ក្រុងម៉ូស្គូច្រានចោលការអំពាវនាវរបស់លោក ហ្សេលេនស្គី ឱ្យបិទការធ្វើដំណើរលើជនជាតិរុស្ស៊ី
អ្នកនាំពាក្យវិមានក្រឹមឡាំង លោកឌ្មីទ្រី ប៉េស្កូវ និយាយថា សំណើរបស់ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គីក្នុងការបិទការធ្វើដំណើរលើជនជាតិរុស្ស៊ីទាំងអស់ ពីបណ្តាប្រទេសលោកខាងលិចបាន មានលក្ខណៈហួសហេតុពេកហើយត្រូវបានគេមើលឃើញថាជះផល «អវិជ្ជមានយ៉ាងខ្លាំង» លើទីក្រុងម៉ូស្គូ។
ការនិយាយបែបនេះ ធ្វើឡើងបន្ទាប់ពីលោក ហ្សេលេនស្គី ប្រាប់កាសែតវ៉ាស៊ីនតោនបុស្តិ៍ថា ទណ្ឌកម្មរបស់លោកខាងលិចប្រឆាំងនឹងទីក្រុងម៉ូស្គូនាពេលបច្ចុប្បន្ន គឺខ្សោយពេក ដោយបន្ថែមថា លោកខាងលិចគួរតែបិទព្រំដែនរបស់ខ្លួនមិនឱ្យជនជាតិរុស្ស៊ីចូល។
លោក Peskov និយាយកាលពីថ្ងៃអង្គារថា៖ «ភាពមិនសមហេតុផលនៃការគិតក្នុងករណីនេះ គឺវាហួសហេតុ»។ លោកបន្ថែមថា៖«ការប៉ុនប៉ងណាមួយ ដើម្បីផ្ដាច់ប្រជាជនរុស្ស៊ី ឬរុស្ស៊ីឱ្យនៅឯកោ គឺជាដំណើរហួសពីការនឹងស្មាន»។
អតីតប្រធានាធិបតីរុស្ស៊ីលោកDmitry Medvedev ហៅលោក ហ្សេលេនស្គីថាជា«ត្លុកកំប្លែងអ៊ុយក្រែនដ៏អស្ចារ្យបំផុត» ហើយថែមទាំងប្រៀបធៀបលោកទៅនឹងមេដឹកនាំផ្តាច់ការណាស៊ី អាល់ដុល ហ៊ីត្លែរ ចំពោះការស្នើរបស់លោក។
យ៉ាងណាមិញ ប្រទេសជិតខាងរុស្ស៊ី ហ្វាំងឡង់កាលពីសប្តាហ៍មុន បានចេញផែនការកំណត់ទិដ្ឋាការទេសចរណ៍សម្រាប់ជនជាតិរុស្ស៊ី ប៉ុន្តែក៏បានសង្កត់ធ្ងន់លើតម្រូវការសម្រាប់ការសម្រេចចិត្តនៅកម្រិតសហភាពអឺរ៉ុបលើបញ្ហានេះ។
ទន្ទឹមនឹងនោះ នាយករដ្ឋមន្ត្រីអេស្តូនី លោកស្រីKajaKallasបាននិយាយថា វាជាពេលវេលាដើម្បីបញ្ចប់វិស័យទេសចរណ៍ពីរុស្ស៊ី។លោកស្រីនិយាយថា៖ «ការទៅលេងអឺរ៉ុបគឺជាឯកសិទ្ធិមួយ មិនមែនជាសិទ្ធិមនុស្សទេ»។
ខណៈដែលមន្រ្តីរុស្ស៊ីប្រៀបធៀបការចង់បានរបស់លោក ហ្សេលេនស្គី ទៅនឹងអ្វីដែលកើតឡើងក្នុងអំឡូងសង្រ្គាមលោកលើកទី២ «ប្រតិបត្តិការយោធាពិសេស» របស់ទីក្រុងម៉ូស្គូនៅអ៊ុយក្រែនមកទល់ពេលនេះ បានសម្លាប់មនុស្សរាប់ពាន់នាក់ បង្ខំមនុស្សរាប់លាននាក់ឱ្យភៀសខ្លួនចេញពីផ្ទះសម្បែង និងធ្វើឱ្យមានការខ្វះខាតស្បៀងអាហារកាន់តែខ្លាំងឡើងនៅទូទាំងពិភពលោក។
ប្រភព៖ Aljazeera
