សមត្ថភាពផលិតឧស្ម័នរបស់បំពង់ Nord Stream ត្រូវថយចុះ ដោយសារការដាក់ទណ្ឌកម្មពន្យារពេលឧបករណ៍
ក្រុមហ៊ុន Gazprom បាននិយាយថា សមត្ថភាពផលិតឧស្ម័នរបស់បំពង់បង្ហូរ Nord Stream 1 ដើម្បីផ្គត់ផ្គង់ឧស្ម័នទៅកាន់ទ្វីបអឺរ៉ុប ត្រូវបានថយចុះ ដោយសារការដាក់ទណ្ឌកម្មធ្វើឱ្យក្រុមហ៊ុនផ្គត់ផ្គង់ឧបករណ៍ Siemens Energy មិនអាចដឹកទួរប៊ីនត្រឡប់មកពីកាណាដាវិញបាន។
ក្រុមហ៊ុន Gazprom បាននិយាយកាលពីថ្ងៃ អង្គារ ថា ខ្លួនបានកាត់បន្ថយការផ្គត់ផ្គង់ថាមពលតាមរយៈបំពង់បង្ហូរប្រេងក្រោមសមុទ្រ Nord Stream 1 ទៅកាន់ប្រទេសអាឡឺម៉ង់ដល់ទៅ ១០០ លានម៉ែត្រគូប ក្នុងមួយថ្ងៃ ពោលគឺធ្លាក់ចុះពី ១៦៨ លានម៉ែត្រគូបក្នុងមួយថ្ងៃ ដោយសារការពន្យារពេលនូវការដឹកឧបករណ៍ ដែលត្រូវជួសជុល។
កត្តានេះ កាន់តែធ្វើឱ្យការផ្គត់ផ្គង់ឧស្ម័នរបស់រុស្ស៊ីតាមរយៈផ្លូវដ៏សំខាន់មួយផ្សេងទៀតទៅកាន់អឺរ៉ុបថយចុះទៅ ជាមួយគ្នានេះដែរប្រទេសអាល្លឺម៉ង់ ដែលជាសេដ្ឋកិច្ចធំបំផុតរបស់តំបន់ចាប់ផ្ដើមមានភាពមន្ទិលលើសមត្ថភាពផ្គត់់់ផ្គង់ថាមពលរបស់ទីក្រុងម៉ូស្គូ និងខិតខំប្រឹងប្រែងស្វែងរកប្រភពថ្មីមកជំនួសថែមទៀតផង។
ដោយឡែក ក្រុមហ៊ុន Gazprom លែងនាំចេញឧស្ម័នទៅភាគខាងលិចឆ្លងកាត់ប្រទេសប៉ូឡូញតាមបំពង់Yamal-Europe បន្ទាប់ពីការដាក់ទណ្ឌកម្មរបស់រុស្ស៊ីប្រឆាំងនឹង ក្រុមហ៊ុនប៉ូឡូញ EuRoPol Gaz ។ យ៉ាងណាមិញ លំហូរថាមពលតាមរយៈបំពង់ Yamal ទៅអឺរ៉ុប នៅតែបន្តដំណើរការពីភាគខាងកើតពីប្រទេសអាល្លឺម៉ង់ទៅកាន់ប្រទេសប៉ូឡូញ។
ក្រុមហ៊ុន Gazprom បាននិយាយថា៖ «ដោយសារ តែមានការពន្យារពេលនៃការដឹកអង្គភាពបង្ហាប់ឧស្ម័នក្រោយពីការជួសជុល និងភាពរអាក់រអួលរបស់ម៉ាស៊ីនបច្ចេកទេស មានឧបករណ៍បង្ហាប់ឧស្ម័នចំនួន ៣ ប៉ុណ្ណោះ ដែលអាចដំណើរការបាននៅស្ថានីយ៍បង្ហាប់ Portovaya»។
ក្រុមហ៊ុន Siemens Energy បាននិយាយនៅក្នុងសេចក្តីថ្លែងការណ៍មួយថា ខ្លួនបានផ្គត់ផ្គង់នូវអ្វី ដែលហៅថាទួរប៊ីនឧស្ម័ន aeroderivative សម្រាប់ស្ថានីយ៍បង្ហាប់សម្រាប់ Nord Stream 1 ក្នុងឆ្នាំ ២០០៩ ។
ប្រភពដដែល បានបន្ថែមថា៖ «ដោយសារតែ ទណ្ឌកម្ម ដែលដាក់ដោយប្រទេសកាណាដាបច្ចុប្បន្ន ធ្វើឱ្យក្រុមហ៊ុន Siemens Energy ពិបាកក្នុងការចែកចាយទួរប៊ីនហ្គាស ដែលបានជួសជុលឡើងវិញដល់អតិថិជន។ ជាការប្រឆាំង នឹងសាវតានេះ យើងបានជូនដំណឹងដល់រដ្ឋាភិបាលកាណាដា និងអាល្លឺម៉ង់ហើយ កំពុងធ្វើការលើដំណោះស្រាយរួមមួយ»។
ដោយឡែក កាលពីខែមុន អ៊ុយក្រែន បានផ្អាកលំហូរឧស្ម័នរុស្ស៊ីតាមច្រកមួយក្នុងចំណោមចំណុចឆ្លងកាត់ ២ ទៅកាន់អឺរ៉ុប ដោយកាត់ផ្តាច់ ១ ភាគ ៣ នៃឧស្ម័នរុស្ស៊ី ដែលត្រូវបានបង្ហូរទៅកាន់អឺរ៉ុបតាមរយៈអ៊ុយក្រែនផងដែរ។
ប្រភព៖ Financial Post
