មូស្គូ៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បានសង្កត់ធ្ងន់ថា លោកគ្មានការងឿងឆ្ងល់ទេថា ជ័យជំនះរបស់រុស្ស៊ីក្នុងសង្គ្រាមនៅអ៊ុយក្រែន គឺជារឿងដែលមិនអាចជៀសរួច។

នៅក្នុងថ្ងៃពុធសប្តាហ៍នេះ លោក ពូទីន បានជួបជាមួយក្រុមកម្មករនៅរោងចក្រផលិតមីស៊ីលមួយកន្លែង ដែលបានបង្កើនផលិតកម្មសម្រាប់សង្គ្រាមនៅអ៊ុយក្រែន ដោយជាមួយគ្នានោះ លោក ពូទីន បាននិយាយថា ដើម្បីសម្រេចបានលទ្ធផលចុងក្រោយ រឿងមួយចំនួននឹងមិនមានការប្រែប្រួលឡើយ។

លោក ពូទីន បានបញ្ជាក់យ៉ាងដូច្នេះថា នេះគឺជាភាពក្លាហាន និងវីរភាពរបស់អ្នកប្រយុទ្ធរបស់យើង ក្នុងអំឡុងប្រតិបត្តិការយោធាពិសេសនៅសមរភូមិជួរមុខនៅអ៊ុយក្រែន ហើយជាការពិតណាស់ ការងារនៃឧស្សាហកម្មការពារជាតិ គឺអាស្រ័យលើមនុស្សដូចពួកអ្នក។

ប្រធានាធិបតីរុស្ស៊ីរូបនេះ បានធ្វើការពណ៌នារបបដឹកនាំអ៊ុយក្រែនសារជាថ្មីទៀតថា ជា ណេអូ ណាស៊ី “neo-Nazi” ហើយក៏បានបញ្ជាក់ឡើងវិញផងដែរ នូវការអះអាងរបស់គាត់ដែលថា ទាហានរុស្ស៊ីកំពុងតែប្រយុទ្ធដើម្បីរបបដឹកនាំ ឌីណា ស៊ីហ្វាយ “de-Nazify”៕ ប្រភព៖ NHK ប្រែសម្រួលដោយ៖ បុត្រា