ការដួលរលំនៃក្រុងស៊ីវីរ៉ូដូណិតស្ក៍គឺជាជ័យជម្នះដ៏ធំបំផុតរបស់រុស្ស៊ីចាប់តាំងដណ្ដើមបានក្រុងម៉ារីអ៊ូប៉ូល
កាលពីចុងសប្ដាហ៍កន្លងទៅ អភិបាលក្រុងស៊ីវីរ៉ូដូណិតស្ក៍ (Severodonetsk)និយាយថា កងកម្លាំងឈ្លានពានរបស់រុស្ស៊ីបានគ្រប់គ្រងទីក្រុងសមរភូមិស្នូលមួយនេះហើយ ក្រោយក្រុងស្ទើតែទាំងមូលត្រូវបានកម្ទេច ហើយកងទ័ពស្វិតស្វាញរបស់អ៊ុយក្រែនចុងក្រោយបានដកថយចេញ។
ការដួលរលំនៃទីក្រុងស៊ីវីរ៉ូដូណិតស្ក៍ ដែលធ្លាប់ជាទីលំនៅរបស់ប្រជាជនជាង ១០០ ០០០ នាក់ និងរងនូវគ្រាប់ផ្លោង និងការបាញ់ប្រហារពីរុស្ស៊ីយ៉ាងដំណំនោះគឺជាជ័យជំនះដ៏ធំបំផុតសម្រាប់ក្រុងម៉ូស្គូ រាប់ចាប់តាំងពីការដណ្ដើមបានទីក្រុងកំពង់ផែម៉ារីអ៊ូប៉ូលកាលពីខែមុន។
អភិបាលក្រុងលោកOleksandr Stryuk និយាយតាមទូរទស្សន៍ជាតិថា៖ «ទីក្រុងទាំងមូលឥឡូវនេះស្ថិតនៅក្រោមការកាន់កាប់របស់រុស្ស៊ីហើយ។ លោកនិយាយថា នរណាម្នាក់ជាប់គាំងក្នុងក្រុងមិនអាចចេញរួចទេ ដោយសារតែក្រុងត្រូវបានកាត់ផ្ដាច់ទាំងស្រុង ខណៈមានការរាយការណ៍ផ្សេងៗថាមានមនុស្សជាង ១០ ០០០ នៅឡើយដែលមិនព្រមចេញពីក្រុង។
អ្នកនាំពាក្យក្រសួងការពារជាតិរុស្ស៊ីលោកIgor Konashenkovនិយាយថា កងកម្លាំងបះបោរនៃសាធារណៈរដ្ឋប្រជាមានិតលូហានស្ក៍ ក្រោមការគាំទ្រពីកងកម្លាំងរុស្ស៊ី បាន «រំដោះ»ក្រុងស៊ីវីរ៉ូដូណិតស្ក៍ឱ្យមានសេរី។
ប៉ុន្តែប្រធានទីភ្នាក់ងារស៊ើបការណ៍យោធាអ៊ុយក្រែនលោកKyrylo Budanov បានពណ៌នាការដួលរលំនៃទីក្រុងនេះថាជាមធ្យោបាយសម្រាប់កងកម្លាំងអ៊ុយក្រែនក្នុងការប្រមូលទ័ពទៅកាន់ទីក្រុងលីស៊ីឆាន់ស្ក៍(Lysychansk)ដែលនៅជាប់គ្នា។
នាពេលនេះរុស្ស៊ីសង្ឃឹមថានឹងបន្តការរុលទៅមុខរបស់ខ្លួននិងដណ្តើមយកដីបន្ថែមទៀតនៅលើច្រាំងម្ខាងនៃទន្លេSiverskyi Donets ដែលពុះចែកក្រុងលីស៊ីឆាន់ស្ក៍ ពីក្រុងស៊ីវីរ៉ូដូណិតស្ក៍។អ៊ុយក្រែនឯណោះវិញក៏សង្ឃឹមផងដែរថា ការចំណាយរបស់រុស្ស៊ីលើការច្បាំងនៅក្រុងស៊ីវីរ៉ូដូណិតស្ក៍ ក៏នឹងធ្វើឱ្យកងកម្លាំងរបស់ខ្លួនងាយរងគ្រោះក្នុងការប្រយុទ្ធគ្នានៅពេលខាងមុខនេះ។
