អាមេរិកក្លាយជាប្រទេសទី២៣ក្នុងការផ្តល់សច្ចាប័នលើការស្នើសុំចូលជាសមាជិកណាតូរបស់ហ្វាំងឡើងនិងស៊ុយអែត ខណៈ៧នៅរង់ចាំប្រទេស៧ផ្សេងទៀត
រហូតដល់ថ្ងៃទី១០ខែសីហា ប្រទេស២៣ក្នុងចំណោមប្រទេសសមាជិកនៃអង្គការសន្ធិសញ្ញាអាត្លង់ទិកខាងជើង (NATO) បានផ្តល់សច្ចាប័នសម្រាប់ការសុំចូលជាសមាជិកថ្មីរបស់ប្រទេសហ្វាំងឡង់ និង ស៊ុយអែត ដែលនៅជាប់ព្រំដែនប្រទេសមហាយក្សរុស្ស៊ី និងភិតភ័យក្រោយការលើកទ័ពចូលលុកលុយប្រទេសអ៊ុយក្រែនពីសំណាក់រុស្ស៊ី។
ប្រទេសសមាជិកអង្គការណាទូចចាស់ចំនួន៧ដែលមិនទាន់បានផ្តល់សច្ចាប័នរួមមាន ប្រទេសព័រទុយហ្គាល់ អេស្ប៉ាញ សាធារណៈរដ្ឋឆែក ស្លូវ៉ាគី ហុងគ្រី ក្រិច និង តួកគី ចំណែកប្រទេសអាមេរិកបានក្លាយជាប្រទេសទី២៣ក្នុងការអនុម័យលើការផ្តល់សច្ចាប័ននេះ។ នេះបើយោងតាម Atlantic Council ដែលជាក្រុមស្រាវជ្រាវ ( Think Tank)ដែលមានមូលដ្ឋាននៅសហរដ្ឋអាមេរិក។
រដ្ឋសភាទាំងពីរថ្នាក់របស់សហរដ្ឋអាមេរិក បានអនុម័តផ្តល់សច្ចាប័នកាលពីថ្ងៃទី៣ខែសីហា ហើយប្រធានាធិបតីអាមេរិក លោក ចូ បៃដិន បានចុះហត្ថលេខាលើការផ្តល់សច្ចាប័ននៅថ្ងៃទី៩ខែសីហាឆ្នាំ២០២២នេះ បន្ទាប់ពីប្រទេសដែលស្ថិតនៅតំបន់ខាងជើងទ្វីបអឺរ៉ុប និងអាត្លង់ទិកខាងជើង ដែលគេហៅថា «Nordic» ទាំងពីរ បានដាក់ពាក្យ សុំដាក់បញ្ចូលក្នុងសម្ព័ន្ធភាពយោធាណាតូតិចជាងបីខែ បន្ទាប់ពីកងទ័ពរុស្ស៊ីបានឈ្លានពានអ៊ុយក្រែន។
ប្រធានាធិបតីសហរដ្ឋអាមេរិក លោក ចូ បៃដិន (Joe Biden) កាលពីថ្ងៃអង្គារបានចុះហត្ថលេខាលើពិធីសារចូលជាសមាជិករបស់អង្គការណាតូសម្រាប់ហ្វាំងឡង់ និងស៊ុយអែត ដោយធ្វើឱ្យសម្ព័ន្ធភាពការពារជាតិឱ្យកាន់តែខិតទៅជិតគ្នាចំពោះការបន្ថែមសមាជិកកម្រិតខ្ពស់ផ្នែកយោធាចំនួនពីរ ចំពេលមានការវាយលុកបន្តរបស់រុស្ស៊ីលើអ៊ុយក្រែន។ នេះបើតាមការចេញផ្សាយរបស់ Politico។
ការអនុម័តរបស់ប្រធានាធិបតីអាមេរិកក្រោយពីមានការគាំទ្រដ៏លើសលប់ពីសភាទាំងពីរកម្រិតនៅសម័យប្រជុំក្នុងរដូវក្តៅនេះ ដោយព្រឹទ្ធសភាបានផ្តល់សច្ចាប័នលើកិច្ចព្រមព្រៀងកាលពីសប្តាហ៍មុន។
ប្រធានាធិបតីអាមេរិក បានថ្លែងនៅអំឡុងពិធីចុះហត្ថលេខាលើពិធីសារនោះថា៖«កាលពីប៉ុន្មានខែមុន ខ្ញុំបានស្វាគមន៍ប្រធានាធិបតី Niinistö នៃប្រទេសហ្វាំងឡង់ និងនាយករដ្ឋមន្ត្រី Andersson នៃប្រទេសស៊ុយអែតទៅកាន់សេតវិមាន ដើម្បីបង្ហាញពីការគាំទ្រដ៏រឹងមាំដែលសហរដ្ឋអាមេរិកមានចំពោះការសម្រេចចិត្តរបស់ហ្វាំងឡង់ និងស៊ុយអែតក្នុងការដាក់ពាក្យចូលជាសមាជិកអង្គការណាតូ»។
