បាតុករប្រមូលផ្តុំគ្នានៅក្រុងនានារបស់អាមេរិក ក្រោយតុលារការកំពូលលុបចោលច្បាប់រំលូតកូន
ក្រុមអ្នកតវ៉ាប្រមូលផ្តុំគ្នានៅក្នុងទីក្រុងនានាទូទាំងសហរដ្ឋអាមេរិកកាលពីថ្ងៃសៅរ៍ ដើម្បីធ្វើបាតុកម្មប្រឆាំងនឹងសេចក្តីសម្រេចរបស់តុលាការកំពូលរបស់សហរដ្ឋអាមេរិកក្នុងការលុបចោលសិទ្ធិក្នុងការរំលូតកូនតាមរដ្ឋធម្មនុញ្ញដែលមានតាំងពី ៥០ ឆ្នាំមុន។
សេចក្ដីសម្រេចរបស់តុលារការ នឹងទុកឱ្យរដ្ឋសហព័ន្ធនីមួយៗធ្វើការសម្រេចចិត្ត ថាតើត្រូវអនុញ្ញាតអាចរំលូតកូនបានឬយ៉ាងណា ដោយលុបចោលសាលក្រមឆ្នាំ១៩៧៣ របស់តុលាការកំពូល ដែលទទួលស្គាល់ថាការរំលូតកូន គឺជាសិទ្ធិឯកជនរបស់ស្ត្រីម្នាក់ៗ។
ហ្វូងមនុស្ស ដែលប្រឆាំងនឹងសេចក្ដីសម្រេចបានប្រមូលផ្តុំគ្នានៅផ្សេងៗរួមទាំងក្រុងញូវយ៉ក អាត្លង់តា ដេត្រយ សលថ៍ឡេក និងឡូសអាន់ជ័រលេស ក្នុងចំណោមទីក្រុងផ្សេងៗទៀត ដោយនិយាយថា ការលុបចោលសិទ្ធិរំលូតកូននឹងធ្វើឱ្យស្រ្តីធ្លាក់ក្នុងស្ថានភាពគ្រោះថ្នាក់ ជាពិសេសស្ដីចម្រុះជាតិសាសន៍ និងមានចំណូលទាប។
ទន្ទឹមនឹងនោះ អ្នកប្រឆាំងសិទ្ធិរំលូតកូន ក៏នាំប្រមូលផ្តុំគ្នានៅខាងក្រៅអគារតុលាការកំពូលនៅក្រុងវ៉ាស៊ីនតោនផងដែរ បន្ទាប់ពីសេចក្ដីប្រកាសចេញនៅថ្ងៃសុក្រ។
ប្រតិកម្មនឹងសាលក្រមដូចគ្នា លោកប្រធានាធិបតី ចូ បៃដិន បានថ្លែងសន្ទរកថាក្រោយសេចក្ដីប្រកាសចេញថា អាមេរិកបានដើរថយក្រោយវិលទៅរកសង្គមចាស់គំរិល ដែលរឹតត្បឹតធ្វើបាបស្ត្រី។ លោកនិយាយកាលពីថ្ងៃសុក្រថា៖ «សុខភាព និងជីវិតរបស់ស្ត្រីក្នុងប្រទេសរបស់យើងឥឡូវកំពុងប្រឈមនឹងហានិភ័យ។ ការសម្រេចចិត្តនេះគឺជាចំណុចកំពូលនៃកិច្ចខិតខំប្រឹងប្រែងដោយចេតនាក្នុងរយៈពេលជាច្រើនទសវត្សរ៍ ដើម្បីធ្វើឱ្យខូចតុល្យភាពនៃច្បាប់របស់យើង»។ លោក បៃដិន សង្កត់ធ្ងន់ថា វាជា «ថ្ងៃសោកសៅសម្រាប់តុលាការ និងសម្រាប់ប្រទេស»។
អ្នកស្រី Natasha Mitchell វ័យ ៤១ ឆ្នាំមកពីទីក្រុង Denver រដ្ឋកូឡូរ៉ាដូ និយាយថា៖ «វាជាការក្បត់ប្រឆាំងនឹងស្ត្រី។ វាជាជំហានថយក្រោយដ៏ធំមួយ។ វាបើកទ្វារឱ្យមានការគំរាមកំហែងលើសិទ្ធិ និងសេរីភាពផ្សេងទៀត»។
ប៉ុន្តែសម្រាប់អ្នកអភិរក្សនិយម ដែលប្រឆាំងនឹងសិទ្ធិរំលូតកូន ហើយគាំទ្រនូវអ្វីដែលខ្លួនហៅថា «គាំទ្រជីវិត» ដូចជាលោកអតីតប្រធានាធិបតី ដូណាល់ ត្រាំ វាជារឿងដែលគួរឱ្យសាទរមួយ។ បញ្ហាក្នុងស្រុកនៅអាមេរិក បង្កឱ្យមានការបែកបាក់គ្នា រួមទាំងលើសិទ្ធិនៃការរំលូតកូន។ អស់រយៈពេល ៥០ ឆ្នាំមកហើយ ពួកអភិរក្សនិយម ដែលនិយាយថាខ្លួនតស៊ូមតិឱ្យក្មេងដែលមិនទាន់កើត បានធ្វើយុទ្ធនាការប្រឆាំងនឹងសាលក្រម Roe v. Wade ប៉ុន្តែមិនអាចធ្វើបានដោយសារខ្វះសន្លឹកឆ្នោតនៅតុលាការកំពូលដើម្បីជំទាស់។ ប៉ុន្តែរូបភាពនេះបានផ្លាស់ប្ដូរ នៅពេលលោកត្រាំ តែងតាំងចៅក្រមថ្មីប្រឆាំងនឹងសិទ្ធិរំលូតកូន៣រូបក្នុងតុលារការ រហូតឈានដល់ការសម្រេចចិត្តកាលពីថ្ងៃសុក្រ។
ប្រភព៖ VOA News
