ប្រេស៊ីល ឥណ្ឌូណេស៊ី និងកុងហ្គោ ចុះហត្ថលេខាលើកិច្ចព្រមព្រៀងអភិរក្សព្រៃរងទឹកភ្លៀង
ឥណ្ឌូនេស៊ី៖ប្រទេសប្រេស៊ីល ឥណ្ឌូណេស៊ី និងសាធារណរដ្ឋប្រជាធិបតេយ្យកុងហ្គោ (DRC) ដែលជាប្រទេសបីមានព្រៃរងទឹកភ្លៀងធំជាងគេបំផុតរបស់ពិភពលោក បានចាប់ផ្តើមភាពជាដៃគូអាកាសធាតុ ដើម្បីធ្វើការរួមគ្នាលើការអភិរក្សព្រៃឈើ។
កិច្ចព្រមព្រៀងដែលចុះហត្ថលេខាកាលពីថ្ងៃចន្ទ ទី១៤ ខែវិច្ឆិកានេះ ធ្វើឡើងក្រោមសមិទ្ធផលនៃកិច្ចប្រជុំកំពូលស្ដីពីអាកាសធាតុរបស់អង្គការសហប្រជាជាតិលើកទី២៧ (COP27)។ វានឹងក្លាយជាការរួមគ្នាដ៏មានប្រយោជន៍ ក្នុងការចេញសកម្មភាពប្រឆាំងនឹងការប្រែប្រួលអាកាសធាតុ ក៏ព្រោះតែព្រៃត្រូពិកដ៏ធំរបស់ប្រទេសទាំងបី រងការគំរាមកំហែងយ៉ាងធ្ងន់ធ្ងរ ដោយសារតែការកាប់បំផ្លាញព្រៃឈើ និងការធ្វើកសិកម្ម។
រដ្ឋមន្ត្រីសម្របសម្រួលកិច្ចការសមុទ្រ និងវិនិយោគរបស់ឥណ្ឌូនេស៊ី លោក Luhut Binsar Pandjaitan បាននិយាយនៅក្នុងសេចក្តីថ្លែងការណ៍ថា ៖ «អ្នកតំណាងមកពីប្រទេសឥណ្ឌូនេស៊ី ប្រេស៊ីល និងកុងហ្គោបានប្រកាសកិច្ចសហប្រតិបត្តិការព្រៃឈើត្រូពិក និងសកម្មភាពអាកាសធាតុ នៅក្នុងព្រឹត្តិការណ៍ភាគី COP27 របស់អេហ្ស៊ីបនៅថ្ងៃទី ០៧ ខែវិច្ឆិកា ហើយបានយល់ព្រមចុះហត្ថលេខាលើសេចក្តីថ្លែងការណ៍រួមនៅថ្ងៃនេះ»។
លោក Pandjaitan នៅមុនកិច្ចប្រជុំកំពូលនៃក្រុមប្រទេស G-20 ថា ៖ «យើងត្រូវការកិច្ចសហប្រតិបត្តិការជាមួយអ្នកដទៃ ដើម្បីសម្រេចបាននូវគោលដៅរួម។ បើធ្វើម្នាក់ឯង យើងសម្រេចបានតិចតួច ហើយបើធ្វើរួមគ្នា យើងអាចសម្រេចបានច្រើន»។
គួរបញ្ជាក់ថា កិច្ចព្រមព្រៀងនេះអំពាវនាវឱ្យភាគីទាំងបីប្រទេស ទទួលបានសំណងពីសហគមន៍អន្តរជាតិសម្រាប់ការកាត់បន្ថយការកាប់បំផ្លាញព្រៃឈើ ដោយផ្តោតលើបញ្ហារួមគ្នាដូចជាលទ្ធភាពទទួលបានហិរញ្ញវត្ថុអាកាសធាតុ និងតម្លៃនៃការលក់កាបូន។
សេចក្តីថ្លែងការណ៍ឥណ្ឌូនេស៊ីបាននិយាយទៀតថា ប្រទេសនានាមានផលប្រយោជន៍រួមក្នុងការសហការដើម្បីបង្កើនតម្លៃនៃព្រៃត្រូពិករបស់ពួកគេ និងដើម្បីធានាថា ព្រៃឈើត្រូពិកទាំងនេះបន្តផ្តល់អត្ថប្រយោជន៍ដល់អាកាសធាតុ និងប្រជាជន។
កិច្ចព្រមព្រៀងអភិរក្សាព្រៃឈើនេះ បានសម្រេចឡើង ខណៈដែលប្រធានាធិបតីប្រេស៊ីលថ្មីទើបជាប់ឆ្នោតថ្មី លោក Luiz Inacio Lula da Silva រំពឹងថានឹងសន្យាថាធ្វើការផ្លាស់ប្តូរគោលនយោបាយបរិស្ថានរបស់មេដឹកនាំចាស់គឺលោក ហ្ស៊ែរ ប៊ុលសូណារ៉ូ ដើម្បីការពារព្រៃអាម៉ាហ្សូន ដែលរងការកាប់បំផ្លាញយ៉ាងដំណំក្នុងរយៈពេលប៉ុន្មានឆ្នាំចុងក្រោយនេះ។
គួរឱ្យកត់សម្គាល់ពីលើនេះ វាក៏ជាសមិទ្ធផលដ៏ប្រសើរ ស្របពេលដែល ប្រទេសកុងហ្គោ ដែលមានព្រៃរងទឹកភ្លៀងធំជាងគេទី២របស់ពិភពលោក បានប្រឈមមុខនឹងការរិះគន់ចំពោះការដាក់ឱ្យដេញថ្លៃលើគម្រោងទាញយកប្រេង និងហ្គាស ដែលមានប្លុកមួយចំនួនស្ថិតនៅលើតំបន់រសើប។
កន្លងមក កុងហ្គោ ដែលជាប្រទេសក្រីក្រ បានទទូចថាការអភិវឌ្ឍធនធានហ្វូស៊ីលរបស់ខ្លួនជាកត្តាចាំបាច់ខាងសេដ្ឋកិច្ច ទោះបីមានការព្រមានពីផលប៉ះពាល់បរិស្ថានក្ដី។
យ៉ាងណាមិញ រដ្ឋមន្ត្រីបរិស្ថានរបស់ប្រទេស លោកស្រី Eve Bazaida Mazudi បានអះអាងក្នុងសេចក្ដីថ្លែងការណ៍ដែលចេញដោយឥណ្ឌូណេស៊ីថា ប្រទេសទាំងបីអាចផ្តល់ដំណោះស្រាយចំពោះការប្រែប្រួលអាកាសធាតុរួមគ្នា ហើយបន្តថា៖ «បច្ចុប្បន្ន ពិភពលោកកាន់តែក្តៅទៅៗ ដូច្នេះមនុស្សជាតិត្រូវការព្រៃរងទឹកភ្លៀង ដើម្បីស្រូបយកឧស្ម័នកាបូនិក»៕
ដោយ៖ ហួន ឌីណា ប្រភព៖ Rainforest giants Brazil, Indonesia, DR Congo sign deforestation pact