដោយការប្រកាន់របបនយោបាយកុម្មុយនីស និងសេរី ប្រទេសកូរ៉េខាងត្បូងដែលប្រកាន់របបដឹកនាំប្រទេសតាមបែបលទ្ធិប្រជាធិបតេយ្យ បានអះអាងប្រាប់សហគមន៍អន្តរជាតិ ពីការបង្កើនសមត្ថភាពឆ្លើយតបឲ្យបានខ្លាំងក្លាចំពោះការធ្វើតេស្តអាវុធរបស់កូរ៉េខាងជើង។
ក្នុងអំឡុងសម័យប្រជុំកំពូលរបស់រដ្ឋមន្ត្រីការពារជាតិតំបន់អាស៊ី-ប៉ាស៊ីហ្វិក នៅប្រទេសសិង្ហបុរីដែលបានបិទបញ្ចប់កាលពីថ្ងៃអាទិត្យ១២មិថុនា លោក លី ជុងស៊ុប (Lee Jong-sup) រដ្ឋមន្ត្រីការពារជាតិកូរ៉េខាងត្បូង បាននិយាយថា កូរ៉េខាងត្បូងគ្រោងនឹងបង្កើនសមត្ថភាពឆ្លើយតបឲ្យបានខ្លាំងក្លា ដើម្បីរារាំងការសាកល្បងនុយក្លេអ៊ែរ និងមីស៊ីលរបស់កូរ៉េខាងជើង ខណៈកូរ៉េខាងត្បូងដើរតួនាទីជា«រដ្ឋស្នូលសកល» នៅក្នុងទិដ្ឋភាពសន្តិសុខរបស់អាស៊ី។
តាមការចុះផ្សាយរបស់បណ្តាញសារព័ត៌មានល្បីឈ្មោះ The Straitstimes របស់សិង្ហបុរី លោក លោក បាននិយាយក្នុងកិច្ចពិភាក្សានៅក្នុងកិច្ចប្រជុំនោះថា «ការគំរាមកំហែងនុយក្លេអ៊ែរ និងកាំជ្រួចរបស់កូរ៉េខាងជើង បានក្លាយជាការគំរាមកំហែងដ៏សាមញ្ញមួយ ចាប់ពីរយៈចម្ងាយខ្លី រហូតដល់កាំជ្រួចអន្តរទ្វីប។ ការធ្វើតេស្តម៉ីស៊ីលម្តងហើយម្តងទៀតរបស់កូរ៉េខាងជើងកំពុងធ្វើឲ្យមានទំនើបកម្មទាំងបរិមាណនិងគុណភាព»។
ប្រមុខការពារប្រទេសកូរ៉េខាងត្បូងរូបនេះ បានពិពណ៌នា អំពីភាពតានតឹងកើតមាននៅលើឧបទ្វីបកូរ៉េថា «ខ្ពស់ជាងកន្លែងផ្សេងទៀតនៅក្នុងពិភពលោក» ដោយបានអះអាងថា៖«រដ្ឋាភិបាលរបស់យើង…នឹងបង្កើនសមត្ថភាពឆ្លើយតបឲ្យខ្លាំងក្លា ចំពោះយោធាសាធារណៈរដ្ឋកូរ៉េ ដើម្បីបង្អាក់ការគំរាមកំហែងនុយក្លេរអ៊ែរនិងម៉ីស៊ីលរបស់កូរ៉េខាងជើង»។
បណ្តាញព័ត៌មាន CNN របស់អាមេរិកកាលពីថ្ងៃចន្ទកន្លងទៅ បានផ្សាយថា អាមេរិកនិងកូរ៉េខាងត្បូងរួមគ្នា បានបាញ់បង្ហោះមីស៊ីល៨គ្រាប់ ដោយ១គ្រាប់បាញ់ដោយយោធាអាមេរិក និង៧គ្រាប់ផ្សេងទៀតបាញ់ដោយយោធាកូរ៉េខាងត្បូង ចូលទៅកាន់សមុទ្រនៅភាគខាងកើតឧបទ្វីបកូរ៉េ ដើម្បីបញ្ជាក់ប្រាប់កូរ៉េខាងជើងថា ប្រសិនបើកូរ៉េខាងជើងបង្កហេតុអ្វីមួយ មីស៊ីលនឹងត្រូវបាញ់ចេញពីច្រើនទីតាំងផ្សេងគ្នា ដែលគ្រប់គ្រងដោយអាមេរិកនិងកូរ៉េខាងត្បូង។
កាលពីថ្ងៃអាទិត្យកន្លងមក CNN បានបន្តថា កូរ៉េខាងជើងបានបាញ់មីស៊ីលផ្លោងរយៈចម្ងាយខ្លីចំនួន៨គ្រាប់ពីទីតាំងជាច្រើនក្នុងប្រទេស ចូលទៅក្នុងដែនទឹកភាគខាងកើតនៃឧបទ្វីបកូរ៉េ។
