បាងកក៖ ឧស្សាហកម្មយានយន្តរបស់សហព័ន្ធឧស្សាហកម្មថៃ (FTI) បានប្រកាស នាថ្ងៃទី២២ ខែកញ្ញា ឆ្នាំ២០២២នេះថា ទិន្នផលផលិតកម្មរថយន្តរបស់ប្រទេសថៃ មាន១.១៨ លានគ្រឿង ចន្លោះពីខែខែមករា ដល់ខែសីហា ២០២២ បានកើនឡើង ១០.៥ ភាគរយ បើធៀបនឹងពេលដូចគ្នាកាលពីឆ្នាំមុន ។

លោក Surapong Pisitpattanapong អនុប្រធាន និងជាអ្នកនាំពាក្យរបស់សហព័ន្ធឧស្សាហកម្មថៃ បាននិយាយថា ផលិតកម្មខែសីហាតែមួយបានឈានដល់ ១៧១៧៣១ គ្រឿង កើនឡើង ៦៤.៩ ភាគរយ ធៀបនឹងខែសីហា ២០២១ ដោយសារការកើនឡើងនៃតម្រូវការរថយន្ត និងរថយន្តភីកអាប់ទាំងទីផ្សារក្នុងស្រុក និងក្រៅប្រទេស ។

ក្នុងរយៈពេលប្រាំបីខែនៃឆ្នាំ២០២២ ការលក់រថយន្តក្នុងស្រុកមានចំនួន ៥៥៩៥៣៧ គ្រឿង កើនឡើង ១៩.៦ ភាគរយ ធៀបនឹងពេលដូចគ្នា កាលពីឆ្នាំមុន ដោយការលក់នៅក្នុងខែសីហាតែមួយមានចំនួន ៦៨២០៨គ្រឿង កើនឡើង ៦១.៧ ភាគរយ ធៀបនឹងពេលដូចគ្នា កាលពីឆ្នាំមុន ។

លោក Surapong បានកត់សម្គាល់ថា “ការលក់រថយន្តកំពុងកើនឡើងដោយសារតែម៉ូដែលថ្មី និងសេដ្ឋកិច្ចប្រសើរឡើងជាបណ្តើរៗ បន្ទាប់ពីប្រទេសថៃបានបើកប្រទេសឡើងវិញយ៉ាងពេញលេញសម្រាប់ភ្ញៀវទេសចរ និងវិនិយោគិនបរទេស” Surapong បានកត់សម្គាល់។

ទន្ទឹមនឹងនេះដែរ រថយន្តចំនួន ៦០៦០៥៥គ្រឿង ត្រូវបាននាំចេញ ក្នុងរយៈពេលប្រាំបីខែ ដែលមានតម្លៃ ៣៦៨ពាន់លានបាត ពោលគឺកើនឡើង ០.៤ភាគរយ លើចំនួន និងតម្លៃកើនឡើង ៥.១៨ភាគរយ ធៀបនឹងពេលដូចគ្នា កាលពីឆ្នាំមុន ។ យានយន្តចំនួន ៧៣៣២៥ គ្រឿងត្រូវបាននាំចេញក្នុងខែសីហា ដែលមានតម្លៃ ៤៩.៣៦ ពាន់លានបាត កើនឡើង ២៣.០៩ភាគរយ លើបរិមាណ និងតម្លៃកើនឡើង ៣៨.១២ ធៀបនឹងពេលដូចគ្នា កាលពីឆ្នាំមុន៕ ប្រភពពី The Nation , ដោយ៖ សារ៉ាត