សង្រ្គាមអ៊ុយក្រែន ធ្វើឱ្យរាំងស្ទះប្រទេសធំៗ ក្នុងការប្ដេជ្ញាចិត្តប្រឆាំងនឹងបម្រែបម្រួលអាកាសធាតុ
អស់រយៈពេល ៤ ខែ រាប់តាំងពីរុស្ស៊ីចាប់ផ្ដើមឈ្លានពានអ៊ុយក្រែន ការប្រជែងគ្នាដើម្បីរកអ្នកផ្គត់ផ្គង់ឥន្ធនៈហ្វូស៊ីលជំនួសរុស្ស៊ីបានក្លាយជាបញ្ហាមួយផ្ទុយពីអ្វីដែលសកម្មជនអាកាសធាតុរំពឹងចង់បាន តាមរយៈការតស៊ូមតិ និងការប្រឆាំងតវ៉ារបស់ខ្លួន ដើម្បីកាត់បន្ថយការបំភាយឧស្ម័នសកល។
ខណៈមេដឹកនាំក្រុមប្រទេសឧស្សាហកម្មទាំង ៧ (G-៧)ជួបគ្នានៅរដ្ឋBavaria ប្រទេសអាល្លឺម៉ង់ ដើម្បីកិច្ចប្រជុំមួយដែលគេសន្មត់ថានឹងពង្រឹងការប្តេជ្ញាចិត្តរបស់G-៧ក្នុងការប្រយុទ្ធប្រឆាំងនឹងការប្រែប្រួលអាកាសធាតុនោះ ឥន្ធនៈហ្វូស៊ីលក្លាយជាប្រធានបទក្ដៅសារជាថ្មីក្រោយសង្រ្គាមផ្ទុះឡើងពេលមេដឹកនាំនានាផ្តោតលើការទម្លាក់តម្លៃប្រេង និងឧស្ម័ន ជាជាងការកាត់បន្ថយការបំភាយឧស្ម័ន។
ផ្ទុយពីផែនការបញ្ឈប់ការដុតធ្យូងថ្ម ប្រទេសនានាកំពុងស្វែករកប្រេងបន្ថែមទៀត ហើយក៏កំពុងធ្វើការប្តេជ្ញាចិត្តលើគម្រោងរាប់ពាន់លានលើការបង្កើតស្ថានីយស្តុកឧស្ម័នធម្មជាតិ (LNG)។ ក្រុមហ៊ុនឥន្ធនៈហ្វូស៊ីលកំពុងផ្តល់ទុនលើការភ័យខ្លាចអំពីសុវត្ថិភាពថាមពល និងបញ្ចុះបញ្ចូលឱ្យមានការខិតខំប្រឹងប្រែងសម្រាប់ការវិនិយោគហេដ្ឋារចនាសម្ព័ន្ធរយៈពេលវែងកាន់តែខ្លាំង ដែលប្រថុយនឹងការបង្ខូចគោលដៅអាកាសធាតុអន្តរជាតិដែលព្រមព្រៀងគ្នានៅក្រុងGlasgow កាលពីឆ្នាំមុន។
ការលុកលុយរបស់រុស្ស៊ីដាក់ផែនការផ្លាស់ប្តូរថាមពលនៅត្រង់ផ្លូវបំបែក។ ការប្រឈមមុខនឹងអ្នកបង្កើតគោលនយោបាយគឺថា ការងាកចេញឆ្ងាយពីឥន្ធនៈហ្វូស៊ីលមានសារៈសំខាន់ណាស់ដើម្បីជៀសវាងសេណារីយ៉ូអាកាសធាតុមហន្តរាយ។
អ្នកស្រីJennifer Morgan ឯកអគ្គរដ្ឋទូតទទួលបន្ទុកបម្រែបម្រួលអាកាសធាតុប្រចាំក្រសួងការបរទេសអាល្លឺម៉ង់ និងជាអតីតប្រធានអង្គការGreenpeace International និយាយថា៖«នោះគឺជាសមរភូមិដែលយើងកំពុងស្ថិតក្នុងពេលនេះ។ យើងកំពុងស្ថិតក្នុងការរំខានដ៏ធំមួយដោយសារការលុកលុយ[របស់រុស្ស៊ីលើអ៊ុយក្រែន] ហើយនោះជាហានិភ័យធំលើបញ្ហាអាកាសធាតុ»។
មេដឹកនាំនៃប្រទេស G-៧រួមទាំងសហរដ្ឋអាមេរិក និងអាល្លឺម៉ង់ រកឃើញថាពួកគេកំពុងប្រឈមមុខរវាងគោលដៅមហិច្ឆតាក្នុងការផ្តាច់ខ្លួនចេញពីឥន្ធនៈហ្វូស៊ីល និងសម្ពាធនយោបាយ និងសេដ្ឋកិច្ចភ្លាមៗដោយសារសង្រ្គាម។ កង្វល់ភ្លាមៗទាំងនោះគ្របដណ្ដប់លើរបៀបវារៈជាច្រើនក្នុងជំនួបនៅ Bavaria ពេលមេដឹកនាំស្វែងរកមធ្យោបាយដើម្បីបន្ធូរបន្ថយការកើនឡើងនៃថ្លៃថាមពល និងការផ្គត់ផ្គង់។
