អ៊ីរ៉ង់ចោទប្រកាន់អាមេរិក ថាព្យាយាមប្រើភាពចលាចល ដើម្បីធ្វើឱ្យប្រទេសរបស់ខ្លួនទន់ខ្សោយ
អ៊ីរ៉ង់៖បានចោទប្រកាន់អាមេរិកថា ព្យាយាមប្រើភាពចលាចល ដើម្បីធ្វើឱ្យប្រទេសរបស់ខ្លួន ធ្លាក់ទៅក្នុងភាពទន់ខ្សោយ។ អ៊ីរ៉ង់ថែមទាំងបន្ថែមថា ខ្លួននឹងធ្វើការឆ្លើយតបចំពោះទង្វើបែបនេះ បើទោះបីជាខ្លួនរងការថ្កោលទោស និងទណ្ឌកម្មបន្ថែម ពីបណ្ដាប្រទេសលោកខាងលិចក៏ដោយ។
កាលពីថ្ងៃចន្ទ ទី ២៦ ខែកញ្ញា អ្នកនាំពាក្យក្រសួងការបរទេសអ៊ីរ៉ង់ លោក Nasser Kanaani បានថ្លែងប្រាប់សារព័ត៌មានអ៊ីរ៉ង់ Nour ថា៖ «ទីក្រុងវ៉ាស៊ីនតោន តែងតែព្យាយាមធ្វើឱ្យស្ថិរភាព និងសន្តិសុខរបស់អ៊ីរ៉ង់ចុះខ្សោយ ទោះបីជាវាមិនជោគជ័យក្ដី»។
មិនត្រឹមតែប៉ុណ្ណេះ លោក Kanaani ថែមទាំងសរសេរចោទប្រកាន់ នៅលើបណ្ដាញសង្គមអ៊ិនស្តាក្រាមរបស់លោក បន្ថែមទៀតថា មេដឹកនាំសហរដ្ឋអាមេរិក និងបណ្ដាប្រទេសនៅអឺរ៉ុបមួយចំនួន បានគាំទ្រក្រុមកុបករ ហើយមិនអើពើនឹងមនុស្សរាប់លាននាក់ផ្សេងទៀតដែលនៅតាមដងផ្លូវ និងនៅលើទីលានផ្សេងៗ ដែលគាំទ្រប្រព័ន្ធដឹកនាំរបស់អ៊ីរ៉ង់។
ការចោទប្រកាន់របស់អ៊ីរ៉ង់ ធ្វើឡើងបន្ទាប់ពីសហរដ្ឋអាមេរិក រួមទាំងប្រទេសសេរីផ្សេងទៀត បានថ្កោលទោស កោះហៅមន្រ្តីការទូត និងដាក់ទណ្ឌកម្មបន្ថែមលើអ៊ីរ៉ង់ ចំពោះការស្លាប់របស់នាង Mahsa Amini ដែលប៉ូលីសសីលធម៌អ៊ីរ៉ង់ចាប់ខ្លួន ចំពោះការពាក់ហ៊ីចាបបញ្ចេញសក់មិនសមរម្យ។ សកម្មភាពរបស់ក្រុមប្រទេសលោកខាងលិចដដែលក៏ជាការឆ្លើយតបទៅនឹងការការបង្រ្កាបយ៉ាងហិង្សាលើការតវ៉ាដោយអហិង្សាទូទាំងប្រទេស ដែលផ្ទុះឡើងដោយសារការស្លាប់នារីជនជាតិគួដរូបនេះផងដែរ។
គួរបញ្ជាក់ថា មកទល់ពេលនេះ ការតវ៉ានៅក្នុងប្រទេសអ៊ីរ៉ង់ នៅតែបន្តមិនទាន់ស្រាកស្រាន្ត និងសម្លាប់មនុស្សយ៉ាងណាស់ ៤១ នាក់ រាប់តាំងពីវាផ្ទុះឡើងនៅថ្ងៃដែលនាង Amini ត្រូវបានប្រកាសថាស្លាប់ ទី១៦ ខែកញ្ញា (យោងតាមទិន្នន័យរបស់រដ្ឋាភិបាល)។ វាគឺជាភាពចលាចលដ៏ធំបំផុតចាប់តាំងពីបាតុកម្មតវ៉ាឆ្នាំ ២០១៩ និងដឹកនាំដោយក្រុមស្រ្តី ដែលប្រឆាំងនឹងការរឹតត្បឹតសេរីភាពរបស់ខ្លួន ក្រោមប្រព័ន្ធដឹកនាំរបស់រដ្ឋាភិបាលសាធារណរដ្ឋអ៊ិស្លាមអ៊ីរ៉ង់។
យ៉ាងណាក្ដី ការប្រមូលផ្ដុំគ្នាគាំទ្ររដ្ឋាភិបាល ក៏ត្រូវបានធ្វើឡើងកាលពីថ្ងៃអាទិត្យផងដែរ ជាពិសេសនៅកណ្តាលទីក្រុងតេអេរ៉ង់។ ហើយនៅថ្ងៃដដែល អ៊ីរ៉ង់បានកោះហៅឯកអគ្គរដ្ឋទូតអង់គ្លេស និងន័រវេស ដោយចោទប្រកាន់ប្រទេសទាំង២ថាជ្រៀតជ្រែក និងផ្សាយព័ត៌មានប្រកបដោយអរិភាព ចំពោះភាពចលាចលនេះ៕
ដោយ៖ហួន ឌីណា