អាស៊ាន៖ តម្រូវការថាមពលនៅក្នុងបណ្តាប្រទេសអាស៊ីអាគ្នេយ៍ អាចនឹងកើនឡើង ៣ដងនៅឆ្នាំ ២០៥០។ មិនតែប៉ុណ្ណោះ អាស៊ីអាគ្នេយ៍ អាចក្លាយជាអ្នកនាំចូលឧស្ម័នធម្មជាតិ និងធ្យូងថ្មដ៏ច្រើនមុនឆ្នាំ ២០៥០ទៅទៀត ប្រសិនបើតំបន់នេះមិនអភិវឌ្ឍប្រភពថាមពលផ្សេងជំនួសទេនោះ។ នេះបើតាមការរកឃើញរបស់ការសិក្សាដោយស្ថាប័នថាមពលក្នុងតំបន់។

សម្រាប់ក្រុមប្រទេសចំនួន១០ នៃសមាគមប្រជាជាតិអាស៊ីអាគ្នេយ៍ (អាស៊ាន) ការធ្វើពិពិធកម្មប្រភពថាមពលនឹងមានសារៈសំខាន់ មិនត្រឹមតែដើម្បីកាត់បន្ថយការបំភាយឧស្ម័នប៉ុណ្ណោះទេ ប៉ុន្តែក៏ដើម្បីបំពេញតម្រូវការថាមពលដែលកំពុងកើនឡើងជាលំដាប់ផងដែរ។ នេះបើតាមលោក នុគី អេកយ៉ា អ៊ុតាម៉ា (Nuki Agya Utama) នាយកប្រតិបត្តិនៃមជ្ឈមណ្ឌលថាមពលអាស៊ាន (ACE) លើកឡើងកាលពីសប្តាហ៍មុន។

នៅក្នុងបទសម្ភាសន៍មួយ លោកនិយាយថា៖ «តម្រូវការកំពុងកើនឡើង… ស្របនឹងអ្វីដែលយើងត្រូវផ្តល់ការផ្គត់ផ្គង់ប្រកបដោយស្ថិរភាព ដែលនឹងក្លាយជាបញ្ហា ប្រសិនបើការផ្គត់ផ្គង់ពឹងផ្អែកលើប្រភពតែមួយ ឬពីរនោះ»។

យោងតាមការសិក្សាថ្មីមួយរបស់ ACE កំណើនសេដ្ឋកិច្ចយ៉ាងឆាប់រហ័សនៅក្នុងតំបន់អាស៊ីអាគ្នេយ៍ នឹងជំរុញការប្រើប្រាស់ថាមពលសរុបដល់ប្រមាណ ១,២៨ ពាន់លានតោន នៃសមមូលប្រេងនៅឆ្នាំ ២០៥០ ក្រោមសេណារីយ៉ូមូលដ្ឋានមួយ។

ទន្ទឹមនឹងនេះ បើគ្មានរបកគំហើញ ឬការធ្វើពិពិធកម្មសំខាន់ៗទេ អាស៊ីអាគ្នេយ៍អាចក្លាយជាអ្នកនាំចូលឧស្ម័នធម្មជាតិច្រើននៅឆ្នាំ ២០២៥ និងធ្យូងថ្មនៅឆ្នាំ ២០៣៩។ អាស៊ីអាគ្នេយ៍ គឺជាគោលដៅដ៏ធំរបស់ឥណ្ឌូណេស៊ីដែលជាប្រទេសនាំចេញធ្យូងថ្មកំពូលរបស់ពិភពលោក ។

គោលនយោបាយអន្តរាគមន៍ គឺត្រូវការជាចាំបាច់ដើម្បីជួយពន្លឿនការអភិវឌ្ឍនៃថាមពលកកើតឡើងវិញ និងថាមពលជំនួសផ្សេងទៀតនៅក្នុងតំបន់។ បើគ្មានគោលនយោបាយអន្តរាគមន៍ទេ នោះចំណែករបស់អាស៊ាននៃថាមពលកកើតឡើងវិញ នឹងមានត្រឹមតែ ១៤,៤ភាគរយ នៃការផ្គត់ផ្គង់ថាមពលបឋមសរុបនៅឆ្នាំ ២០៥០ ដែលបានផ្លាស់ប្តូរពី ១៤,២ភាគរយក្នុងឆ្នាំ២០២០ និងតិចជាងគោលដៅរបស់អាស៊ានដែលកំណត់យក ២៣ភាគរយ។

នាយកប្រតិបត្តិ ACE និយាយថា អាស៊ាន ត្រូវពិចារណាលើការដំឡើងរោងចក្រថាមពលនុយក្លេអ៊ែរដែលមានសមត្ថភាពប្រមាណ ៤ ជីហ្គាវ៉ាត់ និងត្រូវអភិវឌ្ឍហេដ្ឋារចនាសម្ព័ន្ធផងដែរសម្រាប់ប្រភពដូចជា ថាមពលវារីអគ្គិសនី និងថាមពលកម្តៅផែនដី ដែលតំបន់នេះមានសក្តានុពលធំជាងគេទីពីរ។

តំបន់អាស៊ីអាគ្នេយ៍ ក៏គួរតែអភិវឌ្ឍកន្លែងស្តុកថាមពលផងដែរ ដើម្បីបង្កើនប្រសិទ្ធភាពការប្រើប្រាស់ថាមពលដើរដោយពន្លឺព្រះអាទិត្យ និងខ្យល់នាពេលអនាគត។ សម្រាប់ឥន្ធនៈដឹកជញ្ជូនវិញ លោក នុគី និយាយថា តំបន់អាស៊ីអាគ្នេយ៍ គួរតែបង្កើនការប្រើប្រាស់ឥន្ធនៈជីវៈឥន្ធនៈ និងជីវអេតាណុល ព្រមទាំងបង្កើនការប្រើប្រាស់រថយន្តអគ្គិសនីឱ្យបានដល់ ២០ភាគរយ នៅឆ្នាំ២០៥០ដើម្បីកាត់បន្ថយការប្រើប្រាស់ឥន្ធនៈផូស៊ីល៕
ដោយៈលី លីយ៉ា
ប្រភពព័ត៌មាន៖ Southeast Asia countries need energy diversification as demand seen surging