អគ្គសេនាធិការចម្រុះនៃប្រទេសកូរ៉េខាងត្បូងបានហៅសកម្មភាពបាញ់មីស៊ីលនេះថាជា «ការបង្កហេតុដ៏ធ្ងន់ធ្ងរដែលបំផ្លាញសន្តិភាព និងស្ថិរភាពមិនត្រឹមតែប៉ុណ្ណោះទេ។ ឧបទ្វីបកូរ៉េ ប៉ុន្តែក៏សហគមន៍អន្តរជាតិផងដែរ»។
អ្នកជំនាញយោធា បានលើកឡើងថា ការបាញ់មីស៊ីលដើម្បីកំញើញគ្នានេះគឺនៅចំពេលមានការព្រួយបារម្ភកាន់តែខ្លាំងឡើងថា «ទីក្រុងព្យុងយ៉ាងកំពុងរៀបចំការសាកល្បងនុយក្លេអ៊ែរ»។
ទីភ្នាក់ងារព័ត៌មានរដ្ឋកូរ៉េខាងជើង KCNA បានដកស្រង់សម្តីមេដឹកនាំកូរ៉េខាងជើង លោក គីម ជុងអ៊ុន ដូចដែលបានប្រាប់គណបក្សនយោបាយរបស់គាត់ ដោយនិយាយថា លោកនឹងប្រើ «អំណាចដើម្បីអំណាច (Power for power)» ដើម្បីប្រយុទ្ធប្រឆាំងនឹងការគំរាមកំហែងដល់អធិបតេយ្យភាពរបស់ប្រទេសកូរ៉េខាងជើង។
បណ្តាញសារព័ត៌មាន VOA ជាភាសាអង់គ្លេសបានផ្សាយថា ការសាកល្បង កាំភ្លើងធំរបស់កូរ៉េខាងជើងទាក់ទាញការយកចិត្តទុកដាក់ពីខាងក្រៅតិចជាងការបាញ់មីស៊ីលរបស់ប្រទេសនេះ ប៉ុន្តែកាំភ្លើងធំរយៈចម្ងាយឆ្ងាយដែលដាក់ពង្រាយទៅមុខគឺជាការគំរាមកំហែងសន្តិសុខយ៉ាងធ្ងន់ធ្ងរដល់តំបន់ទីប្រជុំជនដែលមានប្រជាជនកូរ៉េខាងត្បូងដែលមានចម្ងាយត្រឹមតែ៤០-៥០គីឡូម៉ែត្រពីព្រំដែនជាមួយកូរ៉េខាងជើង។
បើតាម VOA មន្ត្រីកូរ៉េខាងត្បូង និងសហរដ្ឋអាមេរិក នាពេលថ្មីៗនេះ បាននិយាយថា ប្រទេសកូរ៉េខាងជើង ស្ទើរតែបានបញ្ចប់ការត្រៀមលក្ខណៈសម្រាប់ការសាកល្បងនុយក្លេអ៊ែរជាលើកដំបូងរបស់ខ្លួនក្នុងរយៈពេលប្រហែល៥ឆ្នាំ។ កាលពីខែមីនា ប្រទេសកូរ៉េខាងជើងបានបាញ់សាកល្បងមីស៊ីលផ្លោងអន្តរទ្វីបដែលមានសមត្ថភាពបាញ់ដល់ទឹកដីសហរដ្ឋអាមេរិក ដោយបំពានលើការផ្អាកការសាកល្បងមីស៊ីលដែលបានធ្វើឡើងកាលពីឆ្នាំ២០១៨។
រដ្ឋមន្ត្រីការពារជាតិកូរ៉េខាងត្បូងដែលបានចូលកាន់តួនាទីនយោបាយកាលពីមួយខែមុន បាននិយាយថា រដ្ឋាភិបាលថ្មីរបស់ប្រធានាធិបតី យ៉ូន ស៊ុក យ៉ូល (Yoon Suk-yeol) នឹង «អនុវត្តតាមផែនការដ៏អង់អាច ដែលអាចផ្តល់នូវការកែលម្អជាមូលដ្ឋានសម្រាប់សេដ្ឋកិច្ចរបស់ប្រទេសកូរ៉េខាងជើង និងគុណភាពជីវិតរបស់ប្រជាពលរដ្ឋ» និងស្វែងរកពង្រឹងសមយុទ្ធឆ្លើយតបនឹងកាំជ្រួចជាមួយជប៉ុន ដែលជាផ្នែកនៃកិច្ចខិតខំប្រឹងប្រែងដើម្បីជួយដល់ការលុបបំបាត់នុយក្លេអ៊ែររបស់ក្រុងព្យុងយ៉ាង។ លើសពីនេះទៀត លោកបានបន្ថែមថា កូរ៉េខាងត្បូងនឹងសម្លឹងមើលការពង្រឹងកិច្ចសហប្រតិបត្តិការសន្តិសុខត្រីភាគីជាមួយប្រទេសជប៉ុន និងសហរដ្ឋអាមេរិក ដើម្បីឆ្លើយតបទៅនឹងការគំរាមកំហែងនុយក្លេអ៊ែរ និងមីស៊ីលរបស់កូរ៉េខាងជើង៕