សេអ៊ូល៖នៅថ្ងៃអង្គារ ទី៤ ខែតុលា ឆ្នាំ២០២២ ក្រុមហ៊ុនផលិតបន្ទះឈីប សាមស៊ុង អេឡិចត្រូនិក(Samsung Electronics) បានអះអាងថា ខ្លួនគ្រោងនឹងបង្កើនសមត្ថភាពផលិតបន្ទះឈីបកម្រិតខ្ពស់ លើសពីបីដង ត្រឹមឆ្នាំ២០២៧។ ការបង្កើនសមត្ថភាពផលិត ខណៈបន្ទះឈីបមានតម្រូវការខ្លាំង បើទោះបីជាសេដ្ឋកិច្ចពិភពលោកបច្ចុប្បន្នកំពុងមានភាពតានតឹងក៏ដោយ។

រោងចក្រដ៏ធំបំផុតលំដាប់ទីពីររបស់ពិភពលោកផ្នែកផលិតបន្ទះឈីប បន្ទាប់ពីក្រុមហ៊ុនផលិតឈីបរបស់តៃវ៉ាន់TSMC កំពុងកំណត់គោលដៅទ្រង់ទ្រាយធំ ផលិតបន្ទះសៀគ្វីបច្ចេកវិទ្យាដែលមានទំហំដ៏តូចបំផុត។ បើតាមគោលដៅ គឺក្រុមហ៊ុនមានបំណងផលិតឈីប ២ណាណូម៉ែត្រ នៅឆ្នាំ២០២៥ និងបន្ទះឈីប ១,៤ណាណូម៉ែត្រ នៅឆ្នាំ២០២៧។ បន្ទះឈីបដ៏តូចទាំងនេះ នឹងត្រូវប្រើសម្រាប់ដំណើរការលើកុំព្យូទ័រ និងសម្រាប់បញ្ញាសិប្បនិម្មិត (AI)។

លោក មូនស៊ូ កាង(Moonsoo Kang) អនុប្រធាន​ប្រតិបត្តិ​នៃក្រុមហ៊ុន Samsung Electronics បាននិយាយថា “មានការវិវឌ្ឍខ្លះ (ក្នុងការដំឡើងតម្លៃ) នៅឆ្នាំនេះ ហើយតម្លៃក៏ត្រូវបានអនុវត្តតាមស្ថានភាពជាក់ស្តែង… ការបញ្ជាទិញថ្មី នឹងត្រូវបានធ្វើឡើងបន្ទាប់ពី ២ឬ៣ឆ្នាំក្រោយ ដូច្នេះផលប៉ះពាល់ដោយផ្ទាល់នៃទីផ្សារបច្ចុប្បន្ននឹងមានតិចតួច”។

ក្រុមហ៊ុន សាមស៊ុង បានចាប់ផ្តើមផលិតបន្ទះឈីបជាច្រើនជាមួយនឹងបច្ចេកវិទ្យា 3-nanometer នៅក្នុងខែមិថុនាកន្លងទៅ។ ក្រុមហ៊ុននេះ ក៏បានជួបជជែកជាមួយក្រុមហ៊ុន ដែលជាអតិថិជនរបស់ខ្លួនមួយចំនួនរួចមកហើយ​ ដែលក្នុងនោះរួមមានដូចជា ក្រុមហ៊ុន Qualcomm ក្រុមហ៊ុនTesla និងក្រុមហ៊ុនAMDជាដើម។

សាមស៊ុង ដែលជាក្រុមហ៊ុនផលិតបន្ទះឈីបដ៏ធំរបស់ពិភពលោកប្រឈមនឹងការលំបាក ដែលមិនអាចបំពេញចិត្តរបស់អតិថិជនទាក់ទងនឹងបច្ចេកវិទ្យាផលិតឈីបរបស់ខ្លួន។ អ្នកវិភាគ និយាយថាក្រុមហ៊ុននេះ បានជំរុញបច្ចេកវិទ្យាទំនើបរបស់ខ្លួនលឿនពេក ក្នុងគោលដៅប្រកួតប្រជែងជាមួយ TSMC របស់តៃវ៉ាន់។ ប៉ុន្តែបានទទួលរងមកវិញនូវផលលំបាក ដោយសារតែនៅមានបទពិសោធន៍តិចតួចក្នុងកិច្ចសហការរយៈពេលវែងជាមួយអតិថិជន។

សហនាយកក្រុមហ៊ុន Samsung របស់កូរ៉េខាងត្បូង លោក Kyung Kye-hyun បានថ្លែងប្រាប់អ្នកកាសែតថា ក្រុមផលិតបន្ទះឈីបរបស់ Samsung មានការអភិវឌ្ឍយឺតយ៉ាវ ដើរមិនទាន់ក្រុមហ៊ុនតៃវ៉ាន់ ពោលគឺក្រុមហ៊ុន Samsung នៅផលិតបន្ទះឈីបដោយបច្ចេកវិទ្យា ៥-៦ណាណូម៉ែត្រនៅឡើយ ខណៈអតិថិជនចាប់អារម្មណ៍បច្ចេកវិទ្យាឈីប ៣ណាណូម៉ែត្រជំនាន់ទី២ ដែលនឹងត្រូវផលិតនៅឆ្នាំ២០២៣។

លោកបានកត់សម្គាល់ថា តម្រូវការសម្រាប់បន្ទះឈីបកម្រិតខ្ពស់ 5-nanometer កំពុងកើនឡើងយ៉ាងឆាប់រហ័សនាពេលបច្ចុប្បន្ន ដោយសារតែការអភិវឌ្ឍខ្លាំងនៃម៉ាស៊ីនកុំព្យូទ័រ តម្រូវការសម្រាប់បញ្ញាសិប្បនិម្មិត រួមនឹងតម្រូវការនៅក្នុងបច្ចេកវិទ្យា 5G និង 6G និងសម្រាប់រថយន្តជាដើម។

លោក​បាន​បន្ត​ថា ឧស្សាហកម្ម​នេះ ​អាច​នឹង​ជួប​ការ​លំបាក ​ដើម្បីបំពេញ​តម្រូវ​ការទាំងនោះ​ បើ​ទោះ​បី​ជា​ការ​វិនិយោគ​ត្រូវបានធ្វើឡើង​ដូចការ​គ្រោង​ទុក​ក៏​ដោយ៕ ដោយ៖ យ៉ាន អាន