ឥណ្ឌូណេស៊ីនឹងវាយកម្ទេចកីឡដ្ឋានបាល់ទាត់ដែលមនុស្សរត់ជាន់គ្នា ស្លាប់អស់ ១៣០ នាក់
ឥណ្ឌូនេស៊ី៖ ប្រធានាធិបតីឥណ្ឌូណេស៊ី លោក ចូកូ វីដូដូ ថ្លែងនៅពីថ្ងៃអង្គារទី ១៨ ខែតុលានេះថា ឥណ្ឌូណេស៊ីនឹងវាយកម្ទេចចោលនូវកីឡដ្ឋានបាល់ទាត់ Kanjuruhan នៅក្រុង Malaang បន្ទាប់ពីការរត់ជាន់គ្នាបានកើតឡើងនិងសម្លាប់មនុស្សជាង ១៣០ នាក់កាលពីដើមខែ ហើយសាងសង់កីឡដ្ឋានថ្មីមួយទៀតតាមស្ដង់ដាររបស់ហ្វីហ្វា (FIFA)។
លោក វីដូដូ បានថ្លែងយ៉ាងដូច្នេះ ក្នុងអំឡុងពេលធ្វើសន្និសីទកាសែត បន្ទាប់ពីជួបជាមួយលោក Gianni Infantino ប្រធានស្ថាប័នគ្រប់គ្រងបាល់ទាត់ពិភពលោក FIFA។ លោកបានអះអាងថា លោកបានយល់ព្រមជាមួយ លោក Infantino លើការផ្លាស់ប្តូរដ៏សំខាន់ចំពោះរបៀបគ្រប់គ្រងកីឡាបាល់ទាត់នៅឥណ្ឌូនេស៊ី ដោយស្របតាមស្ដង់ដាររបស់ FIFA ។
ជំនួបរវាងលោក វីដូដូ និងលោក Infantino ធ្វើឡើងបន្ទាប់ពីឥណ្ឌូនេស៊ី និង FIFA បានយល់ព្រមបង្កើតក្រុមការងាររួមគ្នាមួយ ក្រោយសោកនាដកម្មនៅកីឡដ្ឋាន ហើយខណៈដែល ឥណ្ឌូណេស៊ីរៀបចំធ្វើជាម្ចាស់ផ្ទះសម្រាប់ការប្រកួតបាល់ទាត់ពិភពលោកសម្រាប់កីឡាករអាយុក្រោម ២០ ឆ្នាំនៅឆ្នាំក្រោយ។
សូមបញ្ចាក់ថា ការរត់ជាន់គ្នាបានកើតឡើងបន្ទាប់ពីការប្រកួតបាល់ថ្ងៃទី ០១ ខែតុលា ដោយគេបន្ទោសទៅលើប៉ូលីស ដែលបាញ់ឧស្ម័នបង្ហូរទឹកភ្នែកនៅក្នុងកីឡដ្ឋាន ដែលជាវិធានការគ្រប់គ្រងហ្វូងមនុស្ស ហាមឃាត់ដោយ FIFA។ លោក Infantino ថ្លែងនៅពេលឈរជាមួយលោក វីដូដូ ថា អាទិភាពទី១របស់ FIFA គឺធានាសុវត្ថិភាពទាំងកីឡាករ និងអ្នកគាំទ្រនៅឥណ្ឌូណេស៊ី។
លោកបន្តថា៖ «ឥណ្ឌូណេស៊ីគឺជាប្រទេសបាល់ទាត់ជាប្រទេសមនុស្សជាង១០០លាននាក់ មានចំណូលលើបាល់ទាល់។យើងត្រូវធានាសុវត្ថិភាពជូនពួកគេ ដោយនៅពេលគេមើលការប្រកួតគ្នា គេត្រូវមានសុវត្ថិភាព»។ បន្ទាប់ពីរងសម្ពាធឱ្យពន្យល់ពីអ្វីដែលបណ្តាលឱ្យមានការរត់ជាន់គ្នាក្នុងកីឡដ្ឋានដ៏សាហាវបំផុតមួយរបស់ពិភពលោក ក្រុមស្វែងរកការពិត ដែលបង្កើតឡើងដោយរដ្ឋាភិបាលឥណ្ឌូណេស៊ី បានចេញផ្សាយរបាយការណ៍មួយ កាលពីសប្តាហ៍មុនដែលសន្និដ្ឋានថា ការប្រើប្រាស់ឧស្ម័នបង្ហូរទឹកភ្នែកហួសហេតុ និងខ្វល់ គឺជាមូលហេតុនៃការស្លាប់។ របាយការណ៍ក៏បានកំណត់កត្តារួមចំណែកផ្សេងទៀត ដូចជាដាក់ចំនួនអ្នកចូលរួមលើសចំណុះ បិទសោរទ្វារចេញចូល និងរៀបចំការប្រកួតនៅពេលយប់ ដើម្បីទទួលបានការវាយតម្លៃការប្រកួតឱ្យកាន់តែប្រសើរ ទោះបីជាមានការស្នើសុំពីប៉ូលីសឱ្យរៀបចំការប្រកួតនៅពេលថ្ងៃក៏ដោយ៕ ដោយ៖ ហួន ឌីណា