វ៉ាស៊ីនតោន៖ ក្រសួងការពារជាតិអាមេរិក បានបញ្ជាក់ថា រដ្ឋាភិបាលអាមេរិកកំពុងពិចារណាថាតើត្រូវផ្តល់ប្រព័ន្ធមីស៊ីលការពារដែនអាកាស ប៉ាទ្រីយ៉ូត ដល់កងកម្លាំងប្រដាប់អាវុធរបស់ប្រទេសអ៊ុយក្រែនដែរឬទេ ពោលគឺប៉ុន្មានសប្តាហ៍ក្រោយទីក្រុងកៀវ បានអំពាវនាវយ៉ាងទទូចនូវប្រព័ន្ធអាវុធមានតម្លៃថ្លៃនេះ។

ថ្លែងក្នុងសន្និសីទសារព័ត៌មានក្នុងថ្ងៃអង្គារទី២៩ ខែវិច្ឆិកានេះ មន្ត្រីជាន់ខ្ពស់មន្ទីរបញ្ចកោណមួយរូបសុំមិនបញ្ចេញឈ្មោះ ត្រូវបានសួរថាតើសហរដ្ឋអាមេរិកមានគម្រោងបញ្ជូនប្រព័ន្ធ ប៉ាទ្រីយ៉ូត ទៅកាន់អ៊ុយក្រែនដែរឬទេ? គាត់បានឆ្លើយតបយ៉ាងសាមញ្ញថា ខ្ញុំនឹងនិយាយថា លទ្ធភាពទាំងអស់ គឺស្ថិតនៅលើតុ ហើយថា អាវុធប្រភេទនេះ គឺមានសមត្ថភាពការពារដែនអាកាស ដែលកំពុងត្រូវបានពិចារណាដោយរដ្ឋបាលលោក ចូ បៃដិន។

ទាក់ទិននឹងផែនការផ្តល់ប្រព័ន្ធមីស៊ីលការពារដែនអាកាស ប៉ាទ្រីយ៉ូត សម្រាប់អ៊ុយក្រែននេះដែរ អតីតប្រធានាធិបតីរុស្ស៊ី លោក Dmitry Medvedev ក្នុងថ្ងៃអង្គារសប្តាហ៍នេះ បានព្រមានអង្គការណាតូ ប្រឆាំងនឹងការផ្តល់សព្វាវុធនេះ ដោយបានបរិហារសម្ព័ន្ធមិត្តយោធានេះថា ជា “អង្គភាពឧក្រិដ្ឋកម្ម” ជុំវិញការផ្គត់ផ្គង់អាវុធដល់អ្វីដែលលោកហៅថា “របបជ្រុលនិយម”៕ ប្រភព៖ RT ដោយ៖ ទីណា និងបុត្រា