តុលាការកំពូលឥណ្ឌាបរាជ័យលើសាលក្រមជុំវិញបំរាមមិនឱ្យពាក់ស្បៃរុំក្បាលក្នុងថ្នាក់រៀន
ឥណ្ឌា៖ តុលាការកំពូលរបស់ប្រទេសឥណ្ឌា បានបរាជ័យក្នុងការប្រកាសសាលក្រមណាមួយ ជុំវិញការសម្រេចកុំឱ្យសិស្សមូស្លីមពាក់ស្បៃរុំក្បាល (ហ៊ីចាប) នៅតាមសាលារៀន និងមហាវិទ្យាល័យ ដោយចៅក្រម២រូបជំទាស់គ្នាទៅវិញទៅមក។
ចៅក្រមម្នាក់ដែលតម្កល់ដីកាតុលាការជាន់ខ្ពស់នៃរដ្ឋ Karnataka ចាប់តាំងពីខែមីនា បានលើកឡើងថា ហ៊ីចាបមិនសំខាន់ចំពោះសាសនាអ៊ិស្លាមនោះទេ។ ប៉ុន្តែចៅក្រមមួយរូបទៀតប្រកែកថា ដីការបស់តុលាការជាន់ខ្ពស់គឺខុស ហើយការពាក់ហ៊ីចាបគឺជាជម្រើស។
ពីតំបូងឡើយ សាលក្រមកាលពីថ្ងៃព្រហស្បតិ៍ ត្រូវគេរំពឹងថានឹងបញ្ចប់ការដេញដោយគ្នាអស់រយៈពេលជាង ១០ ខែមកនេះ។ ប៉ុន្តែការវិវឌ្ឍចុងក្រោយនេះ មានន័យថា ការជជែកដេញដោលលើហ៊ីចាបនឹងបន្តនៅក្នុងចមណោមសាធារណជន និងប្រព័ន្ធតុលាការរបស់ឥណ្ឌា ដោយសារចៅក្រមមិនអាចយល់ស្របលើសេចក្តីសម្រេចនោះ ឥឡូវនេះពួកគេបានស្នើសុំឱ្យប្រធានយុត្តិធម៌នៃប្រទេសឥណ្ឌា យកបញ្ហានេះទៅដោះស្រាយនៅស្ថាប័នធំជាងខ្លួន។
ការសម្រេចចិត្តរបស់ចៅក្រមនៃតុលាការកំពូល លោក Hemant Gupta ដែលជាចៅក្រមមេ ដើម្បីតម្កល់សេចក្តីសម្រេចរបស់តុលាការកំពូល ត្រូវបានគេរំពឹងទុកជាមុនយ៉ាងច្បាស់ហើយ។ ក្នុងអំឡុងសវនាការកាលពីដើមខែកញ្ញា សម្ដីមួយចំនួនរបស់លោកត្រូវបានគេយកធ្វើចុះផ្សាយក្នុងចំណងជើងធំៗ បន្ទាប់ពីលោកប្រាប់ទៅមេធាវីម្នាក់ ដែលការពារសិទ្ធិពាក់ហ៊ីចាបថា៖ «យើងមិនអាចបញ្ចប់ទៅដោយគ្មានហេតុផលនោះទេ។ បើអ្នកនិយាយថាសិទ្ធិស្លៀកពាក់ជាសិទ្ធិមូលដ្ឋាន នោះសិទ្ធិស្រាតក៏ក្លាយជាសិទ្ធិមូលដ្ឋានដែរ»។
ប៉ុន្តែចៅក្រមទី២ Sudhanshu Dhulia ថ្លែងក្នុងដីការបស់លោកថា តុលាការជាន់ខ្ពស់បានដើរផ្លូវខុសដោយផ្តោតថា ហ៊ីចាបគឺជាការអនុវត្តសាសនាដ៏សំខាន់ ហើយថាការពាក់ហ៊ីចាបគឺជាជម្រើស គ្មានអ្វីច្រើនពីនេះនោះទេ។
ជម្លោះទាក់ទាក់ទងនឹងការពាក់ ឬមិនពាក់ហ៊ីចាប បានផ្ទុះឡើងក្នុងរដ្ឋ Karnataka ក្រោយពេលមហាវិទ្យាល័យរដ្ឋមួយក្នុងស្រុក Udupi បានហាមមិនឱ្យនិស្សិតស្រីម៉ូស្លីម ៦ នាក់ ពីការពាក់ហ៊ីចាបក្នុងថ្នាក់រៀន។ ប៉ុន្តែនិស្សិតស្រីទាំងនោះស្នើថា ពួកគេគួរតែត្រូវបានអនុញ្ញាតឱ្យពាក់ហ៊ីចាបក្នុងថ្នាក់រៀន ដោយសារតែមានគ្រូជាបុរស២-៣ នាក់ដែរ។
ក្រោយការស្នើសុំប្រឆាំងនឹងបំរាមនេះ និស្សិតហិណ្ឌូចាប់ផ្តើមក្នុងមហាវិទ្យាល័យ ចាប់ផ្ដើមនាំគ្នាពាក់កន្សែងបង់កពណ៌ទឹកក្រូច ដែលជាពណ៌ទាក់ទងនឹងសាសនាហិណ្ឌូ។ បន្ទាប់ពីនោះទៀត ក្រុមស្តាំនិយមទាំងសងខាង បានធ្វើសេចក្តីថ្លែងការណ៍បង្កហេតុរៀងៗខ្លួន ហើយលើសពីនេះ ក្រុមអ្នកតវ៉ាពាក់កន្សែងរុំក្បាលហិណ្ឌូ ក៏ប្រមូលផ្ដុំគ្នាតវ៉ានៅរដ្ឋផ្សេងទៀតផងដែរ។ ដោយខ្លាចមានអំពើហិង្សា រដ្ឋាភិបាលរដ្ឋ Karnataka បានបិទសាលាវិទ្យាល័យ និងមហាវិទ្យាល័យអស់ជាច្រើនថ្ងៃ។
ទោះបីជាយ៉ាងណាក៏ដោយ ក្រុមអ្នកតវ៉ាស្ត្រីមូស្លីមនៅតែជំទាស់នឹងបំរាមក្នុងតុលាការ ដោយនិយាយថា វាជាការរើសអើង ហើយប្រឆាំងនឹងសិទ្ធិសេរីភាពក្នុងការបញ្ចេញមតិ និងសាសនារបស់ពួកគេ។ ពួកគេបានអះអាងថា រដ្ឋធម្មនុញ្ញរបស់ឥណ្ឌាបានផ្តល់សិទ្ធិឱ្យពួកគេស្លៀកពាក់តាមការពេញចិត្ត ហើយជំនឿរបស់ពួកគេ តម្រូវឱ្យពួកគេគ្របក្បាល។
ប៉ុន្តែរដ្ឋាភិបាលឥណ្ឌាបានប្រកែកថា រដ្ឋរៀងខ្លួនមានសិទ្ធិកំណត់ឯកសណ្ឋានសាលា និងមហាវិទ្យាល័យ។ តុលាការជាន់ខ្ពស់រដ្ឋ Karnataka យល់ស្របថានឹងការលើកឡើងនេះ ហើយហាមមិនឱ្យសិស្សស្រីពាក់ហ៊ីចាបចូលរៀន ដែលធ្វើឱ្យសិស្សមូស្លីមជាច្រើនទៅបានទៅរៀន និងខានប្រឡង៕ ដោយ ហួន ឌីណា
