តួក្យូ៖ ប្រទេសជប៉ុនកំពុងប្រារព្ធខួបលើកទី ៧៧ នៃព្រឹត្តិការណ៍ទម្លាក់គ្រាប់បែកបរមាណូ នៅណាហ្គាសាគី ក្នុងអំឡុងសង្គ្រាមលោកលើកទីពីរ (៩ សីហា ១៩៤៥ – ៩ សីហា ២០២២)។

នាព្រឹកថ្ងៃទី៩ សីហា ២០២២នេះ ប្រជាជនជប៉ុនបានប្រមូលផ្តុំគ្នាដើម្បីគោរពដល់ជនរងគ្រោះនៅតាមទីតាំងនានា រួមទាំងសួនសន្តិភាព Nagasaki ដែលត្រូវបានសាងសង់នៅជុំវិញដីសូន្យ។ ពិធីរំលឹកខួបប្រចាំឆ្នាំត្រូវធ្វើឡើង នៅសួនឧទ្យាននេះ។ មនុស្សប្រហែល ១៧០០នាក់ត្រូវបានគេរំពឹងថា នឹងចូលរួមក្នុងព្រឹត្តិការណ៍នេះ។

នេះគឺច្រើនជាងបីដងបើធៀបនឹងពីរឆ្នាំមុន ដែលមានការកាត់បន្ថយ ដោយសារតែការរាតត្បាតនៃជំងឺកូវីដ-១៩។ អ្នករស់រានមានជីវិតពីការបំផ្ទុះគ្រាប់បែក រួមជាមួយនឹងនាយករដ្ឋមន្ត្រី Kishida Fumio និងអ្នកតំណាងមកពីប្រទេសជាច្រើនក៏នឹងចូលរួម។

អ្នកចូលរួមនឹងស្ងប់ស្ងាត់មួយភ្លែត នៅម៉ោង ១១.០២ ព្រឹក ដែលជានាទីដូចគ្នាដែលគ្រាប់បែកបានផ្ទុះ នៅថ្ងៃទី ៩ ខែសីហា ឆ្នាំ១៩៤៥ ។ អភិបាលក្រុង Nagasaki លោក Taue Tomihisa នឹងថ្លែងសេចក្តីថ្លែងការណ៍សន្តិភាព នៅក្នុងពិធីនេះ។

យ៉ាងណាក៏ដោយ កាលពីថ្ងៃសៅរ៍ អគ្គលេខាធិការអង្គការសហប្រជាជាតិ លោក Antonio Guterres បានអញ្ជើថ្លែងសុន្ទរកថា ក្នុងពិធីរំលឹកខួបលើកទី ៧៧ នៃការទម្លាក់គ្រាប់បែកបរមាណូលើកដំបូងរបស់ពិភពលោក នៅឧទ្យាន Memorial Peace ក្នុងទីក្រុង Hiroshima ដោយពេលនោះ
នាយករដ្ឋមន្ត្រី Fumio Kishida ក៏បានចូលរូមដែរ៕ ដោយ៖ សារ៉ាត