រុស្ស៊ីបិទអ្នកសារព័ត៌មាន ប្រព័ន្ធផ្សព្វផ្សាយ និងឥស្សរជនការពារជាតិអង់គ្លេសរាប់សិបនាក់
ក្រសួងការបរទេសរុស្ស៊ីនិយាយថា ទីក្រុងម៉ូស្គូហាមប្រាមអ្នកកាសែត តំណាងប្រព័ន្ធផ្សព្វផ្សាយ និងឥស្សរជនការពារជាតិអង់គ្លេសរាប់សិបនាក់ មិនឱ្យចូលក្នុងប្រទេសរបស់ខ្លួន។
ក្រសួងនិយាយក្នុងសេចក្តីថ្លែងការណ៍មួយកាលពីថ្ងៃអង្គារថា នៅក្នុងសកម្មភាពឆ្លើយតបទៅនឹងការដាក់ទណ្ឌកម្មរបស់លោកខាងលិច និង «ការផ្សព្វផ្សាយព័ត៌មានមិនពិតអំពីរុស្ស៊ី» អ្នកកាសែត ២៩ នាក់ និងសមាជិកនៃអង្គការប្រព័ន្ធផ្សព្វផ្សាយអង់គ្លេសត្រូវហាមឃាត់ដោយផ្ទាល់។
បញ្ជីឈ្មោះអ្នកដែលត្រូវហាមប្រាមនោះ រួមមានបណ្ដាអ្នកកាសែតល្បីឈ្មោះ អ្នកនិយាយតាមទូរទស្សន៍ អ្នកកែសម្រួល និងអ្នកគ្រប់គ្រងជាន់ខ្ពស់នៅស្ថាប័នព័ត៌មានធំៗដូចជា ប៊ីប៊ីស៊ី និងទូរទស្សន៍ស្កាយញូវស៍ និងនិពន្ធនាយកនៃកាសែតឌឹថែមស៍ ដាយ៍លីតេឡេក្រាហ្វ អ៊ិនឌីផិនដិន ហ្គាតឌៀន រួមទាំងស្ថានប័នប្រព័ន្ធផ្សព្វផ្សាយផ្សេងៗទៀត។
ក្រសួងការបរទេសនិយាយថា៖ «អ្នកកាសែតអង់គ្លេសដែលរួមបញ្ចូលក្នុងបញ្ជី គឺពាក់ព័ន្ធនឹងការផ្សព្វផ្សាយដោយចេតនានៃព័ត៌មានមិនពិត និងលំអៀងអំពីរុស្ស៊ី និងព្រឹត្តិការណ៍នៅអ៊ុយក្រែន និងតំបន់ដុនបាស»។ ក្រសួងបន្តថា៖ «ជាមួយនឹងការវាយតម្លៃលំអៀងរបស់ពួកគេ ពួកគេក៏រួមចំណែកក្នុងការជំរុញឱ្យមានការស្អប់រុស្ស៊ីនៅក្នុងសង្គមអង់គ្លេស»។
ប៉ុន្តែអ្នកនាំពាក្យកាសែតហ្គាតឌៀន និយាយថា៖ «នេះគឺជាទង្វើដ៏ខកចិត្តមួយរបស់រដ្ឋាភិបាលរុស្ស៊ី និងជាថ្ងៃអាក្រក់សម្រាប់សេរីភាពសារព័ត៌មាន។ សារព័ត៌មានត្រឹមត្រូវ និងគួរឱ្យទុកចិត្ត មានសារៈសំខាន់ជាងពេលណាៗទាំងអស់ ហើយបើទោះបីជាមានការសម្រេចចិត្តនេះ យើងនឹងបន្តរាយការណ៍យ៉ាងសកម្មអំពីរុស្ស៊ី និងការឈ្លានពានអ៊ុយក្រែន»។
អ្នកកាសែតបរទេសជាច្រើននាក់ចាកចេញពីរុស្ស៊ី បន្ទាប់ពីអាជ្ញាធរនៅម៉ូស្គូ ចេញច្បាប់ដាក់ទោសឱ្យជាប់គុករហូតដល់ ១៥ ឆ្នាំ សម្រាប់ការផ្សព្វផ្សាយអ្វីដែលខ្លួនហៅថា «ព័ត៌មានក្លែងក្លាយ» អំពីកងទ័ពរុស្ស៊ី។ ក្រុងម៉ូស្គូក៏ហាមឃាត់ការប្រើប្រាស់ពាក្យដូចជា «សង្រ្គាម» និង «ការលុកលុយ» ហើយពិពណ៌នាអំពីការវាយប្រហាររបស់ខ្លួនលើអ៊ុយក្រែនថាជា «ប្រតិបត្តិការយោធាពិសេស»។
លើសពីនេះ ក្រសួងការបរទេសរុស្ស៊ីក៏ចេញការហាមឃាត់ការធ្វើដំណើរចូលប្រទេសទៅលើឥស្សរជនដែលមានទំនាក់ទំនងក្នុងវិស័យការពារជាតិអង់គ្លេសចំនួន ២០ នាក់ ដែលមានទំនួលខុសត្រូវចំពោះការផ្គត់ផ្គង់អាវុធរបស់បស្ចិមលោកដល់អ៊ុយក្រែន។
រដ្ឋាភិបាលទីក្រុងឡុងដ៍ ផ្តល់ការគាំទ្រផ្នែកយោធាដល់អ៊ុយក្រែន រួមទាំងការបញ្ជូនប្រព័ន្ធការពារដែនអាកាស មីស៊ីលប្រឆាំងរថក្រោះ និងគ្រាប់បែកប្រភេទផ្សេងៗរាប់ពាន់គ្រាប់ រថពាសដែករាប់រយគ្រឿង និងឧបករណ៍ផ្សេងៗទៀត។
ប្រភព៖ Aljazeera
