ភ្នំពេញ៖ ក្រុមមហាគ្រួសាររថយន្ត OFF ROAD កម្ពុជា បានធ្វើតេសសាកល្បងរថយន្ត OFF ROAD និងរៀបចំពិធីជួបសំណេះសំណាល ត្រៀមចេញទៅចូលរួមប្រកួតកីឡា OFF ROAD ជាលក្ខណអន្តរជាតិ នាខែតុលា ឆ្នាំ២០២២ នៅប្រទេសថៃ ពីធីនេះមានការអញ្ជើញចូលរួមពីឯកឧត្តម ទៀ ស្យាម ប្រធានក្រុមមហាគ្រួសាររថយន្ត OFF ROAD កម្ពុជា និងឯកឧត្តម ទៀ សុខា ប្រធានកិត្តិយស កាលពីចុងសប្តាហ៍កន្លងទៅ ។
ឯកឧត្តម ទៀ ស្យាម មានប្រសាសន៍ថា ការប្រកួតកម្រិតអន្តរជាតិលើកនេះ បានបង្ហាញពីការរីកចំរើនយ៉ាងឆាប់រហ័សលើវិស័យកីឡា OFF ROAD កម្ពុជា បាននឹងកំពុងមានប្រជាប្រិយភាពខ្លាំង និងមានការគាំទ្រ ។ ឯកឧត្តមប្រធាន បន្ថែមថា ការចូលរួមនេះ កម្ពុជាទទួលបានបទពិសោធន៍ និងបច្ចេកទេសពីការប្រណាំង ការរៀបចំ ដើម្បីត្រៀមខ្លួនអោយបានល្អនៅឆ្នាំក្រោយ នឹងឈានស្វែងរកលទ្ធផល និងពានរង្វាន់ជូនកម្ពុជាអោយបាន ។ ក្នុងនាមប្រធានក្រុមមហាគ្រួសាររថយន្ត OFF ROAD កម្ពុជា ឯកឧត្តម ជម្រុញអោយកីឡាករ OFF ROAD កម្ពុជា ចូលរួមប្រណាំងមកម្រិតអន្តរជាតិមួយឆ្នាំអោយបាន៣ដង ដើម្បីបង្ហាញថាកម្ពុជាក៏មានកីឡាករខ្លាំងៗ អាចប្រកួតប្រជែងជាមួយកីឡាករបរទេសបាន ជាពិសេសលើកស្ទួយកីឡា OFF ROAD កម្ពុជា នៅលើឆាកអន្តរជាតិ។ ហើយឯកឧត្តម ទៀ ស្យាម បានសន្យាថា នឹងស្វែងរកការឧបត្តម្ភគាំទ្រពីវិស័យឯកជន ទាំងថវិកា និងសម្ភារជួយដល់កីឡាករកម្ពុជាយើង ។
ចំនែកឯឯកឧត្តម ទៀ សុខា ប្រធានកិត្តិយសក្រុមមហាគ្រួសាររថយន្ត OFF ROAD កម្ពុជា បានកោតសសើរក្រុមកីឡាករ OFF ROAD ដែលបានចូលរួមយ៉ាងសកម្មការងារមនុស្សធម៌ ដូចជា ដឹកវ៉ាក់សាំងចាក់ជូនបងប្អូនប្រជាពលរដ្ឋ នៅខេត្តកោះកុង និងបាននាំយកថវិកាមូលនិធិរៃអង្គាសពីសមាជិករបស់ខ្លួន មានចំនួនសរុប ៤,៣៥៥ ដុល្លារអាមេរិក យកទៅជូនសម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា ដើម្បីទិញវ៉ាក់សាំងការពារជំងឺកូវីដ-១៩ សម្រាប់ចាក់ជូនប្រជាជនដោយឥតគិតថ្លៃ។ នាំយកអំណោយជាគ្រឿងឧបភោគ បរិភោគ សម្ភារ សំលៀកបំពាក់ និងថវិកា ទៅចែកជូនបងប្អូនប្រជាពលរដ្ឋនៅតំបន់ដាច់ស្រយាល អោយស្របតាមបាវនាទាំង៤ របស់ក្រុមមហាគ្រួសាររថយន្ត OFF ROAD កម្ពុជា កីឡា បរិស្ថាន ទេសចរណ៍ និងការងារសប្បុរសធម៌ ។ ឯកឧត្តម ទៀ សុខា ក៏បានកោតសសើរ និងមានមោទនភាពចំពោះក្រុមកីឡាករ OFF ROAD កម្ពុជាទាំង៣ក្រុម ដែលចូលរួមប្រកួតទទួលបានបទពិសោធន៍ និងលទ្ធផលប្រសើរល្អ ជាពិសេសឯកឧត្តមប្រធាកិត្តិយស បានស្នើសុំឲ្យក្រុមទាំងអស់ស្រឡាញ់គ្នា ជួយគ្នា លើកទឹកចិត្តគ្នា បង្កើនមិត្តភាព សាមគ្គីភាពជាក្រុមអោយខ្លាំង ។
សូមបញ្ជាក់ថា ក្រុមមហាគ្រួសាររថយន្ត OFF ROAD កម្ពុជា គ្រោងនឹងចូលរួមប្រកួតរថយន្ត OFF ROAD កម្រិតអន្តរជាតិ នាខែតុលាខាងមុខនេះ នៅខេត្តត្រាង ប្រទេសថៃ ។ ក្រៅពីការចូលរួមកម្រិតអន្តរជាតិ កម្ពុជានឹងរៀបចំការប្រកួតរថយន្តពានរង្វាន់ OFF ROAD សន្តិភាព ជាលក្ខណៈអន្តរជាតិ នាខែមករា ដើមឆ្នាំ២០២៣ខាងមុខនេះ ដោយមាន៤ប្រទេសចូលរួម មានថៃ ឡាវ វៀតណាម និងកម្ពុជាជាម្ចាស់ផ្ទះ ៕ ចាន់ វិចិត្រ