សេដ្ឋកិច្ចពាណិជ្ជកម្មនឹងកាន់តែប៉ះពាល់ខ្លាំងជាងសង្គ្រាមអ៊ុយក្រែន បើចិនវាយប្រហារតៃវ៉ាន់
មានការអះអាងថា ផលប៉ះពាល់លើវិស័យសេដ្ឋកិច្ចជាពិសេសរំហូរពាណិជ្ជកម្មពិភពលោកនឹងកើតមានធំជាងសង្គ្រាមផ្ទុះឡើងនៅប្រទេសអ៊ុយក្រែនដែលចាប់ផ្តើមដោយប្រទេសរុស្ស៊ី បើប្រទេសចិនបើកការវាយប្រហារលើកោះតៃវ៉ាន់។
បណ្តាញសារព័ត៌មាន រ៉យទ័រ បានដកស្រង់សម្តី លោក ចន ដែង (John Deng) អ្នកចរចាពាណិជ្ជកម្មកំពូលរបស់ទីក្រុងតៃប៉ិ នៃកោះតៃវ៉ាន់ កាលពីអង្គារទី១៤ ខែមិថុនា ដោយនិយាយថា ការវាយប្រហារយោធារបស់ចិន ទៅលើកោះតៃវ៉ាន់ នឹងមានផលប៉ះពាល់ខ្លាំង លើរំហូរពាណិជ្ជកម្មពិភពលោក ជាងសង្រ្គាមដែលកំពុងកើតមានក្នុងប្រទេសអ៊ុយក្រែន។
សង្គ្រាមនៅប្រទេសអ៊ុយក្រែនដែលចាប់ផ្តើមដោយលោក វ៉្លាឌីមៀរ ពូទីន ប្រធានាធិបតីរុស្ស៊ីដោយហៅវាជាប្រតិបត្តិការយោធា ដែលចាប់ផ្តើមកាលពីថ្ងៃទី២៤ខែកុម្ភៈបានបង្កឱ្យមានការឡើងថ្លៃទំនិញ និងការហាមឃាត់ការនាំចេញអាហារ ដែលនាំឱ្យមានការភ័យខ្លាចចំពោះគ្រោះទុរ្ភិក្សនៅក្នុងប្រទេសក្រីក្រ។
លោក ចន ដែង បាននិយាយថា ប្រសិនបើចិនវាយប្រហារតៃវ៉ាន់ ការរំខានដែលអាចកើតមានអាចកាន់តែអាក្រក់ ដោយលើកឡើងពីការពឹងផ្អែករបស់ពិភពលោកលើតៃវ៉ាន់សម្រាប់បន្ទះឈីបដែលប្រើក្នុងរថយន្តអគ្គិសនី និងទូរស័ព្ទ។
តៃវ៉ាន់ដែលជាកោះមួយមានប្រជាជនរស់នៅជាង២២លាននាក់ ផ្តល់ទីតាំងសម្រាប់ការគ្រប់គ្រងខ្លួនឯងតាមបែបលទ្ធិប្រជាធិបតេយ្យដោយមិនរណបរដ្ឋាភិបាលដែនដីគោកនៃប្រទេសចិនដែលគ្រប់គ្រងតាមបែបកុម្មុយនីស ចាប់តាំងពីឆ្នាំ១៩៤៩។
យោងតាមរ៉យទ័រ រដ្ឋាភិបាលតៃប៉ិបានរាយការណ៍ថាមិនមានសញ្ញានៃការវាយប្រហារដែលជិតមកដល់ពីសំណាក់ប្រទេសចិននោះទេ ប៉ុន្តែតៃវ៉ាន់បានបង្កើនកម្រិតប្រកាសអាសន្នរបស់ខ្លួនចាប់តាំងពីសង្រ្គាមអ៊ុយក្រែនបានចាប់ផ្តើមដោយប្រយ័ត្នប្រយែងពីចេតនារបស់ទីក្រុងប៉េកាំងក្នុងការក្រសោបយកកោះនេះតាមរយៈសកម្មភាពយោធា។
តៃវ៉ាន់ជាកន្លែងគ្រប់គ្រងការផលិតបន្ទះឈីបទំនើបបំផុតសម្រាប់ទីផ្សារពិភពលោក ដោយនាំចេញមានតម្លៃ ១១៨ ពាន់លានដុល្លារ កាលពីឆ្នាំមុន។ នេះបើយោងទិន្នន័យដែលបានបង្ហាញដោយសារព័ត៌មានរ៉យទ័រ។
យោងតាមការចេញផ្សាយរបស់បណ្តាញសារព័ត៌មាន The Straitstimes ការឈ្លានពាន របស់រុស្សីគឺជាលើកទីមួយហើយក្នុងប្រវត្តិសាស្ត្ររបស់អង្គការឃ្លាំមើលពាណិជ្ជកម្មពិភពលោកដែលមានអាយុ ២៧ឆ្នាំដែលសមាជិក WTO មួយបានឈ្លានពានប្រទេសសមាជិកមួយផ្សេងទៀត។
ប្រភពពាណិជ្ជកម្មបាននិយាយថា ស្ថាប័ននេះសង្ឃឹមថានឹងឈានដល់កញ្ចប់នៃកិច្ចព្រមព្រៀង រួមទាំងសន្តិសុខស្បៀងអាហារ ដើម្បីបន្ធូរបន្ថយការផ្គត់ផ្គង់ដែលមានភាពតានតឹង ប៉ុន្តែភាពតានតឹងដែលបង្កើតឡើងដោយសង្រ្គាមអាចធ្វើឱ្យមានការលំបាកកាន់តែខ្លាំង។ នេះយោងតាមចេញផ្សាយដដែល៕