អាល្លឺម៉ង់កំពុងបញ្ចុះបញ្ចូលសមាជិក G-៧ ផ្សេងទៀត ឱ្យលុបចោលការប្តេជ្ញាចិត្តរួមគ្នាក្នុងការហាមឃាត់ការវិនិយោគសាធារណៈក្នុងគម្រោងឥន្ធនៈហ្វូស៊ីលនៅក្រៅប្រទេសនៅចុងឆ្នាំនេះ។ អ្នកវិភាគព្រមានថា ប្រសិនបើរដ្ឋជាសមាជិកយល់ព្រម វានឹងមិនត្រឹមតែពិបាកបញ្ចុះបញ្ចូលពិភពលោកឱ្យកាត់បន្ថយការបំភាយឧស្ម័នហើយវិនិយោគលើថាមពលកកើតឡើងវិញប៉ុណ្ណោះទេ ប៉ុន្តែនឹងបង្កគ្រោះថ្នាក់ដល់គោលដៅទប់ស្កាត់ការឡើងកម្ដៅផែនដីមិនឱ្យលើសពី ១,៥ អង្សាសេ។
សំណើមួយទៀតដែលរំពឹងថានឹងបង្ហាញក្នុងកិច្ចប្រជុំកំពូលនោះគឺទាក់ទងនឹងតម្លៃប្រេងរបស់រុស្ស៊ីដោយអនុញ្ញាតឱ្យបណ្តាអឺរ៉ុបអាចនាំចូលវាបានត្រឹមតម្លៃទាប។វាអាចជួយបញ្ចុះថ្លៃប្រេង និងសាំងនៅទូទាំងពិភពលោកហើយកាត់បន្ថយចំណូលថាមពល ដែលជាដង្ហើមនៃសង្រ្គាមរបស់លោកប្រធានាធិបតី វ៉្លាឌីមៀរ ពូទីន នៅអ៊ុយក្រែន និងក៏អាចលើកទឹកចិត្តឱ្យរុស្ស៊ីផលិតប្រេងកាន់តែច្រើនផងដែរ។
អ្នកស្រីJanetYellenរដ្ឋលេខាធិការរតនាគារសហរដ្ឋអាមេរិក ដែលជាអ្នកផ្ដួចផ្ដើមនៃគំនិតនេះ និយាយថា វាជារឿងល្អមួយដែលមានមេដឹកនាំអាចធ្វើទៅបានដើម្បីកាត់បន្ថយឱកាសនៃវិបត្តិសេដ្ឋកិច្ចសកល។ នេះបើតាមការចុះផ្សាយរបស់កាសែតញូវយ៉កថែមស៍ ដែលស្រង់សម្ដីប្រភពដឹងអំពីព័ត៌មាននេះ។
មុនកិច្ចប្រជុំកំពូលនៅBavariaធ្វើឡើង មេដឹកនាំប្រទេសម្ចាស់ផ្ទះអាល្លឺម៉ង់ លោកអធិការបតីOlaf Scholzបានទទូចថាការដោះស្រាយវិបត្តិថាមពលរយៈពេលខ្លីដែលបង្កឡើងពីសង្រ្គាមរបស់រុស្ស៊ីនឹងមិនធ្វើឱ្យខូចដល់គោលដៅអាកាសធាតុរយៈពេលវែងនោះទេ។
សកម្មជនអាកាសធាតុ ដែលប្រមូលផ្ដុំគ្នាតវ៉ាតាំងពីមុនកិច្ចប្រជុំធ្វើឡើង និយាយថា ពួកគេមិនអាចទទួលយកបាននោះទេ។ នាងLuisa Neubauer សកម្មជនលេចធ្លោបំផុតរបស់អាល្លឺម៉ង់និយាយថា៖«ជំនួសឱ្យការប្រើប្រាស់ថាមពលដែលកកើតឡើងវិញ យើងបង្កើនការប្រើប្រាស់ហ្វូស៊ីលដ៏ច្រើន។ អាល្លឺម៉ង់គឺជាប្រទេសមួយក្នុងចំណោមប្រទេសដែលជំរុញឱ្យមានការបែបនេះ តាមរយៈគោលនយោបាយក្នុងស្រុក និងបរទេសរបស់យើង»។
