អាមេរិក អូស្ត្រាលី អញ្ជើញជប៉ុនឱ្យចូលរួមបង្កើនការឆ្លាស់ទ័ពក្នុងសកម្មភាពពង្រឹងយោធាត្រីភាគី
ភ្នំពេញ ៖ សហរដ្ឋអាមេរិក និងអូស្ត្រាលី បាននិយាយកាលពីថ្ងៃអង្គារទី ៦ ខែធ្នូ ថា ខ្លួននឹងស្វាគមន៍ឱ្យមានការចូលរួមពីទាហានជប៉ុនក្នុងការឆ្លាស់ទ័ពត្រីភាគី ដោយប្ដេជ្ញាបង្កើតទ័ពជួរមុខរួមគ្នាមួយ ដើម្បីទប់ទល់នឹងការជឿនលឿនខាងយោធាដ៏ឆាប់រហ័សរបស់ប្រទេសចិន។
រដ្ឋមន្ត្រីការពារជាតិ និងក្រសួងការបរទេសអូស្ត្រាលីបានលើកឡើងថា ខ្លួនបានយល់ព្រមបង្កើនល្បឿននៃអន្តរកម្មយោធាជាមួយសហរដ្ឋអាមេរិក ក្នុងអំឡុងពេលពិភាក្សាជាមួយសមភាគីនេះនៅទីក្រុងវ៉ាស៊ីនតោន។
រដ្ឋមន្ត្រីការពារជាតិអូស្ត្រាលីលោក Richard Marles បានប្រាប់អ្នកសារព័ត៌មានថា៖ «វាពិតជាសំខាន់ណាស់ដែលយើងធ្វើកិច្ចការនេះតាមទស្សនៈនៃការផ្តល់តុល្យភាពនិងការចូលរួមពីប្រទេសដទៃទៀតក្នុងតំបន់របស់យើង ហើយយើងទន្ទឹងរង់ចាំមើល ដើម្បីអាចឱ្យមានការចូលរួមកាន់តែច្រើនពីជប៉ុន» ។ លោក Marles បានថ្លែងបន្តថា៖ «យើងអាចទៅជប៉ុននៅចុងសប្តាហ៍នេះ ហើយនឹងអញ្ជើញជប៉ុន ឱ្យចូលរួមក្នុងសមយុទ្ធបន្ថែមទៀតជាមួយអូស្ត្រាលី និងសហរដ្ឋអាមេរិក»។
ជាមួយគ្នានេះ រដ្ឋមន្ត្រីការពារជាតិអាមេរិក លោក Lloyd Austin បានថ្លែងថា សម្ព័ន្ធមិត្តនឹងស្វែងរកការចូលរួមរបស់ជប៉ុនក្នុងប្រតិបត្តិការរួមគ្នានៅអូស្ត្រាលី ដែលសហរដ្ឋអាមេរិកបានធ្វើការឆ្លាស់កងម៉ារីនតាំងពីឆ្នាំ ២០១១ នៅទីក្រុង Darwin ដែលជាទីក្រុងយុទ្ធសាស្ត្រភាគខាងជើងអូស្រ្តាលី ដែលរងការវាយប្រហារពីជប៉ុនក្នុងសម័យសង្គ្រាមលោកលើកទី២។ លោក Austin បានបន្តថា សហរដ្ឋអាមេរិក និងអូស្ត្រាលី បានព្រមព្រៀងគ្នាក្នុងការបង្កើនការឆ្លាស់កងកម្លាំងទម្លាក់គ្រាប់បែក យន្តហោះចម្បាំង និងទាហាន និងកងទ័ពជើងទឹកសហរដ្ឋអាមេរិក។
លោក Austin បានបន្ថែមទៀតថា៖ «យើងបានយល់ព្រមដើម្បីបង្កើនកិច្ចសហប្រតិបត្តិការលើវិស័យការពារជាតិត្រីភាគី និងអញ្ជើញជប៉ុនឱ្យធ្វើសមាហរណកម្មទៅក្នុងគំនិតផ្តួចផ្តើមនៃកងកម្លាំងរបស់យើងនៅអូស្ត្រាលី»។
គួរគូសបញ្ជាក់ថា ប្រទេសជប៉ុន ដែលជាសម្ព័ន្ធមិត្តជាប់សន្ធិសញ្ញារបស់សហរដ្ឋអាមេរិក បានស្វែងរកកិច្ចសហប្រតិបត្តិការការទូតកាន់តែច្រើនឡើងជាមួយអូស្ត្រាលី ក្នុងរយៈពេលប៉ុន្មានឆ្នាំថ្មីៗនេះ ប៉ុន្តែទំនាក់ទំនងផ្នែកការពារជាតិមានភាពរសើបជាងមុន ដោយសារតែគោលនយោបាយយោធារបស់ក្រុងតូក្យូ ក្រោយបរាជ័យក្នុងសង្រ្គាមលោកលើកទី២។ យ៉ាងណាមិញ កាលពីខែតុលា ជប៉ុន និងអូស្ត្រាលីបានព្រមព្រៀងគ្នាក្នុងការពង្រឹងទំនាក់ទំនងសន្តិសុខរបស់ពួកគេ ដោយអនុញ្ញាតឱ្យកងកម្លាំងស្វ័យការពាររបស់ជប៉ុនហ្វឹកហាត់នៅប្រទេសអូស្ត្រាលី និងធ្វើការចែករំលែកព័ត៌មានស៊ើបការណ៍សម្ងាត់ជាមួយគ្នាកាន់តែច្រើន។
កន្លងមក សហរដ្ឋអាមេរិក អូស្រ្តាលី និងជប៉ុន បានប្រឹងប្រែងសហការជាមួយគ្នា ក្នុងការទប់ទល់នឹងការរីកសាយភាយកាន់តែខ្លាំងនៃឥទ្ធិពលរបស់ចិនក្រោមការដឹកនាំរបស់លោកប្រធានាធិបតី ស៊ី ជិនពីង។ ប្រទេសទាំងបីក៏បានធ្វើការជាមួយគ្នាផងដែរក្នុងពេលប៉ុន្មានឆ្នាំចុងក្រោយនេះ តាមរយៈសម្ព័ន្ធមិត្តសន្តិសុខទាំងបួន «Quad» ដែលមានឥណ្ឌាមួយទៀតជាសមាជិក ដែលហាក់មានការស្ទាក់ស្ទើរក្នុងការចូលរួមទប់ទល់នឹងចិន៕
ដោយ៖ ហួន ឌីណា ប្រភព៖ US, Australia invite Japan to step up troop rotations
