ភ្នំពេញ ៖ ម៉ូតូម៉ាកហុងដាឌ្រីម (Honda Dream) ចំនួន ៦គ្រឿង ដែលបានផ្ញើរនៅកន្លែងទទួលបញ្ញើមួយកន្លែង ត្រូវបានជនសង្ស័យមួយក្រុម ចូលលួចយកទៅបាត់ រួចរត់គេចខ្លួនបាត់អស់ ដោយសុវត្តិភាព បង្កឱ្យមានការភ្ញាក់ផ្អើលកាលពីវេលាម៉ោងជាង៧ព្រឹក ថ្ងៃទី៨ ខែកញ្ញា ឆ្នាំ២០២២ នៅភូមិទួលពង្រ សង្កាត់ចោមចៅទី៣ ខណ្ឌពោធិ៍សែនជ័យ រាធានីភ្នំពេញ។

យោងតាមប្រភពព័ត៌មាននៅកន្លែងកើតហេតុ បានប្រាប់ឱ្យដឹងថា ទីតាំងខាងលេីនេះ គឺជាកន្លែងទទួលបញ្ញើម៉ូតូ២៤ម៉ោង និងមានសន្តិសុខយាមត្រឹមត្រូវ លុះពេលមកដល់ព្រឹកថ្ងៃទី៨ ខែកញ្ញា ឆ្នាំ២០២២ គឺជាថ្ងៃកើតហេតុ ក៏ស្រាប់តែម្ចាស់មកយកម៉ូតូរបស់ពួកគាត់វិញ ក៏ស្រាប់តែបាត់ម៉ូតូ បង្កឱ្យមានការភ្ញាក់ផ្អេីល រួចបានពិនិត្យមេីល ទើបដឹងថា មានម៉ូតូបាត់ចំនួន ៦គ្រឿង សុទ្ធតែម៉ាកហុងដាឌ្រីម (Honda Dream) ទាំងអស់ ។

សូមបញ្ជាក់ថា ពាក់ព័ន្ធករណីខាងលេីនេះ គឺគ្មាននរណាម្នាក់ អាចបានបញ្ជាក់ថា ស្លាកលេខម៉ូតូប៉ុន្មានខ្លះនោះទេ ដោយម្ចាស់ទីតាំងចាក់សោរខាងក្រៅ មិនអនុញាតិឱ្យអ្នកផ្សេងចេញចូលនោះទេ ដើម្បីទុកវេលាវាយតម្លៃ និងចរចារជាមួយម្ចាស់ម៉ូតូនៅខាងក្នុង ៕ ដោយ៖ ឆៃហួត និងប៊ុនធី