ចិន៖កាលពីថ្ងៃសុក្រ លោក ស៊ី ជីនពីង បានលើកឡើង​ក្នុង​អំឡុង​ពេល​ជួប​ជាមួយ​អធិការបតី​អាល្លឺម៉ង់លោក Olaf Scholz ថា៖ «ដើម្បី​ជៀសវាង​វិបត្តិ​នុយក្លេអ៊ែរកើតឡើង​នៅតំបន់​អឺរ៉ាស៊ី សង្គ្រាមនុយក្លេអ៊ែរនឹងមិនត្រូវផ្ទុះឡើងនោះទេ»។ ការលើកឡើងបែបនេះ គឺចំពេលដែលមានការព្រួយបារម្ភកាន់តែខ្លាំងឡើងថា សង្គ្រាមនៅអ៊ុយក្រែន អាចនឹងវិវត្តទៅជាសង្គ្រាមនុយក្លេអ៊ែរ។ ជាក់ស្ដែងប្រធានាធិបតីរុស្ស៊ីលោក វ្ល៉ាឌីមៀ ពូទីន ធ្លាប់បានប្តេជ្ញាថារុស្ស៊ីនឹងប្រើប្រាស់ប្រព័ន្ធសព្វាវុធទាំងអស់ដែលខ្លួនមាន ប្រសិនបើបូរណភាពទឹកដីរុស្ស៊ីត្រូវបានគំរាមកំហែង។

លោក ស៊ី ជីនពីង បានបន្តថា៖ «សហគមន៍អន្តរជាតិគួរតែរួមគ្នាប្រឆាំងនឹងការគំរាមកំហែងប្រើប្រាស់អាវុធនុយក្លេអ៊ែរ»។ នេះបើយោងតាមការចុះផ្សាយរបស់ទីភ្នាក់ងារសារព័ត៌មានរដ្ឋចិន ស៊ិនហួ (Xinhua)។ ទោះជាយ៉ាងណា អត្ថបទរបស់សារព័ត៌មានរដ្ឋចិន ស៊ិនហួ មិនបានរិះគន់ចំៗទៅលើប្រទេសរុស្ស៊ី ឬប្រទេសណាមួយជាក់លាក់នោះទេ។

យោងតាមប្រភពដដែលបានឱ្យដឹងថា លោក ស៊ី ជីនពីង ក៏បាននិយាយទៅកាន់លោក Scholz ផងដែរថា ប្រទេសចិនបានគាំទ្រតួនាទីដ៏សំខាន់របស់អឺរ៉ុបក្នុងការជំរុញឱ្យមានកិច្ចចរចាសន្តិភាពជុំវិញបញ្ហានៅអ៊ុយក្រែន និងក្នុងការបង្កើតក្របខ័ណ្ឌសន្តិសុខអឺរ៉ុប ប្រកបដោយតុល្យភាព ប្រសិទ្ធភាព និងនិរន្តរភាព។ សេចក្តីថ្លែងការណ៍របស់លោក ស៊ី ជីនពីង ជាការរម្លឹកឡើងវិញនូវការសន្យារបស់ចិន ក៏ដូចជាបារាំង រុស្ស៊ី អង់គ្លេស និងសហរដ្ឋអាមេរិក ដែលបានលើកឡើងកាលពីខែមករា ឆ្នាំ២០២២ ថា អាវុធនុយក្លេអ៊ែរត្រូវតែប្រើប្រាស់ក្នុងគោលបំណងការពារខ្លួនតែប៉ុណ្ណោះ។ ទន្ទឹមនឹងនេះ សមាជិកអចិន្ត្រៃយ៍ទាំង ៥ នៃក្រុមប្រឹក្សាសន្តិសុខអង្គការសហប្រជាជាតិ ឬហៅកាត់ថា P5 បានលើកឡើងនៅក្នុងសេចក្តីថ្លែងការណ៍រួមមួយថា៖ «បើសិនជាសង្រ្គាមនុយក្លេអ៊ែរផ្ទុះឡើង នឹងគ្មានប្រទេសណាមួយឈ្នះនោះទេ។ ដូច្នេះវាមិនត្រូវកើតឡើងឡើយ»។

