ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានលើកឡើងថា ស្រែធំប្រើពូជច្រើនបានផលច្រើន ស្រែតូច ប្រើពូជតិច បានផលតិច ដែលនេះ នេះជាក្រឹត្យក្រមធម្មជាតិ ។ សម្ដេចតេជោ បានលើកឡើងដូចនេះ តាមរយៈទំព័រហ្វេសប៊ុកផ្លូវការនៅព្រឹកថ្ងៃទី០៥ ខែមករា ឆ្នាំ២០២៣ អមជាមួយរូបថតជួបជុំគ្រួសាររបស់សម្ដេច និងចំថ្ងៃរម្លឹកអំពីខួប៤៧ឆ្នាំ នៃថ្ងៃរៀបអាពាហ៍ពិពាហ៍ (៥ មករា ១៩៧៦-៥ មករា ២០២៣) របស់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី នៅក្នុងរបបកម្ពុជាប្រជាធិបតេយ្យ ។

សម្ដេចតេជោ នាយករដ្ឋមន្ត្រី បានលើកឡើងក្នុងទំព័រហ្វេសប៊ុកដូច្នេះថា៖ ស្រែធំប្រើពូជច្រើនទទួលផលច្រើន ស្រែតូចប្រើពូជតិចទទួលផលតិច, នេះជាក្រឹត្យក្រមធម្មជាតិ មិនថា ក្នុងគ្រួសារ ឬក្នុងក្រុមនយោបាយនោះឡើយ។ សម្ដេចបន្តថា ចាប់ផ្តើមពីមនុស្ស២នាក់ កើនដល់៣២នាក់នៃគ្រួសារមួយនេះ។ សម្ដេចសង្ឃឹមថា សំដីខ្ញុំនិយាយនេះ បងប្អូននឹងយល់ ។

សូមជម្រាបថា នៅលើទំព័រហ្វេសប៊ុកផ្លូវការ នាល្ងាចថ្ងៃទី៤ ខែមករា ឆ្នាំ២០២៣ សម្ដេចតេជោ ហ៊ុន សែន បានសរសេរថា (៥ មករា ១៩៧៦-៥ មករា ២០២៣) ជាខួប៤៧ឆ្នាំ នៃថ្ងៃរៀបការ ។ សម្តេច លើកឡើងថា ពេលវេលាដ៏លំបាកបំផុតជាមួយទឹកភ្នែករាប់លានដំណក់ ប្តីប្រពន្ធយើងបានរួមជាមួយប្រជាជនកម្ពុជា ក្រោកឈរឡើងតស៊ូ ដើម្បីការរស់រានមានជិវិត និងការអភិវឌ្ឍដូចសព្វថ្ងៃ។

សម្ដេចតេជោ បានបញ្ជាក់ថា៖ “យើងមិននឹកស្មានថា យើងអាចរស់រហូតមកដល់ពេលនេះឡើយ បើប្រៀបជាមួយការលំបាកនាពេលនោះ។ យើងក៏មិនបានគិតថា យើងមានកូន និងចៅចំនួនច្រើនដែលគួរឱ្យស្រឡាញ់ដូចសព្វថ្ងៃនេះដែរ”។

សម្ដេចតេជោនាយកដ្ឋមន្ត្រីថ្លែងបន្តថា មេរៀនបានបង្ហាញថា រៀបការមានភ្លេង ឬអត់ភ្លេង គ្មានអ្វីខុសគ្នាទេ បញ្ហាស្ថិតត្រង់ថា ស្រឡាញ់ស្មោះត្រង់ យោគយល់ឱ្យគ្នាឬអត់ បែកបាក់ឬស្ថិតស្ថេរស្ថិតនៅលើចំណុចនេះហើយ៕ ដោយ វណ្ណលុក