លោក បៃដិន បន្តថា៖«ប្រទេសទាំងពីរដែលមានមោទនភាព និងឯករាជ្យដែលប្រទេសនីមួយៗមានប្រពៃណីដ៏យូរលង់ ជាប្រពៃណីដ៏យូរអង្វែងនៃការមិនចូលបក្សសម្ព័ន្ធ អនុវត្តសិទ្ធិអធិបតេយ្យភាពរបស់ពួកគេក្នុងការសម្រេចចិត្តផ្ទាល់ខ្លួនអំពីសន្តិសុខរបស់ពួកគេ និងឆ្លើយតបទៅនឹងឆន្ទៈរបស់ពលរដ្ឋរបស់ពួកគេ អនុវត្តតាមដំណើរការប្រជាធិបតេយ្យដែលពួកគេមាន ដោយជ្រើសរើសចូលរួមជាមួយអង្គការណាតូ»។
ប្រធានាធិបតីអាមេរិកដែលជាប្រទេសដឹកនាំអង្គការប្រដាប់អាវុធនិងនយោបាយណាតូនេះ បានចាត់ទុកបេក្ខភាពរបស់ប្រទេសហ្វាំងឡង់ និង ស៊ុយអែតសំខាន់សម្រាប់អង្គការណាតូ ដោយសារតែប្រទេសទាំងពីរនេះជាប្រទេសអ្នកមាន និង មានកងទ័ពខ្លាំង។
លោកបៃដិននិយាយថា៖«វាជាពេលវេលាមួយដែលខ្ញុំជឿជាក់ថានៅក្នុងសម្ព័ន្ធភាពនិងសម្រាប់សន្តិសុខនិងស្ថិរភាពកាន់តែអស្ចារ្យមិនត្រឹមតែអឺរ៉ុបនិងសហរដ្ឋអាមេរិកប៉ុណ្ណោះទេប៉ុន្តែសម្រាប់ពិភពលោក។ ហើយថ្ងៃនេះ យើងចាត់វិធានការសំខាន់មួយទៀត ឆ្ពោះទៅនាំស៊ុយអែត និងហ្វាំងឡង់ ចូលទៅក្នុងអង្គការណាតូ»។
យោងតាម forces.net ប្រទេសអឺរ៉ុបណាមួយអាចចូលរួមជាមួយណាតូ ដរាបណាប្រទេសនេះបង្ហាញថាខ្លួនអាចបំពេញកាតព្វកិច្ចសមាជិកភាពដូចជាការរួមចំណែកផ្នែកយោធា និងសេដ្ឋកិច្ច។ នោះរួមបញ្ចូលទាំងការដាក់យ៉ាងហោចណាស់២ភាគរយនៃផលិតផលក្នុងស្រុកសរុបរបស់ខ្លួនឆ្ពោះទៅរកការការពារជាតិ និងការយល់ព្រមចំពោះច្បាប់ការពារជាតិរួមរបស់ណាតូ ដែលជាយន្តការដែលតម្រូវឱ្យសមាជិកចូលមកការពារគ្នាទៅវិញទៅមកក្នុងករណីមានការវាយប្រហារ។
ប្រទេសហ្វាំងឡង់ និងស៊ុយអែតត្រូវបានគ្រោងក្លាយជារដ្ឋសមាជិកទី ៣១ និងទី ៣២ របស់អង្គការណាតូ។ ការពង្រីកអង្គការណាតូថ្មីៗបំផុតបានកើតឡើងនៅក្នុងខែមីនា ឆ្នាំ២០២០នៅពេលដែលប្រទេសម៉ាសេដូនខាងជើងបានចូលរួមជាមួយក្រុមនេះ។ ប្រទេស បូស្នៀ និងហឺហ្សេហ្គោវីណា ហ្សកហ្ស៊ី និងអ៊ុយក្រែនក៏បានបញ្ជាក់ពីចំណាប់អារម្មណ៍របស់ពួកគេក្នុងការចូលរួមជាមួយអង្គការណាតូដែរ។
ប៉ុន្តែវាជារឿងអកុសល ដែលប្រទេសរុស្ស៊ីបានរារាំងប្រទេសអ៊ុយក្រែនមិនឲ្យចូលអង្គការប្រដាប់អាវុធនេះ ដោយយល់ថា អង្គការណាតូដែលដឹកនាំដោយសហរដ្ឋអាមេរិកនឹងគំរាមកំហែងផ្នែកសន្តិសុខដល់ប្រទេសរុស្ស៊ីដែលជាមហាអំណាចមួយ។