ក្រុងលីស៊ីឆាន់ស្ក៍និងក្រុងស៊ីវីរ៉ូដូណិតស្ក៍គឺជាចំណុចស្នូលនៃការវាយលុករបស់រុស្ស៊ីក្នុងគោលបំណងដណ្តើមយកតំបន់ភាគកើតដុនបាសរបស់អ៊ុយក្រែនទាំងមូលដែលរួមមានតំបន់ដុនណិតស្ក៍ និងលូហានស្ក៍ចូលគ្នា ហើយបំផ្លាញយោធាអ៊ុយក្រែនឆ្នើមៗដែលការពារតំបន់នេះតាំងពីសង្រ្គាមឆ្នាំ២០១៤មក។ ក្រុងទាំង២ និងតំបន់ជុំវិញ គឺជាកន្លែងស្វិតស្វាញចុងក្រោយរបស់អ៊ុយក្រែននៅក្នុងតំបន់លូហានស្ក៍ ដែលស្ទើតែ ៩៥ ភាគរយគ្រប់គ្រងដោយរុស្ស៊ី។កងទ័ពរុស្ស៊ីក៏គ្រប់គ្រងប្រហែលពាក់កណ្ដាលនៃតំបន់ដុនណិតស្ក៍ផងដែរ។
ស្ថាប័នស្រាវជ្រាវរបស់អាមេរិកមួយឈ្មោះ វិទ្យាស្ថានសម្រាប់សង្គ្រាម ដែលតាមដានសង្រ្គាមនៅអ៊ុយក្រែនយ៉ាងជិតស្និត សន្និដ្ឋានថា៖ «ការបាត់បង់ទីក្រុងស៊ីវីរ៉ូដូណិតស្ក៍គឺជាការបាត់បង់សម្រាប់អ៊ុយក្រែនក្នុងន័យថាគ្រប់ផ្ទៃដីដែលកងទ័ពរុស្ស៊ីចាប់បានគឺជាការបាត់បង់ ប៉ុន្តែសមរភូមិស៊ីវីរ៉ូដូណិតស្ក៍នឹងមិនក្លាយជាជ័យជម្នះរបស់រុស្ស៊ីឡើយ»។
ការដណ្តើមយកតំបន់លូហានស្ក៍ទាំងមូល ដែលអាចកើតឡើងប្រសិនប្រើរុស្ស៊ីអាចយកឈ្នះនៅក្រុងលីស៊ីឆាន់ស្ក៍ នឹងមិននាំមកនូវជ័យជំនះដែលប្រធានាធិបតីរុស្ស៊ីលោក វ្ល៉ាឌីមៀរ ពូទីន ចង់បាននោះទេ។
ប៉ុន្មានខែមុន ទាហានរុស្ស៊ីបានបរាជ័យក្នុងការដណ្តើមយករដ្ឋធានីកៀវនិងតំបន់ភាគខាងជើងអ៊ុយក្រែន ដោយបាត់បង់ទាហានរាប់ពាន់នាក់ រថក្រោះនិងរថពាសដែករាប់រយគ្រឿង ខណៈរងការចោទប្រកាន់ពីការប្រព្រឹត្តឧក្រិដ្ឋកម្មសង្គ្រាមប្រឆាំងនឹងជនស៊ីវិល។ កងទ័ពរបស់រុស្ស៊ីប្ដូរទិសដៅនៃការវាយប្រហារ ដោយថានឹងផ្ដោតលើការវាយលុកលើតំបន់ដុនបាសទាំងមូល។
ប៉ុន្តែយ៉ាងហោចណាស់២/៥នៃតំបន់ដុនណិតស្ក៍ ដែលជាតំបន់ធំ និងមានប្រជាជនរស់នៅច្រើនជាងគេក្នុងតំបន់ដុនបាស ស្ថិតនៅក្រោមការគ្រប់គ្រងដោយកងកម្លាំងអ៊ុយក្រែននៅឡើយ។ កងទ័ពអ៊ុយក្រែនបានសង់កន្លែងយ៉ាងរឹងមាំរបស់ខ្លួននៅទីនោះ ចាប់តាំងពីក្រុមឧទ្ទាមដណ្ដើមការកាន់កាប់នៅឆ្នាំ ២០១៤ ដែលនឹងធ្វើឱ្យកងទ័ពរុស្ស៊ីកាន់តែពិបាកជាងនៅលូហានស្ក៍ទៅទៀត។
លើសពីនោះជ័យជំនះដ៏ធំលើកនេះរបស់រុស្ស៊ី ក៏មិនសូវជាធំប៉ុន្មានបើប្រៀបធៀបទៅនឹងការយកបានទីក្រុងកំពង់ផែម៉ារីអ៊ូប៉ូល ដែលជាទីក្រុងសេដ្ឋកិច្ចសំខាន់មួយសម្រាប់អ៊ុយក្រែន។
ប្រភព៖ Aljazeera
