តួកគី៖ ចំនួនអ្នកស្លាប់នៅក្នុងហេតុការណ៍ផ្ទុះឆេះអណ្ដូងរ៉ែធ្យូងថ្ម កើនឡើងដល់៤១នាក់
តួកគី៖ នៅប្រទេសតួកគី ចំនួនអ្នកស្លាប់នៅក្នុងហេតុការណ៍ផ្ទុះឆេះក្នុងអណ្ដូងរ៉ែធ្យូងថ្មកាលពីថ្ងៃសុក្រ ទី១៤ ខែតុលា ឆ្នាំ២០២២ បានកើនឡើងដល់ចំនួន៤១នាក់ហើយ។ ក្រៅពីអ្នកស្លាប់ របាយការណ៍ចុងក្រោយបានឱ្យដឹងអំពីចំនួននាក់រងរបួសចំនួន១១នាក់។ ទិន្នន័យអ្នកស្លាប់និងអ្នករបួសចុងក្រោយនេះ បានធ្វើឱ្យហេតុការណ៍ផ្ទុះឆេះនៅក្នុងអណ្ដូងរ៉ែដែលកើតឡើងកាលពីថ្ងៃសៅរ៍កន្លងទៅ ក្លាយទៅទៅហេតុការណ៍សោកនាដកម្មដ៏អាក្រក់បំផុតមិនធ្លាប់មាន នៅក្នុងប្រវត្តិសាស្ត្រនៃវិស័យរុករករ៉ែរបស់តួកគី គិតត្រឹមរយៈពេល៨ឆ្នាំចុងក្រោយនេះ។
បើតាមមន្ដ្រីជំនាញ ហេតុការណ៍ផ្ទុះនៅក្នុងអណ្ដូងរ៉ែដែលកើតឡើងនៅថ្ងៃសុក្រ ក្នុងទីក្រុង Amasra ក្បែរសមុទ្រខ្មៅ ទំនងជាអាចកើតឡើងដោយសារតែការដុតឧស្ម័ននៅខាងក្នុងអណ្ដូងរ៉ែនោះ។
ប្រធានាធិបតីតួកគី លោក រ៉ាហ្ស៊ីប តាយីប អ៊ែរដូហ្គាន់ បានធ្វើដំណើរទៅដល់កន្លែងកើតហេតុនៅថ្ងៃសៅរ៍ ទី១៥ ខែតុលា ដោយមានការអមដំណើរពីមន្ដ្រីពាក់ព័ន្ធ ដូចជាក្រុមអ្នករុករករ៉ែ និងក្រុមប្រតិបត្តិការសង្គ្រោះបន្ទាន់។ ក្រោយពីបានប្រកាសតួលេខអ្នកស្លាប់ដែលកើនឡើងដល់៤១នាក់ លោកប្រមុខដឹកនាំតួកគីបានសន្យាថា នឹងបើកការស៊ើបអង្កេតលើសោកនាដកម្មនេះ ដើម្បីស្វែងរកមុខអ្នកទទួលខុសត្រូវមកទទួលទោសចំពោះមុខច្បាប់។
រដ្ឋមន្ដ្រីក្រសួងមហាផ្ទៃតួកគី លោក Suleyman បានថ្លែងប្រាប់អ្នកសារព័ត៌មាននៅថ្ងៃសៅរ៍ ទី១៥ ខែតុលាថា ក្រុមការងាររុករកបានជួយសង្គ្រោះអ្នកធ្វើការនៅក្នុងអណ្ដូងរ៉ែនោះបានចំនួន ១១នាក់ ហើយបានបញ្ជូនពួកគេទៅកាន់មន្ទីរពេទ្យនៅក្បែរកន្លែងកើតហេតុ និងមន្ទីរពេទ្យនៅទីក្រុងអ៊ីស្តង់ប៊ុល។ បើតាមលោករដ្ឋមន្ដ្រីដដែល ម្នាក់នៅក្នុងចំណោមអ្នកទាំង១១នាក់នោះ រងរបួសស្រាល និងបានចាកចេញពីមន្ទីរពេទ្យហើយនៅថ្ងៃសៅរ៍ ទី១៥ ខែតុលា។ ទិន្នន័យផ្ដល់ឱ្យដោយរដ្ឋមន្ដ្រីក្រសួងថាមពលតួកគី បញ្ជាក់ថា មានមនុស្សយ៉ាងហោចណាស់១១០នាក់ ធ្វើការនៅក្នុងអណ្ដូងរ៉ែដែលផ្ទុះឆេះនោះ។ លោករដ្ឋមន្ដ្រីរំឭកថា លោកទើបតែបានមកធ្វើទស្សនកិច្ចនៅអណ្ដូងរ៉ែនេះកាលពីបីសប្ដាហ៍មុន និងបានជួបសំណេះសំណាលជាមួយបុគ្គលិកដែលធ្វើការនៅក្នុងអណ្ដូងរ៉ែប្រកបដោយភាពស្និទ្ធស្នាល។ នៅពេលដឹងថា ភ្លើងឆេះនៅក្នុងអណ្ដូងរ៉ែនោះមិនទាន់រលត់នៅឡើយ លោករដ្ឋមន្ដ្រីបានសម្រក់ទឹកភ្នែក ដោយបញ្ជាក់ថា ចំនួនអ្នកស្លាប់ទំនងជាអាចនឹងបន្តកើនឡើងទៀតដោយចៀសពុំរួច៕ ដោយ៖ កែវ កិរិយា
