មនុស្ស៦នាក់បានស្លាប់និងរងរបួសធ្ងន់ ក្នុងហេតុការណ៍គ្រោះធម្មជាតិរន្ទះបាញ់នៅ ខេត្ត ស្វាយរៀង។ ហេតុការណ៍នោះបានកើតឡើងកាលពីថ្ងៃទី៥ខែតុលា ឆ្នាំ២០២២ ស្ថិតនៅភូមិ រោទ៍ ឃុំញរ ស្រុកកំពង់រោទ៍ ខេត្តស្វាយរៀង។

បុរសម្នាក់ឈ្មោះ ឃឹម សាន អាយុ៦៩ឆ្នាំ បាន ស្លាប់, ចំណែកមនុស្ស៥នាក់ទៀត បានរងរបួសធ្ងន់និងស្រាល ខណៈដែលពួកគេកំពុង ជ្រក ភ្លៀងក្រោមដើមឈើអាកាស្យាក្នុងពេលមេឃធ្លាក់ភ្លៀងនិងមានផ្លេកបន្ទោរ និងពេលនោះ ស្រាប់តែមានរន្ទះបាញ់តែម្តង។ គ្រោះរន្ទះបាញ់ បានសម្លាប់មនុស្សរៀងរាល់ឆ្នាំជាពិសេស ក្នុងរដូវវស្សា។

សេចក្តីរាយការណ៍បានឱ្យដឹងថាក្នុងរយៈពេល៦ខែដើមឆ្នាំ២០២២ គ្រោះថ្នាក់ រន្ទះបាញ់កើតឡើងចំនួន ៦១លើក, ធ្វើឲ្យខូចខាតផ្ទះ ១១ខ្នង ធ្វើឱ្យមនុស្សស្លាប់ ៣២នាក់ ធ្វើឱ្យមនុស្សរបួស ២៦នាក់ និងធ្វើឱ្យគោក្របីងាប់ ៦៩ក្បាល។