សភាអ៊ីស្រាអែលអនុម័តច្បាប់បើកផ្លូវរំលាយសភាជាលើកទី៥ក្នុងរយៈពេលតិចជាង៤ឆ្នាំ
សភាអ៉ីស្រាអែលបានអនុម័តជាឯកច្ឆ័ន្ទកាលពីព្រឹកថ្ងៃអង្គារនូវសេចក្តីព្រាងច្បាប់ដើម្បីរំលាយសភា ដែលជាជំហាននីតិបញ្ញត្តិដ៏សំខាន់ដែលជំរុញឱ្យប្រទេសនេះខិតទៅជិតការបោះឆ្នោតលើកទីប្រាំរបស់ខ្លួនក្នុងរយៈពេលតិចជាង៤ឆ្នាំ។
ច្បាប់បើកផ្លូវឲ្យមានការរំលាយសភាអ៊ីស្រាអែល «Knesset»កើតឡើងចំពេលរយៈពេល១ឆ្នាំក្រោយការចូលកាន់តួនាទីជានាយករដ្ឋមន្ត្រីនៃប្រទេសអ៊ីស្រាអែលរបស់លោក ណាហ្វតាលី បេននិត (Naftali Bennett) តាមរយៈការបង្កើតរដ្ឋាភិបាលចម្រុះគណបក្ស ដោយផ្តួលរំលំអតីតនាយកនាយករដ្ឋមន្ត្រី លោកបែនចាមីន នែតានីញ៉ាហ៊ូ (Benjamin Netanyahu)ដែលបានដឹកនាំប្រទេសអ៊ីស្រាអែលអស់រយៈពេល១២ឆ្នាំ។ នេះបើយោងតាម CNN បណ្តាញព័ត៌មានរបស់អាមេរិក។
ទីភ្នាក់ងារព័ត៌មានបារាំង AFP បានផ្សាយថា សមាជិកនៃក្រុមចម្រុះបក្សដែលចាកចេញពីការដឹកនាំរដ្ឋាភិបាល របស់លោក ណាហ្វតាលី បេននិត (Naftali Bennett) នាយករដ្ឋមន្ត្រីអ៊ីស្រាអែលនិងក្រុមប្រឆាំងដែលដឹកនាំដោយអតីតនាយករដ្ឋមន្ត្រី លោកបែនចាមីន នែតានីញ៉ាហ៊ូ (Benjamin Netanyahu) បាននិងកំពុងវាយលុកនៅក្នុងសភាអ៊ីស្រាអែល Knesset ចាប់តាំងពីសប្តាហ៍មុនជុំវិញសេចក្តីព្រាងច្បាប់រំលាយ។
ក្រុមចម្រុះដឹកនាំដោយនាយរដ្ឋមន្ត្រីបច្ចុប្បន្ន បាននិយាយថា ខ្លួនចង់បានការអនុម័តច្បាប់នេះឲ្យបានឆាប់រហ័ស បន្ទាប់ពីលោក Bennett បានប្រកាសកាលពីសប្តាហ៍មុនថា សម្ព័ន្ធភាពប្រាំបីភាគីដែលបែងចែកដោយមនោគមវិជ្ជារបស់គាត់ មិនអាចស្ថិតស្ថេរបានទៀតទេ។
ប៉ុន្តែលោក Netanyahu និងសម្ព័ន្ធមិត្តរបស់គាត់ បាននឹងកំពុងជួបពិភាក្សាគ្នា ដើម្បីស្វែងរកការបង្កើតរដ្ឋាភិបាលថ្មី ដែលដឹកនាំដោយអតីតនាយករដ្ឋមន្ត្រីរូបនេះនៅក្នុងសភាបច្ចុប្បន្ន ដែលនឹងរារាំងការបោះឆ្នោតថ្មី។
ភាគីទាំងសងខាងបានធ្វើការដោះដូរផ្នែកច្បាប់ ប៉ុន្តែទីបំផុតបានព្រមព្រៀងគ្នាកាលពីល្ងាចថ្ងៃចន្ទ ដើម្បីជំរុញសេចក្តីព្រាងច្បាប់ ដែលនឹងបញ្ចប់ជាច្បាប់នៅថ្ងៃពុធ។
គណបក្សប្រឆាំងដឹកនាំដោយអតីតនាយករដ្ឋមន្ត្រី លោក Netanyahu ក៏បានត្រៀមខ្លួនបង្កើតរដ្ឋាភិបាលថ្មីក្រោយការរំលាយរដ្ឋសភា ប៉ុន្តែកិច្ចខិតខំប្រឹងប្រែងនោះបានជាប់គាំង ហើយតម្រូវឲ្យប្រទេសនៅមជ្ឈឹមបូព៌ានេះត្រូវរៀបចំការបោះឆ្នោតឡើងវិញ ដែលធ្វើឲ្យប្រទេសនេះប្រឈមការបោះឆ្នោតឡើងវិញរហូត៥លើកក្នុងរយៈពេលមិនដល់៤ឆ្នាំផង។
យោងតាមទីភ្នាក់ងារព័ត៌មានបារាំង នៅព្រឹកថ្ងៃអង្គារ គណៈកម្មាធិការសភា Knesset របស់អ៊ីស្រាអែល បានអនុម័តសេចក្តីព្រាងច្បាប់នេះ។ ក្រោយមកច្បាប់នេះត្រូវបាននាំយកទៅកិច្ចប្រជុំពេញអង្គសម្រាប់ពិនិត្យលើកដំបូង និងអនុម័តដោយសំឡេង ៥៣-០។
យោងតាមច្បាប់នេះ សភានឹងរំលាយដោយការបោះឆ្នោតថ្មីនឹងធ្វើឡើងនៅថ្ងៃទី ២៥ខែតុលា ឬថ្ងៃទី១ខែវិច្ឆិកា ដោយនឹងកំណត់កាលបរិច្ឆេទ បន្ទាប់ពីការចរចាបន្ថែមទៀត។
នៅពាក់កណ្តាលអធ្រាត្របន្ទាប់ពីការអនុម័តចុងក្រោយនៃច្បាប់នេះ លោក Bennett នឹងប្រគល់អំណាចទៅឱ្យរដ្ឋមន្ត្រីការបរទេសលោក Yair Lapid ដោយអនុលោមតាមកិច្ចព្រមព្រៀងចែករំលែកអំណាចដែលពួកគេបានយល់ព្រមបន្ទាប់ពីការបោះឆ្នោតមិនពេញលេញកាលពីឆ្នាំមុន។
សម្ព័ន្ធភាពរបស់នាយករដ្ឋមន្ត្រី Bennett ដែលជាសម្ព័ន្ធភាពនៃអ្នកជាតិនិយមខាងសាសនា អ្នកនិយមសាសនា អ្នកនិយមកណ្តាល ព្រាប និងពួកឥស្លាមអារ៉ាប់ ត្រូវបានរារាំងដោយការបែងចែកមនោគមវិជ្ជារបស់ខ្លួនតាំងពីដើមដំបូងមក៕
