ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានប្រកាសថា ថ្ងៃទី២០ ខែកុម្ភៈ ឆ្នាំ២០២៣ គឺនៅសល់តែ៧៤ថ្ងៃទៀតប៉ុន្នោះ នឹងឈានដល់ព្រឹត្តិការណ៍ស៊ីហ្គេមលើកទី៣២(32nd SEA Games) និងអាស៊ានប៉ារ៉ាហ្គេមលើកទី១២ (12th ASEAN Para Games) ដែលកម្ពុជាធ្វើជាម្ចាស់ផ្ទះក្នុងឆ្នាំ២០២៣នេះ។ សម្ដេចតេជោ ហ៊ុន សែន បានប្រកាសដូច្នេះ ក្នុងពិធីប្រគល់វិញ្ញាបនបត្រ និងសញ្ញាបត្រ ជូនដល់សិស្សថ្នាក់វិជ្ជាជីវៈ និងនិស្សិតសាកលវិទ្យាលយធនធានមនុស្សសរុបប្រមាណ សរុបចំនួន ១,៩៤៦នាក់ ក្នុងនោះ នារី ១,០៣៣នាក់ នៅព្រឹកថ្ងៃទី២០ ខែកុម្ភៈ ឆ្នាំ២០២៣ ។

សូមជម្រាបថា ៦៤ឆ្នាំហើយ ដែលកម្ពុជារង់ចាំឱកាស ធ្វើជាម្ចាស់ផ្ទះ នៃព្រឹត្តិការណ៍កីឡាថ្នាក់តំបន់ នេះ។ កាលពីឆ្នាំ១៩៥៩ កម្ពុជា គឺជាស្ថាបនិកម្នាក់ ដែលចូលរួមបង្កើតព្រឹត្តិការណ៍នេះ។ អ្វីដែលកម្ពុជា រង់ចាំនោះ នឹងឈានមកដល់។ កម្ពុជា នឹងយកឱកាសនៃពិធីបើកកីឡា ស៊ីហ្គេមនេះ ដើម្បីបង្ហាញនូវវប្បធម៌ អរិយធម៌ដ៏រុងរឿងរបស់ខ្លួនឲ្យពិភពលោកបានដឹង បានស្គាល់។

ជាមួយគ្នានេះ កម្ពុជា ក៏នឹងបង្ហាញពីសក្ដានុពល នៃទេសចរណ៍ ពិសេសតំបន់ទេសចរណ៍ ធម្មជាតិ ដល់ភ្ញៀវបរទេស ដែលមកចូលរួមទៀតផង ។

សូមបញ្ជាក់ថា ព្រឹត្តិការណ៍ស៊ីហ្គេម លើកទី៣២ មាន ៣៧ប្រភេទកីឡា នឹងប្រព្រឹត្តទៅពីថ្ងៃទី០៥ ដល់ថ្ងៃទី១៧ ខែឧសភា និងការប្រកួតកីឡាអាស៊ានប៉ារ៉ាហ្គេម លើកទី១២ មាន ១៣ប្រភេទកីឡាចាប់ពីថ្ងៃទី០៣ ដល់ថ្ងៃទី០៩ ខែមិថុនា ឆ្នាំ២០២៣ ៕ អត្ថបទ៖ វណ្ណលុក, រូបភាព៖ វ៉េង លីមហួត និង សួង ពិសិដ្ឋ