អូតាវ៉ា៖ រដ្ឋមន្ត្រីការពារជាតិកាណាដា លោកស្រី អានីតា អាណន់ បានប្រកាសនៅក្នុងថ្ងៃពុធសប្តាហ៍នេះថា ប្រទេសរបស់លោកស្រីនឹងបរិច្ចាគរថពាសដែកចំនួន ២០០គ្រឿងដល់អ៊ុយក្រែន សម្រាប់កញ្ចប់ជំនួយយោធាថ្មីមួយ។

លោកស្រី អាណាន់ បានធ្វើសេចក្តីប្រកាសបែបនេះ ក្នុងអំឡុងដំណើរទស្សនកិច្ចរបស់គាត់ទៅកាន់ទីក្រុងកៀវ ហើយរថពាសដែកទាំងនេះត្រូវបានទិញពី Roshel ដែលជាក្រុមហ៊ុនកាណាដាមានមូលដ្ឋាននៅរដ្ឋ Ontario មានតម្លៃជាង ៩០លានដុល្លារកាណាដា ឬប្រមាណ ៧២លានដុល្លារអាមេរិក។ នេះបើយោងតាមសេចក្តីប្រកាសព័ត៌មាន ដែលចេញផ្សាយដោយក្រសួងការពារជាតិកាណាដា។

ជំនួយយោធារបស់កាណាដា ដែលបានប្តេជ្ញាចិត្តផ្តល់ឱ្យអ៊ុយក្រែន ចាប់តាំងពីខែកុម្ភៈ ឆ្នាំ ២០២២ ក្នុងនោះរួមមានប្រព័ន្ធមីស៊ីលបាញ់ពីដីគោកទៅអាកាសកម្រិតខ្ពស់ ជាមួយនឹងអាវុធដែលពាក់ព័ន្ធ, រថពាសដែកប្រយុទ្ធ ៣៩គ្រឿង, អាវុធប្រឆាំងរថក្រោះ, ប្រព័ន្ធកាំភ្លើងធំ M777 Howitzers និងគ្រាប់រំសេវជាដើម។

ប្រភពបានឱ្យដឹងទៀតថា បុគ្គលិកកងកម្លាំងប្រដាប់អាវុធកាណាដាប្រហែល ២៣០នាក់ បច្ចុប្បន្នត្រូវបានដាក់ពង្រាយនៅក្នុងប្រតិបត្តិការ UNIFIER ដែលជាបេសកកម្មហ្វឹកហ្វឺនរបស់កាណាដាសម្រាប់បុគ្គលិកអ៊ុយក្រែន ដែលបានបណ្តុះបណ្តាលកងកម្លាំងសន្តិសុខអ៊ុយក្រែនជាង ៣៥,០០០នាក់ ចាប់តាំងពីបើកដំណើរការកាលពីឆ្នាំ ២០១៥៕ ប្រភព៖ ស៊ីនហួរ ប្រែសម្រួលដោយ៖ បុត្រា