អ្នកនាំពាក្យក្រសួងអប់រំ យុវជន និងកីឡា៖ បេក្ខជនប្រឡងបាក់ឌុបត្រូវអនុវត្តគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន
ភ្នំពេញ៖មន្រ្តីជាន់ខ្ពស់នៃក្រសួងអប់រំ យុវជន និងកីឡា បានប្រាប់ឱ្យដឹងថា បេក្ខជនប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ដែលនឹងប្រព្រឹត្តទៅនាថ្ងៃទី៥និងទី៦ ខែធ្នូខាងមុខនេះ មានចំនួនជាង ១២ម៉ឺននាក់ និងមានមណ្ឌលប្រឡងជាង២០០មណ្ឌលផងដែរ។
ឯកឧត្តម រស់ សុវាចា អ្នកនាំពាក្យក្រសួងអប់រំ យុវជន និងកីឡា បានប្រាប់ឱ្យដឹងនៅថ្ងៃទី១៥ ខែវិច្ឆិកា ឆ្នាំ២០២២ ថា យោងតាមតួលេខបណ្តោះអាសន្ន ដែលគិតត្រឹមថ្ងៃទី ១២ ខែវិច្ឆិកា បេក្ខជនប្រឡងសញ្ញាបត្រមធ្យមសិក្សាទុតិយភូមិ ដែលបានដាក់ពាក្យប្រលងមានចំនួនសរុប ១២៨ ១៣៦ នាក់ ក្នុងនោះបេក្ខនារី ចំនួ ៦៨ ៧៧៣នាក់ផងដែរ។
ចំនួនបេក្ខជនដែលបានចុះឈ្មោះប្រឡងទាំងនោះមាន ថ្នាក់វិទ្យាសាស្រ្តចំនួន ៤២ ៩៣៦ នាក់ និងថ្នាក់វិទ្យាសាស្រ្តសង្គម ចំនួន ៨៥ ២០០ នាក់។
ទាក់ទងនឹងចំនួនមណ្ឌលប្រឡង លោក រស់ សុវាចា បានប្រាប់ឱ្យដឹងថា សម្រាប់មណ្ឌលប្រឡងសរុបមានចំនួន ២២១ ក្នុងនោះកើនចំនួន១៧ មណ្ឌលប្រឡង។
ទន្ទឹមនឹងនេះដែរ ខណៈដែលការប្រឡងនេះកាន់តែរំកិលជិតមកដល់ផងនោះ លោក រស់ សុវាចា ក៏បានផ្ញើសារទៅដល់បេក្ខជនប្រឡងបាក់ឌុប ឪពុកម្តាយ និងគ្រប់ភាគីពាក់ព័ន្ធក្នុងការខិតខំប្រឹងប្រែងរៀនសូត្រ ការជំរុញនិងលើកទឹកចិត្តបេក្ខជនជាដើម។
លោកបានឱ្យដឹងថា ៖ «សូមបេក្ខជនប្រឡងបាក់ឌុប បន្តការត្រៀមខ្លួនប្រឡងតាមផែនការបុគ្គលដោយខិតខំរៀនសូត្រក្នុងថ្នាក់ និងធ្វើស្វ័យសិក្សាបន្ថែម ព្រមទាំងស្តាប់ដំបូន្មានរបស់មាតាបិតា និងបន្តអនុវត្តគោលការណ៍សុខាភិបាល, គោរពច្បាប់ចរាចរណ៍, និងចៀសវាងការប្រើប្រាស់ថ្នាំញៀនខុសច្បាប់និងបារីគ្រប់ប្រភេទ ដើម្បីរក្សាសុខភាព និងអាយុជីវិត»។
ជាមួយគ្នានោះ អ្នកនាំពាក្យរូបនេះ ក៏បានជំរុញឱ្យបេក្ខជនបន្តអនុវត្តន៍គោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ស្របនឹងការបន្តចូលរួមប្រតិបត្តិវិធានការសុវត្ថិភាពសុខភាព ដោតញុំាអាហារឲ្យគ្រប់គ្រាន់ សម្រាកឲ្យបានច្រើនជាដើម។
សម្រាប់ឪពុកម្តាយ អាណាព្យបាលរបស់បេក្ខជន ក៏ត្រូវបន្តជួយដំណើរការរៀសូត្រ និងការត្រៀមប្រឡងរបស់កូនៗ ដែលទាមទារឲ្យបន្តមានការជួយជ្រោមជ្រែងពីពួកគាត់ដែរ និងបន្តលើកទឹកចិត្តជួយសិស្សានុសិស្សនិងបេក្ខជនប្រឡងបាក់ឌុបឲ្យអនុវត្តន៍លំហាត់និងរៀនបន្ថែមនៅផ្ទះ។
ឯកឧត្តម រស់ សុវាចា បានបន្ថែមថា ៖ «ក្រសួងអប់រំ យុវជន និងកីឡាអរគុណចំពោះបុគ្គលិកអប់រំ គណ:គ្រប់គ្រងគ្រឹះស្ថានសិក្សា លោកគ្រូ អ្នកគ្រូ មាតាបិតា សិស្សានុសិស្សបេក្ខជនប្រឡង និងគ្រប់ភាគីពាក់ព័ន្ធដែលបានបន្តចូលរួមលើកកម្ពស់ការបង្រៀន រៀន និងបានចូលរួមគាំទ្រដំណើរការប្រឡងបាក់ឌុបគ្រប់ដំណាក់កាល មុននិងក្នុងបរិបទកូវីដ១៩»។
ដោយឡែក កាលពីថ្ងៃទី១៤ ខែវិច្ឆិកា ក្រសួងអប់រំ យុវជន និងកីឡា បានរៀបចំនូវសិក្ខាសាលាមួយស្តីពីតួនាទី និងភារកិច្ចគណៈកម្មការក្រុមមុខវិជ្ជា សម្រាប់ការប្រឡងសញ្ញាបត្រមធ្យមសិក្សាទុតិយភូមិ ដើម្បីឱ្យដំណើរការប្រឡង ពិសេសដំណើរការកំណែប្រព្រឹត្តទៅដោយរលូន។
បើតាមក្រសួង សិក្ខាសាលានេះបានប្រព្រឹត្តទៅដោយផ្តោតលើ ធ្វើបទបង្ហាញស្ដីពីតួនាទី និងភារកិច្ចគណៈកម្មការក្រុមមុខវិជ្ជា, ការរៀបចំអក្សរសម្ងាត់, បទបង្ហាញស្ដីពីនីតិវិធីនៃការចុះអក្សរសម្ងាត់ និងការបែងចែកក្រុមការងារប្រតិបត្តិដែលមានចំនួន២០ក្រុម។
សូមជម្រាបផងដែរថា ទោះបីស្ថានភាពជំងឺកូវីដ១៩ បានធូរស្រាលក្តី ក្រសួងអប់រំ យុវជន និងកីឡា នៅតែបន្តអនុវត្តវិធានការការពារការចម្លង ដោយបានដាក់ចេញសេចក្តីណែនាំប្រតិបត្តិស្ដីពីវិធានការសុខភាព និងសុវត្ថិភាព សម្រាប់ការប្រឡងសញ្ញាបត្រមធ្យមសិក្សាទុតិយភូមិ ដើម្បីធានាបាននូវការការពារសុខភាព និងសុវត្ថិភាពជូនបុគ្គលិកអប់រំ និងសិស្សានុសិស្សទាំងអស់ផងដែរ៕
ដោយ៖នាង សុគន្ធា