ប្រទេសហ្វាំងឡង់និងស៊ុយអែតដែលស្ថិតនៅតំបន់ខាងជើងទ្វីបអឺរ៉ុប និងអាត្លង់ទិកខាងជើង ដែលគេហៅថា «Nordic» បានដាក់ពាក្យស្នើចូលអង្គការសម្ព័ន្ធមិត្តយោធា NATO យ៉ាង់តក់ក្រហល់បន្ទាប់ពីឃើញប្រទេសរុស្ស៊ីលើកទ័ពចូលឈ្លានពានប្រទេសអ៊ុយក្រែនដែលជារដ្ឋអធិបតេយ្យនៅជាប់ប្រទេសរុស្ស៊ីដូចខ្លួនដែរ។
គោលបំណងនៃការចូលជាសមាជិករបស់អង្គការនេះក៏ព្រោះតែក្តីពឹងថា ក្នុងពេលខ្លួនបានក្លាយជាសមាជិកនៃអង្គការយោធានេះពេញសិទ្ធិ អង្គការនេះនឹងជួយការពារខ្លួន ឬជួយខ្លួនក្នុងការប្រយុទ្ធក្នុងករណីដែលប្រទេសរុស្ស៊ីឈ្លានពានដូចករណីអ៊ុយក្រែន។
ប៉ុន្តែបំណងរបស់ប្រទេសទាំងពីរដែលទទួលបានការព្រមានខ្លះៗពីប្រទេសរុស្ស៊ីនោះ ក៏ខកខានទៅវិញដោយសារ ប្រទេសតួកគីដែលស្ថិតនៅតំបន់មជ្ឈឹមបូព៌ាក្នុងអាស៊ីភាគខាងលិច ដែលបានចូលជាសមាជិករបស់អង្គការសន្ធិសញ្ញាអាត្លង់ទិកខាងជើងក្នុងខែកុម្ភៈឆ្នាំ១៩៥២ បានបដិសេធសមាជិកភាពនៃប្រទេសទាំងពីរ។
ក្នុងហេតុផលដែលតួកគីប្រឆាំងការចូលជាសមាជិកភាពនៃអង្គការណាតូរបស់ប្រទេសហ្វាំងឡង់ និង ស៊ុយអែត ដោយចោទប្រកាន់ប្រទេសទាំងពីរនេះថា បានគាំទ្រក្រុមសកម្មប្រយុទ្ធប្រដាប់អាវុធឃឺដ (PKK) ដែលប្រទេសតួកគីចោទថា ជាពួកភេរវករបំបែកខ្លួនធ្លាប់ប្រយុទ្ធជាមួយកងកម្លាំងជាមួយតួកគីផង។
កាលពីថ្ងៃទី១៨ ខែឧសភា ឯកអគ្គរដ្ឋទូតហ្វាំងឡង់ប្រចាំអង្គការណាតូ លោក Klaus Korhonen និងសមភាគីស៊ុយអែត លោក Axel Vernhoff បានប្រគល់ពាក្យសុំចូលជាសមាជិក NATO របស់ប្រទេសរបស់ពួកគេជាផ្លូវការទៅឱ្យ លោក ស្តូលតេនប៊ើច (Stoltenberg) ដែលជាអគ្គលេខាធិការអង្គការណាតូ។
យោងតាមបណ្តាញព័ត៌មាន CNBC របស់អាមេរិក លោក រ៉េសិប តៃយីប អេរដូហ្គែន(RecepTayyip Erdogan) ប្រធានាធិបតីតួកគីបាននិយាយនៅពេលក្រោយនៅថ្ងៃដដែលនោះថា សាធារណរដ្ឋរបស់លោកនឹងរារាំងការខិតខំចូលជាសមាជិកភាពរបស់ប្រទេស Nordic ទាំងពីរ លុះត្រាតែពួកគេពិនិត្យឡើងវិញនូវគោលជំហររបស់ពួកគេចំពោះអង្គការភេរវករ ពោលគឺគណបក្សពលករឃឺដ (PKK) ដែលត្រូវបានចាត់តាំងដោយទីក្រុងអង់ការ៉ា។ កាលពីថ្ងៃទី២១ឧសភា ក លោក រ៉េសិប តៃយីប អេរដូហ្គែន(RecepTayyip Erdogan)បាននិយាយថា ប្រទេសរបស់លោកនឹងគាំទ្រស៊ុយអែត និងហ្វាំងឡង់ ចូលរួមជាមួយអង្គការណាតូ ពេលដែលប្រទេសទាំងពីរបានបង្ហាញយ៉ាងច្បាស់ពីសាមគ្គីភាពរបស់ពួកគេជាមួយនឹងការព្រួយបារម្ភរបស់ប្រទេសតួកគីក្នុងវិស័យសន្តិសុខ៕
![](https://asset.ams.com.kh/central/media/2022/08/photo_2022-08-09_01-01-59-1024x681.jpg)
ប្រភព៖ Atlanticcouncil