ខ្សែភាពយន្ត «វិលវិញសេអ៊ូល» របស់លោក ជូ ដេវី ចាប់ផ្ដើមចាក់បញ្ចាំងនៅតាមរោងភាពយន្តនៅទូទាំងប្រទេសកម្ពុជា
ភ្នំពេញ៖«វិលវិញសេអ៊ូល»របស់សមិទ្ធករភាពយន្តកូនខ្មែរកាត់បារាំង ជូ ដេវី ដែលត្រូវបានជ្រើសរើសជាខ្សែភាពយន្តតំណាងប្រទេសកម្ពុជា ទៅប្រកួតប្រជែងយកពានរង្វាន់ពិភពលោកក្នុងកម្មវិធីពានរង្វាន់អូស្កាលើកទី៩៥ បានចាប់ផ្ដើមចាក់បញ្ចាំងនៅតាមរោងភាពយន្តនានាក្នុងប្រទេសកម្ពុជាហើយចាប់ពីថ្ងៃទី១៨ ខែវិច្ឆិកា ឆ្នាំ២០២២នេះតទៅ។
បើតាមការឱ្យដឹងពីផលិតកម្ម Anti-Archive ការចាក់បញ្ចាំងខ្សែភាពយន្ត «វិលវិញសេអ៊ូល» នៅតាមរោងភាពយន្តទូទាំងប្រទេសកម្ពុជា នាថ្ងៃទី ១៨ ខែវិច្ឆិកា ឆ្នាំ ២០២២នេះ គឺជាការចាក់បញ្ចាំងតាមរោងកុនជាលើកដំបូងក្នុងពិភពលោក។ ចំណែកនៅអាមេរិកខាងជើង ក្រុមហ៊ុន Sony Pictures Classics បានទទួលទិញសិទ្ធិផ្ដាច់មុខទៅលើភាពយន្តនេះ ហើយនឹងមានគម្រោងចែកចាយនៅសហរដ្ឋអាមេរិក នាពេលខាងមុខ។
សូមជម្រាបថា ខ្សែភាពយន្ត «វិលវិញសេអ៊ូល» ផលិតដោយមានកិច្ចសហការរួមគ្នារវាងផលិតកម្មភាពយន្តបារាំង Aurora Films រួមសហការផលិតជាមួយផលិតកម្មភាពយន្តខ្មែរ Anti-Archive ផលិតកម្មអាល្លឺម៉ង់ Vandertastic Films ផលិតកម្មបែលហ្ស៊ិក Frakas Pictures និងផលិតកម្មកូរ៉េ នៃ MereCinema។ ខ្សែភាពយន្តនេះ ឆ្លុះបញ្ចាំងពីខ្សែជីវិតរបស់នារីជនជាតិបារាំងដើមកំណើតកូរ៉េម្នាក់ឈ្មោះ ហ្វ្រេតឌី។ ហ្វ្រេតឌីត្រូវបានគ្រួសារបារាំងយកទៅចិញ្ចឹមតាំងពីតូច ហើយអំឡុងពេលដែលរូបនាងវិលត្រឡប់មកប្រទេសកូរ៉េវិញជាលើកដំបូង ហ្វ្រេតឌី បានសម្រេចចិត្តតាមស្វែងរកដើមកំណើតខ្លួន។ ដ្បិតតែមានដើមកំណើតជាជនជាតិកូរ៉េ នារីរូបនេះ ស្គាល់តិចតួចណាស់ពីវប្បធម៌របស់កូរ៉េ។
ចាប់តាំងពីចាក់បញ្ចាំងជាផ្លូវការលើកដំបូងនៅក្នុងមហោស្រពភាពយន្តទីក្រុងកាន ប្រទេសបារាំង នៅចុងខែឧសភា ឆ្នាំ២០២២ នៅក្នុងផ្នែក Un Certain Regard រួចមក «វិលវិញសេអ៊ូល» បានបន្តចាក់បញ្ចាំងនៅតាមមហោស្រពភាពយន្តធំៗនៅទូទាំងពិភពលោក រួមមាន ទីក្រុងតូរុនតូ ញូវយ៉ក និងប៊ូសាន និងបានទទួលពានរង្វាន់ជាច្រើន។
ខ្សែភាពយន្ត «វិលវិញសេអ៊ូល» បានទទួលពានរង្វាន់ប្រជាប្រិយភាពនៅមហោស្រពភាពយន្តអន្ដរជាតិហាំតុន ក្នុងទីក្រុងញូវយ៉ក សហរដ្ឋអាមេរិក និងទទួលបានរង្វាន់ខ្ពស់បំផុត នៅមហោស្រពភាពយន្តអន្ដរជាតិទីក្រុងអាថែន ក្នុងប្រទេសក្រិក។ ខ្សែភាពយន្តដដែលនេះ ត្រូវបានជ្រើសរើសឈរឈ្មោះប្រកួតយកពានរង្វាន់២ គឺខាងផ្នែកខ្សែភាពយន្តឆ្នើមជាងគេ និងអ្នកដឹកនាំឆ្នើមជាងគេ នៅក្នុងការប្រគល់ពានរង្វាន់ភាពយន្តអាស៊ីប៉ាស៊ីហ្វិក ដែលនឹងធ្វើឡើងនៅខែវិច្ឆិកា ឆ្នាំ២០២២នេះ៕
ដោយ៖កែវ កិរិយា