គួរដឹងដែរថា ចិន​តែងតែរក្សា​គោល​នយោបាយ​របស់ខ្លួនដែល​ថា ​ខ្លួន​នឹង​មិន​ប្រើ​ប្រាស់អាវុធ​នុយក្លេអ៊ែរ​នោះទេ ហើយ​ក៏​មិន​គំរាមកំហែង​រដ្ឋ​ដែល​មិន​មានអាវុធ​នុយក្លេអ៊ែរ​​នោះទេ ប៉ុន្តែ ​បណ្ដាប្រទេស​លោកខាង​លិច​នៅ​តែ​មាន​ការ​ព្រួយ​បារម្ភ ​ដោយ​សារ​តែ​កង្វះ​តម្លាភាព​របស់ចិនជុំវិញ​កម្មវិធី​នុយក្លេអ៊ែររបស់ខ្លួន។ ដោយឡែក បើទោះបីជាលោក ពូទីន ធ្លាប់បានគំរាមប្រើប្រាស់អាវុធទាំងអស់ដែលខ្លួនមាន ប៉ុន្តែកាលពីខែមុន លោកបានបដិសេធថាមិនមានចេតនាប្រើប្រាស់អាវុធនុយក្លេអ៊ែរប្រឆាំងនឹងអ៊ុយក្រែនទេ។

រុស្ស៊ីក៏បានចោទប្រកាន់អ៊ុយក្រែនផងដែរ ពីបទរៀបចំផែនការវាយប្រហារដោយប្រើ គ្រាប់បែកវិទ្យុសកម្ម ក្នុងគោលបំណងបំពុលសត្រូវ ជាជាងបណ្ដាលឱ្យសត្រូវស្លាប់ ឬរងរបួសធ្ងន់ធ្ងរ។ ប៉ុន្តែ ទីភ្នាក់ងារថាមពលបរមាណូអន្តរជាតិបានច្រានចោលការអះអាងរបស់រុស្ស៊ីកាលពីថ្ងៃព្រហស្បតិ៍ បន្ទាប់ពីការស៊ើបអង្កេតមួយត្រូវបានបញ្ចប់ទៅថ្មីៗនេះ។

គួរបញ្ជាក់ផងដែរថា លោក Scholz គឺជាមេដឹកនាំអឺរ៉ុបដំបូងដែលបានទៅទស្សនកិច្ចនៅប្រទេសចិនចាប់តាំងពីជំងឺរាតត្បាតកូវីដ១៩ បានចាប់ផ្តើម ហើយលោកបាននិយាយថា៖ «ទីក្រុងប៊ែរឡាំង និងទីក្រុងប៉េកាំងបានយល់ស្របជាមួយគ្នាថា ការគំរាមកំហែងប្រើប្រាស់អាវុធនុយក្លេអ៊ែរគឺជាទង្វើដែលគ្មានការទទួលខុសត្រូវ និងគ្រោះថ្នាក់បំផុត»។

​កាលពីថ្ងៃសុក្រ អធិការបតី​អាល្លឺម៉ង់រូបនេះបានលើកឡើងនៅក្នុងសន្និសីទសារព័ត៌មានរួមគ្នាជាមួយនាយករដ្ឋមន្ត្រីចិនលោក លី ខឹឈាង (Li Keqiang) ថា៖ «ខ្ញុំបាននិយាយទៅកាន់លោកប្រធានាធិបតី ស៊ី ជីនពីង ថា វាជារឿងសំខាន់សម្រាប់ប្រទេសចិនក្នុងការបញ្ចេញឥទ្ធិពលរបស់ខ្លួនទៅលើប្រទេសរុស្ស៊ី ហើយវាគឺជាគោលការណ៍នៃធម្មនុញ្ញអង្គការសហប្រជាជាតិ ដែលយើងទាំងអស់គ្នាបានព្រមព្រៀងគ្នា ក្នុងនោះរួមមាន អធិបតេយ្យភាព និងបូរណភាពទឹកដីនៃប្រទេសនីមួយៗ។ ទាំងនេះគឺជាបញ្ហាដ៏សំខាន់ចំពោះប្រទេសចិនផងដែរ»។

គួររម្លឹកផងដែរថា នៅក្នុងអត្ថបទមួយដែលបានចុះផ្សាយនៅក្នុងគេហទំព័រ The Politico នៅមុនដំណើរទស្សនកិច្ចមួយថ្ងៃរបស់គាត់ លោក Scholz បានលើកឡើងថា «ប្រទេសចិនបានទទួលយកទំនួលខុសត្រូវពិសេសមួយ​ ក្នុងនាមជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ»។

កន្លងមក បើទោះបីជាប្រទេស​ចិន​មិន​បាន​ផ្តល់​ជំនួយ​យោធា​ដោយផ្ទាល់​ដល់​រុស្ស៊ី​ និងមិនបាន​ទទួល​ស្គាល់​តំបន់មួយផ្នែករបស់​អ៊ុយក្រែន​ដែលត្រូវបាន​ដាក់បញ្ចូល​ជា​ទឹកដី​របស់​រុស្ស៊ីក៏ដោយ ក៏ចិនតែងតែរិះគន់លោកខាងលិចម្តងហើយម្តងទៀត ចំពោះការមិនអើពើពីសន្តិសុខរបស់ទីក្រុងម៉ូស្គូ និងបានដាក់ទណ្ឌកម្មទៅលើរុស្ស៊ីដែលជាការឆ្លើយតបទៅនឹងការឈ្លានពានអ៊ុយក្រែន។

