កូឡាឡាំពួរ៖ ការរំលាយនេះត្រូវបានដឹងថា ត្រួសត្រាយផ្លូវសម្រាប់ការបោះឆ្នោតសកល លើកទី១៥របស់ម៉ាឡេស៊ី ដែលនឹងត្រូវរៀបចំឡើងនៅឆ្នាំនេះ។

នាយករដ្ឋមន្ត្រីម៉ាឡេស៊ី លោក Ismail Sabri Yaakob បានប្រកាសថា សភាត្រូវបានរំលាយ នៅថ្ងៃចន្ទ ទី១០ ខែតុលា ដោយបើកផ្លូវសម្រាប់ការបោះឆ្នោតជាតិ ដែលនឹងប្រព្រឹត្តទៅមុនដំណាច់ឆ្នាំនេះ។

ថ្លែងក្នុងសុន្ទរកថាតាមទូរទស្សន៍ជាតិ នៅម៉ោង ៣ រសៀល លោក Ismail Sabri បាននិយាយថា លោកបានស្វែងរកការយល់ព្រមពី ព្រះមហាក្សត្រនៅពេលថ្ងៃត្រង់ កាលពីថ្ងៃអាទិត្យ ដើម្បីរំលាយសភា ហើយសំណើរបស់លោកត្រូវបានទទួលយក។

លោកបាននិយាយថា “ខ្ញុំលើកទឹកចិត្តឱ្យរដ្ឋាភិបាលរដ្ឋទាំងអស់ លើកលែងតែរដ្ឋាភិបាលនៃរដ្ឋ Sabah, Sarawak, Johor និង Melaka ឱ្យរំលាយសភារដ្ឋរៀងៗខ្លួន ក្នុងពេលតែមួយ”។ មានការរំពឹងទុកយ៉ាងខ្លាំងអំពីការរំលាយសភាដើម្បីត្រួសត្រាយផ្លូវសម្រាប់ការបោះឆ្នោតសកលលើកទី ១៥ ។

កាលពីថ្ងៃអាទិត្យ កាសែត New Straits Times ដែលដកស្រង់ប្រភពមួយបានរាយការណ៍ថា លោក Ismail Sabri បានចូលគាល់ព្រះមហាក្សត្រនៅពេលរសៀល។

របាយការណ៍បានបន្តថា លោកនាយករដ្ឋមន្ត្រីបានស្វែងរកព្រះមហាក្សត្រដើម្បីសុំការយល់ព្រមរំលាយសភា ។ ការស្នើសុំនេះបានកើតឡើងបន្ទាប់ពីកិច្ចប្រជុំរបស់ពួកគេ កាលពីថ្ងៃព្រហស្បតិ៍ សប្តាហ៍មុន ប៉ុន្តែ វិមាន Istana Negara របស់ព្រះមហាក្សត្រ បានអះអាងថា វាគឺជាការរាយការណ៍សង្ខេប មុនគណៈរដ្ឋមន្ត្រីដែលជាផ្នែកមួយនៃកិច្ចប្រជុំប្រចាំសប្តាហ៍ របស់ព្រះមហាក្សត្រ ដើម្បីពិភាក្សាអំពីបញ្ហាទាក់ទងនឹងរដ្ឋាភិបាល។

កាលពីថ្ងៃសុក្រសប្តាហ៍មុន រដ្ឋាភិបាលរបស់លោក Ismail Sabri បានបង្ហាញថវិកាចំនួន ៣៧២.៣ ពាន់លាន RM (៨០.០៦ ពាន់លានដុល្លារ) សម្រាប់ឆ្នាំ ២០២៣ ចំពេលបរិយាកាសពិភពលោកមិនច្បាស់លាស់ ហើយរំពឹងថា នឹងមានកំណើនយឺត ហើយវាគឺជាថវិកាដ៏ធំបំផុតមួយក្នុងប្រវត្តិសាស្ត្ររបស់ប្រទេសម៉ាឡេស៊ី៕ ប្រភពពី CNA, ដោយ៖ សារ៉ាត