មូស្គូ៖ ក្រសួងការបរទេសរុស្ស៊ីប្រកាសច្រានចោលដីកាចាប់ខ្លួនលើលោកប្រធានាធិបតី ពូទីន របស់តុលាការឧក្រិដ្ឋកម្មអន្តរជាតិ ហៅកាត់ថា ICC។

ក្រសួងការបរទេសនៃប្រទេសរុស្ស៊ី និងតំណាងស្ថាប័នធំៗរបស់រុស្ស៊ីផ្សេងទៀត បានច្រានចោលសេចក្តីប្រកាសប្រកាសដីកាចាប់ខ្លួនប្រធានាធិបតីរុស្ស៊ី លោក ពូទីន ភ្លាមៗ ក្រោយពេលតុលាការឧក្រិដ្ឋកម្មអន្តរជាតិបានចេញដីកាចាប់ខ្លួននេះ។

អង្គបុរេជំនុំជម្រះនៃតុលាការឧក្រិដ្ឋកម្មអន្តរជាតិ (ICC) បានចេញដីកា កាលពីថ្ងៃសុក្រ សប្តាហ៍នេះ សម្រាប់ការចាប់ខ្លួនប្រធានាធិបតីរុស្ស៊ីលោក វ្ល៉ាឌីមៀ ពូទីន និងលោកស្រី ម៉ារៀ លូវ៉ា-បេឡូវ៉ា (Maria Lvova-Belova ) ស្នងការប្រធានាធិបតី ទទួលបន្ទុកសិទ្ធិកុមាររបស់រុស្ស៊ី។

សាលាក្តីដែលមានមូលដ្ឋាននៅទីក្រុងឡាអេ មិនត្រូវបានទទួលស្គាល់ដោយរុស្ស៊ីទេ ហើយចំណាត់ការនេះមិនមានសុពលភាពស្របច្បាប់នៅក្នុងប្រទេសរុស្ស៊ីឡើយ។ សហរដ្ឋអាមេរិកក៏មិនទទួលស្គាល់ស្ថាប័នដែលត្រូវបានគេចោទប្រកាន់ថាជា អឺរ៉ូកណ្តាល (Eurocentric) និងលម្អៀងទៅខាងលោកខាងលិចដែរ។

អ្នកនាំពាក្យរបស់ក្រសួងការបរទេស លោកស្រី ម៉ារៀ ហ្សាក់ហារ៉ូវ៉ា (Maria Zakharova) បានសរសេរនៅលើ Telegram ថា “ការសម្រេចចិត្តរបស់តុលាការឧក្រិដ្ឋកម្មអន្តរជាតិមិនមានបញ្ហាចំពោះប្រទេសរបស់យើង រួមទាំងតាមទស្សនៈផ្លូវច្បាប់” ។

រីឯ អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) បាននិយាយថា “យើងចាត់ទុកការសន្និដ្ឋានដ៏អាក្រក់បំផុត និងមិនអាចទទួលយកបាន” ។ “រុស្ស៊ីក៏ដូចជារដ្ឋដទៃទៀតដែរ មិនទទួលស្គាល់យុត្តាធិការរបស់តុលាការនេះទេ។ អាស្រ័យហេតុនេះ រាល់ការប្រកាសរបស់ខ្លួនគឺទុកជាមោឃៈចំពោះសហព័ន្ធរុស្ស៊ី តាមទស្សនៈផ្លូវច្បាប់»។

ចំណែកឯ លោក ព្រឹទ្ធសមាជិក អេនត្រេ ឃ្លីសហ្សា (Andrey Klishas) សមាជិកជាន់ខ្ពស់នៃគណបក្ស យូណាយធី រុស្ស៊ី (United Russia) ដែលកាន់អំណាចបានហៅការប្រកាសនេះថា “មិនសមហេតុផល” ដោយនិយាយថា ICC កំពុងដាក់ខ្លួននៅលើផ្លូវឆ្ពោះទៅរកការបំផ្លាញខ្លួនឯង៕ ប្រភពពី RT ប្រែសម្រួលដោយ៖ សារ៉ាត