អង្គការស្បៀង និងរដ្ឋាភិបាលកម្ពុជាអំពាវនាវឲ្យមានការវិនិយោគលើការអភិវឌ្ឍប្រព័ន្ធស្បៀងបន្ថែមទៀត
ភ្នំពេញ៖ក្រសួងកសិកម្ម រក្ខាប្រមាញ់ និងនេសាទ (MAFF) អង្គការស្បៀង និងកសិកម្មនៃសហប្រជាជាតិ(FAO)និងកម្មវិធីស្បៀងអាហារពិភពលោក (WFP) បានអំពាវនាវឱ្យមានការវិនិយោគបន្ថែមទៀត លើការពង្រឹងប្រព័ន្ធស្បៀង ដើម្បីលើកកម្ពស់ភាពធន់នឹងវិបត្តិនានា។ នេះបើតាមសេចក្ដីប្រកាសព័ត៌មានរួមដែលចុះនៅថ្ងៃទី១៦ ខែតុលា ឆ្នាំ២០២២។
សេចក្ដីប្រកាសព័ត៌មាននេះ ចេញផ្សាយមួយថ្ងៃមុនការប្រារព្ធទិវាស្បៀងអាហារពិភពលោក ដែលនឹងត្រូវធ្វើឡើងថ្ងៃទី១៧ ខែតុលា ក្នុងគោលបំណងដើម្បីធានាបាននូវ សន្តិសុខស្បៀង អាហារូបត្ថម្ភ និងដើម្បីទប់ទល់នឹងវិបត្តិនានា។
បើតាមសេចក្ដីប្រកាសព័ត៌មានដដែលបង្ហាញថា ការកើនឡើងនៃតម្លៃស្បៀងអាហារគឺមានកត្តាជាច្រើន ដូចជាបញ្ហាជំងឺកូវីដ-១៩បញ្ហាសង្គ្រាមនៅអ៊ុយក្រែននិងបញ្ហាគ្រោះមហន្តរាយដែលទាក់ទងនឹងអាកាសធាតុ។
កត្តាទាំងអស់នេះហើយ ដែលធ្វើប្រជាជនងាយរងគ្រោះ និងប្រជាជនដែលពឹងផ្អែកលើកសិកម្មជារបរចិញ្ចឹមជីវិត រងហានិភ័យខ្ពស់ដូចជា ការធ្លាក់ចុះផលិតផលកសិកម្ម ដែលធ្វើឲ្យធនធានហិរញ្ញវត្ថុតិចតួចជាងមុន ក្នុងការចំណាយលើធាតុចូលកសិកម្ម។
ជុំវិញបញ្ហានេះលោក អែនតូនីញ៉ូ ស៊្យែវ៉ន តំណាងស្ដីទីនៃអង្គការ FAO ប្រចាំកម្ពុជា បានពន្យល់ថា ប្រព័ន្ធស្បៀងបានផ្សារភ្ជាប់ទៅនឹងវិស័យផ្សេងៗទៀតជាច្រើននៃជីវិត សេដ្ឋកិច្ច ហើយក៏បានផ្ដល់អត្ថប្រយោជន៍ដល់មនុស្សគ្រប់ៗរូប រួមទាំងប្រជាជនងាយរងគ្រោះផងដែរ។
លោក អែនតូនីញ៉ូ ស៊្យែវ៉នថា៖ «អង្គការ FAO ត្រៀមខ្លួនជាស្រេចក្នុងការគាំទ្ររដ្ឋាភិបាលកម្ពុជា អនុវត្តផែនទីបង្ហាញផ្លូវ ដើម្បីពង្រឹងប្រព័ន្ធស្បៀង និងពង្រឹងដល់ភាពអង់អាចដល់កសិករខ្នាតតូច»។
ចំណែកអ្នកស្រី អានឡ័រ ឌូវែល នាយិការងនៃកម្មវិធីស្បៀងអាហារពិភពលោកប្រចាំកម្ពុជា បានថ្លែងថា៖ «WFP នឹងបន្តគាំទ្ររដ្ឋាភិបាលកម្ពុជា ក្នុងការបន្តធ្វើសកម្មភាពយ៉ាងសកម្មដើម្បីឆ្លើយតបទៅនឹងវិបត្តិកូវីដ-១៩ ដើម្បីគាំទ្រប្រជាជនខ្មែរដែលត្រូវបានគេមើលរំលង។ ដូច្នេះហើយ ការវិនិយោគលើការអភិវឌ្ឍប្រព័ន្ធស្បៀង និងខ្សែច្រវាក់ផ្គត់ផ្គង់ គឺមានសារៈសំខាន់ណាស់នាពេលបច្ចុប្បន្ន ដើម្បីធានាបាននូវនិរន្តរភាព និងភាពធន់នាថ្ងៃអនាគត»។
រីឯ ឯកឧត្តម ឱម គឹមស៊ា រដ្ឋលេខាធិការដ្ឋាននៃក្រសួងកសិកម្ម រុក្ខាប្រមាញ់ និងនេសាទ បានសង្កត់ធ្ងន់ថា៖ «យើងត្រូវពង្រឹងខ្សែច្រវាក់ផ្គត់ផ្តង់ផលិតកម្មស្បៀង ដើម្បីធានាថាប្រព័ន្ធស្បៀងអាចផ្ដល់នូវស្បៀងអាហារប្រកបដោយគុណភាព និងសារធាតុចិញ្ចឹមដល់ពលរដ្ឋកម្ពុជា តាមរយៈការបង្កើននវានុវត្តន៍ និងការវិនិយោគលើប្រព័ន្ធឌីជីថល»។
សូមបញ្ជាក់ថា យោងតាមរបាយការណ៍បច្ចុប្បន្នភាពទីផ្សារ WFP នាពេលថ្មីៗនេះ តម្លៃអង្ករដែលជាមូលដ្ឋានគ្រឹះនៃរបបអាហារនៅកម្ពុជា គឺនៅថេរ។ ប៉ុន្តែតម្លៃអាហារដែលសម្បូរជីវជាតិ ប្រជាជននិយមបរិភោគដូចជា ពងទា បន្លែ និងត្រកួនបានកើនឡើង ២០.៨ភាគរយ និង៣០.៧ភាគរយ ពីមួយឆ្នាំទៅមួយឆ្នាំ។ តម្លៃប្រេងឆាបានកើនឡើងតម្លៃខ្លាំងជាងឆ្នាំមុន ៣៩.៧ភាគរយ។ មិនត្រឹមតែប៉ុណ្ណោះ កង្វះខាតអាហារ ចំណីសត្វ ឥន្ធនៈ ជី និងហិរញ្ញវត្ថុ កំពុងបង្កការគំរាមគំហែងថ្មីទៀតដល់ប្រព័ន្ធស្បៀង៕ ដោយ៖ ជា សុខនី