មុនការឈ្លានពានរបស់រុស្ស៊ីចាប់ផ្ដើមឡើងនៅចុងខែកុម្ភៈ ប្រទេស G-៧ បានធ្វើការប្តេជ្ញាចិត្តមួយចំនួនទាក់ទងនឹងអាកាសធាតុ។ ក្នុងនោះរួមមានការងាកចេញពីការប្រើប្រាស់ធ្យូងថ្មនៅឆ្នាំ២០៣០ ការកាត់ផ្ដាច់កាបូនពីវិស័យថាមពលនៅឆ្នាំ ២០៣៥ ការបង្កើនការវិនិយោគសាធារណៈក្នុងវិស័យថាមពលកកើតឡើងវិញនិងការបញ្ចប់ការផ្តល់មូលនិធិសាធារណៈលើគម្រោងឥន្ធនៈហ្វូស៊ីលក្រៅប្រទេសណាមួយនៅចុងឆ្នាំនេះ។
ប៉ុន្តែខណៈវិបត្តិថាមពលរវាងរុស្ស៊ី និងអឺរ៉ុបផ្ទុះឡើង ការប្ដេជ្ញាចិត្តត្រូវបានផ្លាស់ប្ដូរ ដែលនឹងអាចពន្យាពេលដល់ការសម្រេចគោលដៅផ្សេងៗ។ ក្នុងខែមិថុនានេះ រុស្ស៊ីកាត់បន្ថយឧស្ម័នធម្មជាតិ ៦០ ភាគរយដែលបង្ហូរតាមបំពង់Nord Stream 1 ទៅកាន់អាល្លឺម៉ង់ និងប្រទេសដទៃទៀត។ការណ៍នេះជំរុញឱ្យរដ្ឋាភិបាលអឺរ៉ុបបើករោងចក្រធ្យូងថ្មដែលបិទ ឬគ្រោងនឹងត្រូវបញ្ឈប់ជាដំណាក់កាលឡើងវិញ។
អាល្លឺម៉ង់កំពុងឧបត្ថម្ភធនតម្លៃប្រេងសាំង និងពន្យារប្រតិបត្តិការម៉ាស៊ីនភ្លើងដែលដើរដោយធ្យូងថ្ម។ រោងចក្រធ្យូងថ្មរបស់ហូឡង់ដែលដំណើរការក្នុងសមត្ថភាព៣៥ភាគរយ ត្រូវដំឡើងរហូតដល់ ១០០ ភាគរយដល់ឆ្នាំ ២០២៤។ អូទ្រីសកំពុងដំណើរការរោងចក្រធ្យូងថ្មដែលបិទក្នុងឆ្នាំ២០២០ឡើងវិញ ខណៈអ៊ីតាលីក៏រៀបចំអនុញ្ញាតឱ្យរោងចក្រថាមពលដុតធ្យូងថ្មតម្លើងផលិតកម្ម។ មិនខុសគ្នា រដ្ឋបាលរបស់លោកប្រធានាធិបតី ចូ បៃដិនបានរំអុកឱ្យក្រុមហ៊ុនផលិតប្រេងក្នុងស្រុក និងប្រទេសផលិតប្រេងក្រៅស្រុកតម្លើងការបូមប្រេង។
ជាមួយគ្នានោះ គំនិតនៃការទិញប្រេងពីរុស្ស៊ីក្នុងតម្លៃថោក ក៏ពេញនិយមថានឹងជួយកាត់បន្ថយតម្លៃប្រេងសាំង ទោះបីជាពេលនេះប្រទេសធំៗនៅអាស៊ីដូចជាឥណ្ឌា និងចិន បង្កើនការទិញប្រេងរបស់រុស្ស៊ី ដែលនៅតែបន្តឱ្យប្រទេសនេះរកប្រាក់ចំណេញបានច្រើនក្ដី។
លើសពីនេះអ្នកវិភាគនិយាយថា ការព្រួយបារម្ភធំបំផុតមួយនោះគឺការប្រជែងគ្នានាពេលបច្ចុប្បន្នសម្រាប់ការផ្គត់ផ្គង់ឧស្ម័នធម្មជាតិ ដែលនឹងធ្វើឱ្យវាស្ទើរតែមិនអាចសម្រេចបាននូវគោលដៅកំណត់ការឡើងកំដៅផែនដីមិនឱ្យលើសពី១,៥អង្សាសេ។ អ្នកវិភាគគោលនយោបាយបរិស្ថាន និងបរទេសអះអាងថាប្រទេសG-៧អាចគាំទ្រការវិនិយោគលើថាមពលកកើតឡើងវិញ និងកាត់បន្ថយថាមពល ខណៈសន្យាផ្តល់មូលនិធិសម្រាប់ប្រទេសក្រីក្រដែលរងគ្រោះដោយគ្រោះមហន្តរាយអាកាសធាតុ។សំខាន់ជាងនេះទៅទៀត សកម្មជនព្រមានថា ប្រទេសអ្នកមានចាំបាច់ត្រូវទប់ទល់នឹងការល្បួងឱ្យឆ្លើយតបទៅនឹងកង្វះថាមពលរយៈពេលខ្លីដោយរំពឹងម្តងទៀតលើហេដ្ឋារចនាសម្ព័ន្ធឥន្ធនៈហ្វូស៊ីល។
ប្រភព៖ CNBC