មនុស្ស ១៦ នាក់ត្រូវបានសម្លាប់ ក្នុងការវាយប្រហារដោយមីស៊ីលរបស់រុស្ស៊ីលើកន្លែងទិញទំនិញមួយនៅអ៊ុយក្រែន
ក្រុមមន្ត្រីអ៊ុយក្រែននិយាយថា មីស៊ីលរបស់រុស្ស៊ីចំនួន២បានវាយប្រហារទៅលើកន្លែងទិញទំនិញមួយនៅកណ្ដាលទីក្រុងក្រឹមមិនឆូក (Kremenchuk) នៃភាគកណ្ដាលប្រទេសកាលពីថ្ងៃចន្ទ ដោយសម្លាប់មនុស្សយ៉ាងហោចណាស់១៦នាក់ និងរបួស៥៩ នាក់។
លោកប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី និយាយថា មានមនុស្សជាង១ ០០០ នាក់ស្ថិតនៅក្នុងអាគារផ្សារនៅពេលមីស៊ីលវាយប្រហារ។ វិឌីអូដែលចែកចាយលើបណ្ដាញសង្គមក្រោយការវាយប្រហារ បង្ហាញពីភ្លើងសន្ធោសន្ធៅឆាបឆេះ និងមានផ្សែងខ្មៅហុយទ្រលោមទៅលើមេឃ។
សេវាសង្គ្រោះបន្ទាន់អ៊ុយក្រែននិយាយថាមនុស្សយ៉ាងហោចណាស់១៦ នាក់ត្រូវបានសម្លាប់ ខណៈ៥៩នាក់ផ្សេងទៀតរងរបួស។នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
លោកហ្សេលេនស្គីសរសេរនៅលើកម្មវិធីផ្ញើសារតេឡេក្រាមថា៖ «វាមិនអាចទៅរួចទេក្នុងការស្រមៃមើលចំនួនជនរងគ្រោះ។វាគ្មានប្រយោជន៍ទេក្នុងការសង្ឃឹមពីភាពសមរម្យ និងភាពជាមនុស្សជាតិពីរុស្ស៊ី»។
ក្រុងក្រឹមមិនឆូកគឺជាទីក្រុងឧស្សាហកម្មដែលមានប្រជាជនចំនួន២១៧ ០០០ នាក់ មុនការចាប់ផ្ដើមការវាយលុករបស់រុស្ស៊ីនៅចុងខែកុម្ភៈ។ ទីក្រុងភាគកណ្ដាលមួយនេះ ស្ថិតនៅលើទន្លេ Dnipro ក្នុងតំបន់ប៉ូលតាវ៉ា(Poltava)និងជាទីតាំងនៃរោងចក្រចម្រាញ់ប្រេងដ៏ធំបំផុតរបស់អ៊ុយក្រែន។
លោកឌ្មីត្រូ លូនីន (Dmytro Lunin)អភិបាលតំបន់ប៉ូលតាវ៉ាភាគកណ្តាល សរសេរនៅលើតេឡេក្រាមថាវាឆាប់ពេកក្នុងការនិយាយអំពីចំនួនអ្នកស្លាប់ចុងក្រោយ ខណៈក្រុមអ្នកជួយសង្គ្រោះបន្តប្រតិបត្តិការរបស់ខ្លួនតាមគំនរបាក់បែក។ លោកនិយាយដាច់ដោយឡែកថា៖ «វាជាអំពើភេរវកម្មប្រឆាំងនឹងជនស៊ីវិល»ដោយលើកឡើងថា គ្មានគោលដៅយោធាណានៅទីនោះ ដែលរុស្ស៊ីត្រូវវាយប្រហារនោះទេ។
បញ្ជាការកងទ័ពអាកាសអ៊ុយក្រែននិយាយថាអាវុធដែលយកធ្វើការវាយប្រហារកន្លែងទិញទំនិញទាំង២គ្រាប់គឺជាមីស៊ីលX-22 រយៈចម្ងាយឆ្ងាយដែលបាញ់ចេញពីយន្តហោះទម្លាក់គ្រាប់បែកTu-22M3 ដែលហោះចេញពីអាកាសយានដ្ឋានShaykovkaក្នុងតំបន់កាលូហ្គារបស់រុស្ស៊ី។
ឯកអគ្គរដ្ឋទូតរងរបស់រុស្ស៊ីប្រចាំអង្គការសហប្រជាជាតិ លោក ឌ្មីទ្រី ប៉ូលយ៉ែនស្គី (Dmitry Polyanskiy)សរសេរនៅលើធ្វីតធឺរដោយមិនបញ្ជាក់ពីភស្តុតាងថា ការវាយប្រហារនេះគឺជាការបង្កហេតុរបស់អ៊ុយក្រែន។
កន្លងមក រុស្ស៊ីដែលចោទអ៊ុយក្រែនថាយកជនស៊ីវិលជាខែលរងគ្រាប់ តែងធ្វើការវាយប្រហារដោយមីស៊ីលជារឿយៗលើអាគាររស់នៅរបស់ប្រជាជនតាំងពីការឈ្លានពានចាប់ផ្ដើម ដោយនិយាយថា មានគោលដៅយោធានៅទីនោះ។ រុស្ស៊ីថាខ្លួនមិនដាក់គោលដៅលើជនស៊ីវិលទេ ទោះបីជាមានសូម្បីតែការទម្លាក់គ្រាប់បែកលើសាលារៀនដែលមានជនស៊ីវិលជ្រកកោនក្ដី។
នៅរយៈពេលចុងក្រោយនេះ រុស្ស៊ីហាក់បង្កើនការវាយលុកដោយអាកាស ខណៈដណ្ដើមយកបានទីក្រុងស៊ីវីរ៉ូដុនណិតស្ក៍នៃតំបន់លូហានស្ក៍កាលពីសប្ដាហ៍មុន។ មីស៊ីលរុស្ស៊ីបានវាយប្រហារប្លុកអាផាតមិន ហើយធ្លាក់នៅជិតសាលាមត្តេយ្យមួយក្នុងរដ្ឋធានីកៀវកាលពីថ្ងៃអាទិត្យ ដោយសម្លាប់មនុស្សម្នាក់ និងរបួសជាច្រើននាក់ទៀត។
ប្រភព៖ Reuters
