ហ្វីលីពីននឹងបិទក្រុមហ៊ុនល្បែងស៊ីសងបរទេសជាង ១៧០ និងនិរទេសបុគ្គលិកជនជាតិចិនរាប់ម៉ឺននាក់ 
ហ្វីលីពីន៖មន្ត្រីនាំពាក្យក្រសួងយុត្តិធម៌ហ្វីលីពីន បានអះអាងកាលពីថ្ងៃចន្ទ ទី ២៦ ខែកញ្ញាថា ហ្វីលីពីននឹងបិទប្រតិបត្តិការក្រុមហ៊ុនល្បែងស៊ីសងបរទេសចំនួន១៧៥និងនិរទេសបុគ្គលិកជាជនជាតិចិន ប្រហែលបួនម៉ឺននាក់។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មានរ៉យទ័រ។
ការបិទនេះ គឺជាផ្នែកមួយនៃការបង្រ្កាបលើវិស័យល្បែងស៊ីសងអនឡាញក្នុងប្រទេសរបស់ខ្លួន។ អ្នកនាំពាក្យក្រសួងយុត្តិធម៌លោក Jose Dominic Clavano បានថ្លែងថា៖ «ការបង្រ្កាប ធ្វើឡើងដោយសារតែមានរបាយការណ៍នៃឃាតកម្ម ការចាប់ជំរិត និងឧក្រិដ្ឋកម្មផ្សេងទៀត ដែលជនជាតិចិនខ្លួនឯង បានប្រព្រឹត្តដាក់ជនជាតិចិនផ្សេងទៀត» ។
លើសពីនេះលោក Clavano អះអាងថា ក្រុមហ៊ុនប្រតិបត្តិករល្បែងស៊ីសងរបស់បរទេសនៅហ្វីលីពីន (POGOs)ដែលត្រូវបិទគឺដោយសារតែអាជ្ញាប័ណ្ណរបស់ពួកគេអស់សុពលភាពឬត្រូវបានដកហូតចំពោះការរំលោភបំពានផ្សេងៗ ដូចជាការមិនបង់ប្រាក់ឱ្យរដ្ឋាភិបាលជាដើម។ មន្រ្តីនាំពាក្យដដែលបន្ថែមថា ការនិរទេសបុគ្គលិកជនជាតិចិន នឹងចាប់ផ្តើមនៅខែក្រោយ។
ជុំវិញបញ្ហានេះ ស្ថានទូតចិនប្រចាំទីក្រុងម៉ានីឡា ថ្លែងក្នុងសេចក្តីថ្លែងការណ៍ថា ទីក្រុងប៉េកាំងគាំទ្រការនិរទេស និងការបង្រ្កាបឧក្រិដ្ឋកម្មទាក់ទងនឹង POGO ដោយបន្ថែមថា រដ្ឋាភិបាលចិនប្រឆាំងយ៉ាងម៉ឺងម៉ាត់ និងចាត់វិធានការតឹងរ៉ឹង ដើម្បីប្រយុទ្ធប្រឆាំងនឹងល្បែងស៊ីសង។
គួរបញ្ជាក់ថា វិស័យល្បែងស៊ីសងអនឡាញ បានលេចចេញក្នុងប្រទេសហ្វីលីពីននៅឆ្នាំ ២០១៦ ហើយមានការរីកចម្រើនយ៉ាងខ្លាំង ដោយសារតែប្រតិបត្តិករបន្ថែមការបណ្ដាក់ទុន ក្រោមច្បាប់ល្បែងស៊ីសងសេរីរបស់ប្រទេសនេះ ដើម្បីទាក់ទាញអ្នកលេងគោលដៅពីប្រទេសចិន ដែលល្បែងបែបនេះត្រូវបានហាមឃាត់។
បើគិតពីតួលេខខ្ពស់បំផុត POGOs បានជួលកម្មករចិនជាង ៣ សែននាក់ ប៉ុន្តែដោយសារតែវិបត្តិកូវីដ-១៩ និងពន្ធខ្ពស់ បានបង្ខំឱ្យប្រតិបត្តិករជាច្រើនប្ដូរទៅកន្លែងផ្សេង។ យ៉ាងណាមិញ រដ្ឋាភិបាលហ្វីលីពីន រកចំណូលបានចំនួន ១២២ លានដុល្លារក្នុងឆ្នាំ២០២០និងជាង៦៦ លានដុល្លារក្នុងឆ្នាំ២០២១ពីថ្លៃសេវា POGO តែមួយមុខប៉ុណ្ណោះ។ នេះបើយោងតាមតួលេខពីក្រសួងហិរញ្ញវត្ថុហ្វីលីពីន៕
ដោយ៖ហួន ឌីណា