រុស្ស៊ីពិចារណាវិធានការវែងឆ្ងាយលើការចោទប្រកាន់ដែលថា អង់គ្លេសវាយប្រហារបំពង់បង្ហូរហ្គាស Nord Stream
រុស្ស៊ី៖មន្រ្តីជាន់ខ្ពស់នៃប្រទេសរុស្ស៊ីបានអះអាងកាលពីថ្ងៃអង្គារទី០១ខែវិច្ឆិកានេះថា ខ្លួនកំពុងពិចារណាលើ «ជំហានវែងឆ្ងាយ» ដើម្បីចាត់វិធានការ ទាក់ទងនឹងការចោទប្រកាន់របស់ខ្លួនដែលថា ចក្រភពអង់គ្លេសជាអ្នកទទួលខុសត្រូវចំពោះការវាយប្រហារលើបំពង់បង្ហូរហ្គាស Nord Stream ។
ការអះអាងនេះ ធ្វើឡើងបន្ទាប់ពីក្រសួងការពារជាតិរុស្ស៊ីបានលើកឡើងកាលពីថ្ងៃសៅរ៍ថា បុគ្គលិកកងទ័ពជើងទឹកអង់គ្លេស បានបំផ្ទុះបំពង់បង្ហូរ Nord Stream នៅខែកញ្ញា។
អ្នកនាំពាក្យវិមានក្រឹមឡាំង លោក ឌ្មីទ្រី ប៉េស្កូវ ថ្លែងប្រាប់អ្នកយកព័ត៌មានថា៖ «មានភស្តុតាងដែលថា ចក្រភពអង់គ្លេស មានជាប់ពាក់ព័ន្ធក្នុងការបំផ្លិចបំផ្លាញ ជាអំពើភេរវកម្មប្រឆាំងនឹងហេដ្ឋារចនាសម្ព័ន្ធថាមពលដ៏សំខាន់»។ លោកបន្តថា៖ «សកម្មភាពបែបនេះមិនអាចទុកមួយឡែកបានទេ។ ជាការពិតណាស់ យើងនឹងគិតអំពីជំហានវែងឆ្ងាយ ដោយមិននៅស្ងៀមនោះទេ»។
ការអះអាងរបស់រុស្ស៊ី ធ្វើឡើងដោយមិនផ្តល់ភ័ស្តុតាងឱ្យបានជាក់លាក់នោះទេ ជុំវិញការវាយប្រហារដែលធ្វើឱ្យបំពង់បង្ហូរហ្គាសតម្លៃពាន់លានដុល្លារ Nord Stream 1 និង Nord Stream 2 ត្រូវធ្លាយនោះទេ។
ចំណែកឯអង់គ្លេសវិញ បានច្រានចោលការចោទប្រកាន់របស់រុស្ស៊ីថាជារឿងមិនពិត ហើយថាវាជាការឃោសនាដែលរៀបចំឡើង ដើម្បីបំបែរការចាប់អារម្មណ៍លើការបរាជ័យផ្នែកយោធារបស់រុស្ស៊ីនៅអ៊ុយក្រែន។
នាយករដ្ឋមន្រ្តីថ្មីអង់គ្លេសលោក រីស្ស៊ី ស៊ូណាក់ ថ្លែងកាលពីថ្ងៃអង្គារ បន្ថែមពីលើការច្រានចោលរបស់ក្រសួងការពារជាតិអង់គ្លេសយ៉ាងដូច្នេះថា៖ «ជាក់ស្តែង យើងកំពុងតាមដានស្ថានការណ៍យ៉ាងប្រុងប្រយ័ត្ន ប៉ុន្តែវាជាការល្អ ដែលអង់គ្លេសមិនធ្លាក់ចូលការបំបែរការចាប់អារម្មណ៍ ដែលរុស្ស៊ីរៀបចំ»។
លោក ស៊ូណាក់ បន្តទៀតថា៖ «ពួកគេ (រុស្ស៊ី) បន្តការទម្លាក់គ្រាប់បែកមិនរើសមុខលើជនស៊ីវិល និងការវាយប្រហារលើហេដ្ឋារចនាសម្ព័ន្ធស៊ីវិល។ នោះគឺជាការផ្តោតរបស់យើង ហើយយើងនឹងបន្តផ្តល់ការគាំទ្រ ដើម្បីឱ្យពួកគេចាញ់សង្រ្គាមខុសច្បាប់នេះ»។
គួររំឭកជាមួយគ្នានេះផងដែរថា ប្រទេសស៊ុយអែតកាលពីសប្តាហ៍មុន បានបញ្ជាឱ្យមានការស៊ើបអង្កេតបន្ថែមលើការខូចខាតបំពង់បង្ហូរហ្គាស Nord Stream ទាំងពីរ ដែលត្រូវបានសន្និដ្ឋានថា លេចធ្លាយដោយសារការផ្ទុះ ប៉ុន្តែមិនដឹងនរណាជាអ្នកទទួលខុសត្រូវ៕
ដោយ៖ហួន ឌីណា
