ភ្នំពេញ៖ ឯកឧត្តមបណ្ឌិត ថោង ខុន រដ្ឋមន្រ្តីក្រសួងទេសចរណ៍ ជាអនុប្រធានអចិន្រ្តៃយ៍គណៈកម្មាធិការជាតិCAMSOC តំណាងសម្តេចពិជ័យសេនា ទៀ បាញ់ ឧបនាយរដ្ឋមន្រ្តី រដ្ឋមន្រ្តីក្រសួងការពារជាតិ និងជាប្រធានគណៈកម្មាធិការជាតិCAMSOC នាព្រឹកថ្ងៃទី២ ខែកុម្ភៈ ឆ្នាំ២០២៣ បានដឹកនាំគណៈកម្មការជំនាញ ចុះពិនិត្យមើលទីលានត្រៀមប្រកួតកីឡាស៊ីហ្គេម លើកទី៣២ និងអាស៊ាប៉ារ៉ាហ្គេមលើកទី១២ ឆ្នាំ២០២៣។

ឯកឧត្តម វ៉ាត់ ចំរើន អគ្គលេខាធិការ គណៈកម្មាធិការជាតិCAMSOC បានឲ្យដឹងថា ការចុះពិនិត្យ វឌ្ឍនៈភាពការជួសជុលតុបតែងលម្អទីលានដែលមិនទាន់ហើយរួចរាល់១០០% និងពិនិត្យមើលកន្លែងទីលានដែលហើយ ១០០% ។ ជាមួយគ្នានេះ សម្រាប់ទីលានប្រកួតដែលមិនទាន់រួចរាល់ ឯកឧត្តម បណ្ឌិត ថោង ខុន បានឲ្យក្រុមការងារពន្លឿនការជួសជុលកែលម្អតុបតែង ដើម្បីឲ្យរួចរាល់មុនស៊ីហ្គេម ចំណែកទីលានរួចរាល់១០០% ប៉ុន្តែមិនទាន់គ្រប់ស្តង់ដារ ដែលមានសំនូមពរពីម្ចាស់ប្រភេទកីឡា ឯកឧត្តម ក៏ជំរុញឲ្យមានការកែលម្អតម្រូវឲ្យត្រូវតាមបទដ្ឋានស្តង់ដារទីលានអន្តរជាតិ ។ ទន្ទឹមជាមួយគ្នានេះ សម្រាប់ទីលានទទួលបាល់ទាត់នារី ដែលស្ថិតនៅក្នុងមជ្ឈមណ្ឌលកីឡាកងយោពលខេរភូមិន្ទក៏ត្រូវបានឲ្យបន្ថែមការជួសជុលកែលម្អ លាបពណ៌ទាំងបន្ទប់ទឹក បន្ទប់ផ្លាស់សំលៀកបំពាក់ និងបន្ទប់ប្រតិបត្តិការណ៍សម្រាប់អាជ្ញាកណ្តាលចៅក្រមផងដែរ។

សូមបញ្ជាក់ថា ព្រឹត្តិការណ៍ស៊ីហ្គេម លើកទី៣២ មាន ៣៧ប្រភេទកីឡា នឹងប្រព្រឹត្តទៅពីថ្ងៃទី០៥ ដល់ថ្ងៃទី១៧ ខែឧសភា និងការប្រកួតកីឡាអាស៊ានប៉ារ៉ាហ្គេម លើកទី១២ មាន ១៣ប្រភេទកីឡាចាប់ពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣ ៕ ជាវ ចន្ធូ