ប្រព័ន្ធ​ផ្សព្វផ្សាយ​ចិន​ក៏​បាន​លើកឡើង​អំពី​ការ​រៀបរាប់​របស់​វិមាន​ក្រឹមឡាំង​ជុំវិញបញ្ហាសង្គ្រាមនៅអ៊ុយក្រែន ប៉ុន្តែមិនបាន​ប្រើពាក្យថា​វា​ជាការ​ឈ្លានពាននោះ​ទេ។ លោក Noah Barkin អ្នកជំនាញចិនម្នាក់នៅក្នុងក្រុមហ៊ុន Rhodium Group ដែលជាក្រុមហ៊ុនស្រាវជ្រាវមានមូលដ្ឋាននៅទីក្រុងញូវយ៉កបាននិយាយថា៖ «លោក Scholz នឹងមើលឃើញពីជំហរបដិសេធរបស់ចិន ចំពោះការប្រើប្រាស់ និងការគំរាមកំហែងប្រើប្រាស់អាវុធនុយក្លេអ៊ែរដើម្បីយកឈ្នះសត្រូវ»។

លោកបានបន្តថា៖ «ប៉ុន្តែយើងមិនដឹងថា តើចិននឹងមានឥទ្ធិពលលើលោក វ្ល៉ាឌីមៀ ពូទីន ឬយ៉ាងណានោះទេ ហើយថាតើភាពតានតឹងនៅអ៊ុយក្រែននឹងនាំឲ្យទីក្រុងប៉េកាំងឃ្លាតឆ្ងាយពីទីក្រុងមូស្គូដែររឺយ៉ាងណានោះទេ។ ជាមេរៀន​កាលពី​ឆ្នាំ​កន្លង​ទៅ​គឺ​ថា លោក ស៊ី ជីនពីង នឹង​នៅ​ខាង​លោក ពូទីន ដោយប្រើយុទ្ធសាស្ត្រ ​ក្រាស់ និង​ស្តើង»។

លោក ស៊ី ជីនពីង ក៏បានគូសបញ្ជាក់ទៅកាន់លោក Scholz ថា៖ «យើងត្រូវតែធ្វើការរួមគ្នាដើម្បីធានាឱ្យឧស្សាហកម្ម និងខ្សែសង្វាក់ផ្គត់ផ្គង់ពិភពលោកមានស្ថេរភាព និងទប់ស្កាត់ការជ្រៀតជ្រែកដល់កិច្ចសហប្រតិបត្តិការក្នុងវិស័យថាមពល ស្បៀងអាហារ និងហិរញ្ញវត្ថុសកលដែលនឹងប៉ះពាល់ដល់ការងើបឡើងវិញនៃសេដ្ឋកិច្ចពិភពលោក និងជាពិសេសស្ថិរភាពសេដ្ឋកិច្ច និងហិរញ្ញវត្ថុនៃប្រទេសកំពុងអភិវឌ្ឍន៍»។

សម្រាប់ប្រទេសចិន ការអភិវឌ្ឍន៍សេដ្ឋកិច្ច និងសន្តិសុខជាតិ ត្រូវដើរទន្ទឹមគ្នា។ ហើយគោលលទ្ធិសន្តិសុខជាតិរបស់លោក ស៊ី ជីនពីង បានសង្កត់ធ្ងន់ថា ការអភិវឌ្ឍន៍ធានាបាននូវសន្តិសុខ ហើយសន្តិសុខធានាបាននូវការអភិវឌ្ឍន៍ជានិរន្តរ៍របស់ប្រទេសជាតិ។

ចិនយល់ឃើញជុំវិញបញ្ហាសន្តិសុខជាតិថា មិនត្រឹមតែទាក់ទងនឹងការការពារបូរណភាពទឹកដីប៉ុណ្ណោះទេ ប៉ុន្តែថែមទាំងធានាឱ្យបាននូវខ្សែសង្វាក់ផ្គត់ផ្គង់មានសុវត្ថិភាព និងរួចផុតពីការដាក់ទណ្ឌកម្មពីបរទេស និងអាចអភិវឌ្ឍដោយខ្លួនឯងបានលើវិស័យស្បៀងអាហារ ថាមពល និងបច្ចេកវិទ្យាជាដើម៕

ដោយ៖ធា សុខណា