ត្បូងឃ្មុំ៖ ផ្កាស្បៃរឿងចំនួនមួយលានដើម នឹងដុះរីកស្គុះស្គាយ ពណ៌ លឿងទុំ ស្វាគមន៍ទេវតាឆ្នាំថ្មី និងភ្ញៀវ ទេសចរនៅក្នុងឱកាស បុណ្យចូលឆ្នាំប្រពៃណីជាតិខ្មែរខាងមុខ ។ដើមផ្កាស្បៃរឿងទាំងនេះ ត្រូវបានដឹកនាំដាំ ដោយឯកឧត្តម អ៊ាង សុផល្លែត រដ្ឋលេខាធិការ ក្រសួងបរិស្ថាននៅជុំវិញទន្លេស្ងួត ក្នុងតំបន់ប្រាសាទ ព្រះធាតុបា ស្រី ស្ថិតនៅក្នុងឃុំព្រះធាតុ ស្រុកអូររាំងឪ ខេត្តត្បូងឃ្មុំ កាលពី ព្រឹក ថ្ងៃទី៤ កុម្ភៈ ។ពិធីនេះក៏មានការចូលរួមពីលោកគ្រូ អ្នកគ្រូ សិស្សានុ សិស្ស ក្រុមយុវជននៃសហភាពសហព័ន្ធយុវជនកម្ពុជាឬ ស.ស.យ.ក និងប្រជាពលរដ្ឋជាង ៥០០នាក់។

ក្នុងពិធីបាចគ្រាប់ស្បៃរឿងនេះ ឯកឧត្តម អ៊ាង សុផល្លែត មាន ប្រសាសន៍ថា ផ្កាស្បៃរឿងមានគុណ ប្រយោជន៍ចំពោះបរិស្ថាន ដោយវាអាចកំចាត់សត្វល្អិតចង្រៃ ធ្វើឱ្យដំណាំផ្សេងៗដែលនៅ ជុំវិញវាមាន ដំណាំស្រូវជាដើមមិនត្រូវបានបំផ្លាញដោយ សត្វ ល្អិតឡើយ។ ឯកឧត្តមរដ្ឋលេខាធិការបាន បំផុសឱ្យសិស្សានុសិស្ស ប្រជាពលរដ្ឋស្រឡាញ់បរិស្ថាន ដោយត្រូវចូលរួមក្នុងការការពារ បរិស្ថានដែល ជាអាយុជីវិតរបស់យើងទាំងអស់គ្នា។ ការបំផ្លាញ បរិស្ថាន គឺជាការបំផ្លាញខ្លួនយើងដូច្នេះដែរ។

ចំពោះយុវជន ឯកឧត្តម អ៊ាង សុផល្លែត បានជំរុញឱ្យពួក គេខិត ខំសិក្សារៀនសូត្រក្រេបជញ្ជក់នូវ ចំណេះវិជ្ជាឱ្យបានខ្ពង់ខ្ពស់ ដើម្បី ក្លាយជាធនធានមនុស្សសម្រាប់ចូលរួមំណែកក្នុងការអភិវឌ្ឍជាតិបន្តវេន ពីអ្នកជំនាន់មុន ។ ក្នុងវ័យសិក្សាដែលមានកុមារ និងយុវជន ជាដើមត្រូវតែប្រឹងប្រែងរៀនសូត្រ មិនត្រូវប្រព្រឹត្តនូវអំពើអបាយ មុខ ផ្សេងៗមានការសេពគ្រឿងញៀននិងជាក្មេងទំនើងជាដើម ដែល សង្គមស្អប់ខ្ពើម។

ឯកឧត្តមបន្តថា រាជរដ្ឋាភិបាលកម្ពុជាក្រោមការដឹកនាំដ៏ត្រឹម ត្រូវរបស់របស់សម្តេចតេជោនាយករដ្ឋមន្ត្រី បានផ្តល់អាទិ៍ភាព ខ្ពស់បំផុតទៅលើវិស័យអប់រំ ក្នុងគោលបំណងតែមួយគត់ គឺដើម្បី កសាងធនធានមនុស្សប្រកបដោយគុណភាពមួយពិតប្រាកដ ដែលធនធាន មនុស្សប្រកបដោយគុណភាពនេះហើយ អាចនឹង យកទៅប្រើប្រាស់ក្នុងការកសាង និងអភិវឌ្ឍន៍ប្រទេស ជាតិឱ្យមាន ការរីកចម្រើន ព្រោះថា ប្រទេសជាតិមួយអាចរីកចំរើនទៅបាន លុះត្រាតែប្រទេសនោះមានធន ធានមនុស្សប្រកបដោយគុណភាព ។ក្នុង នាមជាប្រធានក្រុមការងារចុះជួយមូលដ្ឋានស្រុកអូររាំងឪ ឯកឧត្តមតែងតែលើកទឹកចិត្តចំពោះលោកគ្រូ អ្នកគ្រូ ក្នុងការផ្ទេរ ចំណេះដឹងទៅឱ្យសិស្ស ហើយតែងតែជំរុញ សិស្សឱ្យខិតខំទទួល ចំណេះដឹងដែល លោកគ្រូ អ្នកគ្រូបានផ្ទេរឱ្យជានិច្ច៕
ដោយ៖ ហេង សម្បត្តិ